Ol Yangpela—Ritim Tok Bilong God!
1 Taim yupela i yangpela yet, em taim bilong hatwok na taim bilong makim ol bikpela samting yupela i mas mekim. Long olgeta de planti bilong yupela yangpela i save bungim ol samting i pulim yupela long brukim ol lo bilong God long stretpela pasin. Paslain long yupela i kirap makim ol samting yupela i laik mekim, olsem ediukesen, wok mani, na marit, yupela i mas putim ol mak bilong spirit yupela i laik winim. Long dispela rot tasol yupela inap makim ol arapela samting i helpim yupela long i stap gut long bihain. Ol mak bilong spirit yupela i laik winim bai helpim yupela long bihainim savetingting na ol samting yupela i mekim bai kamap gutpela. Long rot bilong ritim na skelim long bel tok bilong Baibel long olgeta taim bai kirapim yupela long bihainim pasin i stret wantaim tok bilong Baibel, na ol gutpela samting yu laik mekim bai karim kaikai.—Jos. 1:8; Sng. 1:2, 3.
2 Dispela Bai Helpim Yupela Olsem Wanem? Graun bilong Satan i pulap long ol samting i kirapim yumi long mekim pasin nogut. (1 Jo. 2:15, 16) Ating yupela i save long sampela wanklas o wankrismas bilong yupela em hevi i painim ol, long wanem, ol i larim ol wanlain i pulim ol. Pasin bilong bihainim tok bilong Baibel bai strongim yupela long ol samting bilong spirit na long tingim stretpela pasin, na long dispela rot yupela inap sakim pasin nogut. Na tu, tok bilong Baibel inap helpim yupela long abrusim ol trik bilong Satan. (2 Ko. 2:11; Hi. 5:14) Pasin bilong wokabaut long rot God i makim bai givim amamas tru long yupela—bai yupela i belgut long rot yupela i bihainim.—Sng. 119:1, 9, 11.
3 Ol stiatok bilong Baibel i wok gut long olgeta taim na i winim tru savetingting bilong ol man. (Sng. 119:98-100) Pasin bilong beten na save long ol stiatok bilong Baibel na skelim long bel ol samting Jehova i tingting pinis long mekim, em inap helpim yupela long i go klostu moa long As bilong tok bilong Baibel, God Jehova, em i gat olgeta savetingting. Em i tok promis: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”—Sng. 32:8.
4 Makim Taim Bilong Ritim Baibel: Wanpela yangpela Kristen i putim mak long em i laik ritim Baibel olgeta, na em i mekim olsem insait long wanpela yia. Olsem wanem dispela i helpim em? Em i tok: “Mi kisim bikpela save long Jehova, mi kisim save long ol samting i pulim mi i go klostu moa long em na i kirapim mi long pret long em long olgeta taim bihain.” (Jem. 4:8) Olsem wanem? Yu ritim pinis Baibel olgeta? Sapos nogat, gutpela sapos yu putim dispela olsem mak yu laik winim. Jehova bai blesim hatwok bilong yu, na yu bai kisim planti gutpela samting.