Ol Yangpela—Mekim Jehova i Belgut Tru
(Namba 1 Hap)
1 Ol yangpela inap amamas, long wanem, skin bilong ol i gutpela na strongpela. Saveman King Solomon i tok: “Yupela yangpela manmeri, yupela i mas amamas long taim yupela i yangpela yet. Yupela i ken bihainim tingting na laik bilong yupela yet.” (Sav 11:9) Tasol yupela ol yangpela i mas tingim dispela samting: Bihain bai God i skelim long kot ol samting yu bin mekim.
2 Ating yu save o yu no save, pasin yu bihainim em i bikpela samting. Olsem: Pasin yu bihainim em i bikpela samting long papamama bilong yu. Sindaun 10:1 i tok: “Sapos pikinini man i gat gutpela tingting na save, orait papamama bilong en i amamas. Tasol sapos pikinini i bihainim longlong pasin, orait papamama i bel hevi tru.” Tasol bikpela samting moa em olsem: Pasin yu bihainim em i bikpela samting long Man bilong wokim yu, em God Jehova. Long Sindaun 27:11 Jehova i strongim ol yangpela olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Ol yangpela long nau i ken mekim wanem bilong mekim Jehova i belgut tru? Ol i mas mekim sampela samting bilong helpim kongrigesen long i stap strong long spirit. Olsem:
3 Stap Olsem Gutpela Piksa: Yupela ol yangpela i stap long taim bilong “planti hevi nogut tru” em Baibel i bin tok profet bai painim olgeta man. (2 Ti 3:1) Ating ol wanskul i no bilip ol i putim hevi long yu, na sampela tisa i tok bilas long bilip bilong yu, em Baibel i as bilong en. Olsem: Tisa bilong wanpela yangpela pablisa i tok, tingting bilong evolusen em i tok tru na tok bilong Baibel em i stori nating tasol. Tasol yangpela pablisa hia i bekim tok long tisa na i litimapim tok bilong Baibel. Dispela samting i mekim na em i kirapim sampela Baibel-stadi. Sampela bilong dispela lain i laik harim tok ol i kirap long kam long ol miting. Tru tumas, bilip bilong ol yangpela brata na sista i kamapim long ples klia tok giaman bilong ol man i givim baksait long God na i helpim ol man i gat gutpela bel long save long tok i tru.—Hi 11:7.
4 Sapos yu bihainim gutpela pasin long skul, na long haus, na long kongrigesen, bai yu inap strongim bilip bilong ol narapela yangpela brata na sista. Olsem wanem? Yu inap strongim bel bilong ol narapela yangpela long kongrigesen na bai pasin nogut i no ken pulim ol? (Ro 1:12) Taim yu bihainim gutpela pasin i strongim ol narapela long i stap gut long Jehova, dispela i mekim na Jehova i belgut tru!
5 Klos na Bilas: Ol i tok bilas long wanpela yangpela sista long wanem, em i putim ol gutpela klos i stret, tasol em i no larim ol i pretim em na bai em i bihainim ol pasin bilong dispela graun i givim baksait long God, nogat. Em i toksave long ol olsem em i wanpela Witnes Bilong Jehova na em i save putim kain klos olsem. Olsem wanem long yu yet? Yu strong olsem dispela sista, o yu larim ol man em Satan i bosim ol long pulim yu long bihainim tingting na pasin bilong ol? Mipela amamas long tokaut olsem, planti bilong yupela ol yangpela i save bihainim ol tok bilong Jehova na sakim ol nupela laik bilong ol man, na ol god giaman, na ol tok bilong ol man bilong dispela graun wantaim ol bos bilong en, em ol spirit nogut!—1 Ti 4:1.
6 Skelim Ol Amamas Samting: Papamama i mas tingim dispela samting olsem: Ol i mas helpim ol pikinini bilong ol long skelim gut ol amamas ol i laik kisim. Wanpela brata i bin stori long wanpela gutpela famili em i kirap long laikim ol tumas. Ol i save tingim ol samting bilong spirit, na papamama i bosim ol samting famili i mekim bilong painim amamas. Brata i tok: “Mi laikim tru pasin bilong ol olsem famili olgeta i mekim sampela samting wantaim. Papamama i save helpim ol pikinini long redi long autim tok, na long taim bilong kisim amamas, papamama i mekim na famili olgeta i kisim amamas long dispela. Ol i save wokabaut long lek i go long wanpela gutpela hap, o go lukim ol samting long ol haus tumbuna, o stap tasol long haus na mekim sampela kain pilai samting, o famili olgeta i mekim sampela wok wantaim. Pasin bilong ol long sori long narapela narapela na long ol narapela manmeri tu i mekim na mi save, bai ol i wokabaut long tok i tru maski wanem hevi na traim bai painim ol bihain.”
7 Tasol sampela taim, i no gat rot long famili i kisim amamas wantaim. Olsem na yupela ol yangpela i mas tingim dispela samting: Samting yu mekim long taim bilong malolo em bikpela samting. Satan i tingting strong long giamanim planti bilong yupela. Long pasin hait Satan i wok long trikim na giamanim ol yangpela i no gat gutpela tingting na save. (2 Ko 11:3; Ef 6:11) Olsem na long nau, Satan i mekim wok long kain kain pasin bilong pulim yu long bihainim rot bilong tingim yu yet tasol na painim amamas na pasin i no stret.
8 Televisen em i namba wan samting bilong kirapim ol yangpela long laikim planti mani kago na mekim pasin pamuk samting. Ol piksa wokabaut na video i save kamapim kros pait na i kamapim klia ol samting bilong maritpasin. Ol musik bilong nau i go nogut moa yet na i gat pasin sem moa yet long en. Sampela pasin Satan i mekim i olsem gutpela, tasol i bin giamanim planti tausen yangpela Kristen long bihainim tingting na pasin nogut. Bilong sakim ol dispela samting, yu mas wok strong long bihainim stretpela pasin. (2 Ti 2:22) Yu ken mekim wanem sapos yu save yu mas stretim tingting na pasin bilong yu long ol samting bilong painim amamas? Man bilong raitim Song i tok: “Mi gat wanpela tingting tasol. Mi laik mekim wok bilong yu. Yu helpim mi na mi no ken lusim ol lo bilong yu.”—Sng 119:10.
9 Planti man i olsem lotuim spot na ol man bilong mekim singsing samting. Sapos yu pret long Jehova, dispela bai helpim yu na yu no ken litimapim ol man bilong mekim sin. Planti man long nau i litimapim pasin pamuk samting. Bilong sakim dispela samting, yu mas abrusim ol piksa nogut bilong pasin sem, na ol musik nogut. Wastaua bilong Epril 15, 1993 i stori long musik olsem: “Musik em i presen bilong God. Tasol planti ol i givim bel tumas long en. . . . Yu no ken givim bel tumas long musik; yu mas i gat bikpela tingting long mekim wok bilong Jehova. Skelim gut na was gut long musik yu laik harim. Olsem bai yu mekim gutpela wok—i no wok nogut—long dispela presen bilong God.”
10 Wok long givim baksait tru long pasin nogut. (Sng 97:10) Taim bel i kirapim yu long mekim pasin nogut, tingim Jehova, em i gat wanem tingting long dispela samting, na tingim tu ol samting pasin nogut i save kamapim, olsem: kamapim nating pikinini, kisim sik bilong pamuk, tingting na bel i no stap isi, yu no laikim yu yet, ol i tekewe wok yu holim insait long kongrigesen. Klia long ol samting i kirapim man long mekim pasin nogut, olsem ol samting i kamap long TV, na piksa wokabaut, na video, na singsing, na toktok. Abrusim pasin bilong poromanim ol man em Baibel i tok ol i “no gat gutpela tingting.” (Snd 13:19) No ken poromanim nating ol man; poromanim ol brata sista long kongrigesen em ol i laikim tumas Jehova na ol stretpela lo bilong em.
11 Sapos ol yangpela i laik mekim Jehova i belgut tru, ol i mas bihainim tok bilong Efesus 5:15, 16 olsem: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” Wanem samting bai helpim yu long “lukaut gut” long ol samting yu mekim na bai yu ken kamap strong nau long dispela taim bilong las de?
Ol Yangpela—Mekim Jehova i Belgut Tru
(Namba 2 Hap)
1 Lukautim Ol Samting Bilong Spirit: Long Matyu 5:3 Jisas i tok: “Ol man i save, ol i stap rabis tru long ol samting bilong God, em ol i ken amamas.” Yu tu yu ken amamas sapos yu save yu mas kisim ol samting bilong spirit. Bilong inapim ol dispela samting yu sot long en, yu mas givim bel long mekim bikpela wok moa long autim tok bilong Kingdom, na dispela bai strongim bilip bilong yu long ol samting yu kisim save long en.—Ro 10:17.
2 Yu yet yu save olsem, sampela taim i hatwok long autim tok long olgeta wik. Ating sampela taim yu pret na ting yu no inap mekim. Olsem na yu mas strongim bel. Sapos yu autim tok long olgeta wik, bai yu lain long mekim gut wok bilong autim tok na yu no ken pret—bai yu ting olsem yu inap.
3 Stretim tok wantaim ol strongpela pablisa long kongrigesen, olsem ol painia na ol elda, na bai yu ken autim tok wantaim ol. Putim gut yau long ol tok ol i mekim na long pasin ol i mekim bilong bekim tok long man i kamapim sampela tingting bilong daunim tok bilong ol Witnes. Mekim gutpela wok long buk Reasoning na long ol samting Wok Kingdom i tokim yumi long mekim. Sapos yu mekim olsem na yu givim bel olgeta long mekim wok bilong Jehova, i no longtaim na bai yu kisim bikpela amamas moa long autim tok.—Ap 20:35.
4 Taim ol i gat rot, sampela i bin autim tok long skul na ol i bin kamapim sampela disaipel. (Mt 28:19, 20) Wanpela yangpela Kristen i tok: “Taim tisa i no givim wok long mipela, olsem klostu long taim bilong holide bilong skul i kamap, planti taim rot i op long mi ken autim tok. Mi save putim sampela buk bilong Baibel long desk bilong mi na bai ol narapela i ken lukim, na planti sumatin i bin kam long mi bilong harim sampela tok.” Bihain sampela bilong ol dispela sumatin na wanpela tisa ol i kirap long kam long ol miting Kristen. Dispela tisa i kamap strong long bilip na nau em i laik dediket na kamap Witnes Bilong Jehova. Jehova i save amamas tru taim ol yangpela olsem yu i mekim ol samting bilong litimapim nem bilong em.
5 Narapela samting bilong inapim ol samting bilong spirit yu sot long en, em yu yet yu mas stadi. Bilong mekim Jehova i belgut tru, yumi mas kisim save long em na ol samting em i laik mekim na ol samting em i laik bai yumi mekim. Olsem wanem? Yu save makim taim bilong yu yet yu ken stadi? Olsem yu makim taim bilong kaikai long olgeta de, yu save stadi tu long olgeta de? (Jo 17:3) Ating yu save kaunim hap bilong Baibel em sedyul bilong Skul i makim, a? Tasol olsem wanem? Yu gat sedyul bilong yu yet bilong kaunim sampela hap moa bilong Baibel em sedyul bilong Skul i no makim? Yu save redim gut ol tok bilong miting? Yu save kaunim ol Wastaua na Kirap!?
6 Baibel na ol buk yu kaunim bilong helpim yu long stadi long Baibel ol i tokim yu long Jehova, na long tingting bilong em, na long ol samting em i laik mekim. Yu mas tingim, olsem wanem ol dispela tok inap helpim yu. Na tingim tu, olsem wanem ol tok nau yu kaunim i helpim ol tok yu kaunim pinis. Sapos yu mekim olsem, dispela bai helpim yu long tingim gut ol tok na putim i go daun long bel na bai i kirapim yu long mekim wok.—Sng 77:12.
7 Yumi amamas long lukim ol yangpela i kam long miting, em ol i save tingim ol samting bilong spirit. Sapos ol yangpela Kristen i bekim sampela tok long taim bilong miting, dispela inap strongim ol narapela. Sapos yupela i bekim wanpela taim, em gutpela, tasol sapos yupela i bekim tupela o planti taim, em gutpela moa. Putim dispela samting olsem wanpela mak bilong winim. Taim miting i no kirap yet na taim miting i pinis, toktok gut wantaim ol brata sista, ol yangpela na lapun, na long dispela rot bai yu inap save gut long ol na pas gut wantaim ol. (Hi 10:24, 25) Wanpela yangpela brata i tok, papamama bilong em i bin kirapim em long toktok gut wantaim wanpela o tupela lapun brata o sista long olgeta miting. Em i save pren gut wantaim ol lapun brata sista bilong kongrigesen, na nau em i pilim ol gutpela samting dispela i bin lainim em long en.
8 Wok Long Winim Sampela Mak Long Wok Bilong Spirit: Sori tru, long nau i stap bilong planti yangpela i no gat as bilong en. Tasol taim yu winim ol mak long wok bilong spirit yu bin putim long yu yet, yu save kisim bikpela amamas, a? God i skulim yumi na yumi kisim gutpela tingting, olsem na ol dispela mak yumi wok long winim bai helpim yumi long nau, na bihain bai yumi kisim laip oltaim.—Sav 12:1, 13.
9 Taim yu putim ol mak bilong winim, yu mas beten. Toktok wantaim papamama bilong yu na ol elda. Skelim ol samting yu inap mekim, na putim ol mak em yu yet inap winim—no ken skelim ol samting yu yet inap mekim wantaim ol samting ol narapela inap mekim. Yumi olgeta i narapela narapela kain. Olsem na no ken ting yu inap mekim olgeta samting em narapela i save mekim.
10 Yu ken wok long winim wanem ol mak? Sapos yu no pablisa yet o yu no baptais, putim ol dispela samting olsem wanpela mak bilong winim. Sapos yu pablisa pinis, makim hamas aua yu laik winim long olgeta wik long autim tok. Wok long mekim gutpela wok tisa long taim yu mekim ol gobek, na wok long kisim wanpela Baibel-stadi. Sapos yu wanpela yangpela i baptais pinis na i skul yet, tingting long mekim wok painia long taim i gat holide bilong skul na putim olsem mak bilong winim. “Yupela i mas wok strong long mekim wok bilong Bikpela.”—1 Ko 15:58.
11 Papamama i Mas Helpim Pikinini—Em Bikpela Samting: Ol yangpela long kongrigesen i no ken ting ol i stap wanpela tasol long mekim ol wok bilong kisim laip. I gat planti brata sista long oganaisesen bilong Jehova ol inap helpim ol dispela yangpela long tingim gut ol samting ol i laik mekim long olgeta de, na long winim ol hevi i painim ol. Em wok bilong ol papamama i dediket pinis long helpim pikinini bilong ol long tingim gut ol samting ol i laik mekim. Long 1 Korin 11:3, Baibel i makim man i stap bos bilong famili. Olsem na long famili Kristen, meri i save wok gut wantaim man bilong em, na papa i save go pas long lainim ol pikinini long ol lo bilong God. (Ef 6:4) Taim pikinini i liklik yet ol i mas kirap long skulim em gut. Insait long namba wan yia bilong pikinini, kru bilong em i go bikpela hariap, olsem na papamama i no ken ting pikinini i liklik yet i no inap lain, nogat. (2 Ti 3:15) Taim pikinini i kamap bikpela, isi isi papamama i mas lainim em long laikim Jehova na lain long i stap pren bilong em.
12 Namba wan samting papamama i mas mekim, ol yet i mas makim gutpela rot ol pikinini i ken bihainim. Dispela bai helpim gut pikinini long ol samting bilong spirit, winim samting papamama i tokim pikinini long mekim o i no ken mekim. Bilong makim gutpela rot, papamama i mas kamapim ol gutpela pasin bilong spirit holi taim ol i stap long haus, na long narapela narapela, na long ol pikinini bilong ol. (Ga 5:22, 23) Planti ol i bin mekim olsem, na ol i save spirit bilong God i gat strong long kamapim gutpela wok. Dispela spirit i ken helpim yu long stiaim tingting na bel bilong pikinini bilong yu.
13 Na papamama i mas makim gutpela rot olsem: Ol yet i mas mekim stadi, na go long ol miting, na autim tok long olgeta wik. Sapos long haus ol i givim bel long toktok long tok i tru, na ol i go pas long mekim bikpela wok long autim tok, na ol i amamas long stadi, ol dispela samting bai kirapim ol pikinini long laikim tru ol samting bilong spirit.
14 Sapos papa i redim gut famili-stadi na mekim long olgeta wik ol pikinini bai laikim tru, na long taim bilong mekim stadi famili bai pas gut wantaim. Lusim bikpela hap taim liklik long putim tok i go daun long bel bilong pikinini. (Snd 23:15) Long taim bilong famili-stadi planti famili i save redim Wastaua, tasol sapos sampela taim ol i stadi long narapela samting em inap helpim famili, ating dispela bai strongim ol. Mekim sampela askim bilong kamapim tingting bilong olgeta wan wan long famili na putim yau gut long bekim bilong ol. Sapos yu mekim olsem, ol bai laikim tru stadi, na yu inap save long ol samting i stap long bel bilong ol. Em bikpela wok long papa long mekim gutpela famili-stadi i save helpim tru olgeta wan wan long famili. Tasol taim olgeta long famili i kamap strong long spirit em gutpela blesing tru papa i kisim! Sapos papa i helpim olgeta wan wan na ol i insait long stadi, olgeta bai amamas!
15 Long pasin sori yu mas skulim gut ol pikinini na bai ol inap abrusim bagarap na i stap laip. (Snd 22:6) Sapos yu tingim gut dispela samting bai yu save, wok yu mekim nau long skulim pikinini em i bikpela samting tru, winim olgeta wok bihain bai yu mekim long skulim narapela. No ken ting yu stap wanpis long mekim dispela bikpela wok. Nogat. Bilip long Jehova long em i ken soim rot long yu long lukautim gut wok bilong yu long famili. Tasol i gat ol narapela tu i ken helpim gut yu.
Ol Yangpela—Mekim Jehova i Belgut Tru
(Namba 3 Hap)
1 Ol Samting Ol Narapela i Ken Mekim Bilong Helpim Ol: Ol elda i mas helpim ol yangpela long mekim sampela wok insait long Haus Kingdom. Sapos papamama bilong ol i orait long dispela, singautim ol yangpela na bai ol i ken insait long wok olsem: klinim Haus Kingdom, lainim gut ol sia, helpim brata long stretim ol samting bilong saun, givim Wok Kingdom na pepa Bilong Mekim Tok Long Skul Bilong Wok Autim Tok long ol brata sista. Taim ol pikinini i liklik yet, kirapim ol long bekim sampela tok long miting. Ol elda na wokman i gat wok long lukautim ol hap bilong Miting Bilong Wok, ol i mas lukluk gut—nogut liklik pikinini i apim han bilong bekim tok na brata i no lukim. Wok long painim rot bilong ol i ken insait long sampela soim wantaim papamama bilong ol o singautim ol i kam antap long pletfom na mekim sotpela tok, maski em i wanpela o tupela tok tasol.
2 No ken ting samting ol yangpela i mekim i olsem samting nating. Ol yangpela i bin mekim planti samting bilong helpim gut kongrigesen. Ol i bihainim gutpela pasin na planti ol i bin ‘givim biknem long tok tru bilong God.’ (Ta 2:6-10) Mekim gutpela tok amamas long ol yangpela i insait long miting, maski ol i mekim liklik tok tasol. Dispela bai kirapim ol long redi gut na bai ol i gat laik long mekim olsem long ol miting bihain. Dispela samting yu mekim em i bikpela samting tru. Yupela ol elda na wokman bilong kongrigesen, hamas taim yu bin mekim tok amamas long ol yangpela i bin mekim wanpela tok samting long miting?
3 Ol painia i ken mekim wanem bilong helpim ol? Gutpela yu lukim gen sedyul bilong yu na bai yu ken save olsem wanem ol skulmanki i ken insait long sampela wok yu bai mekim long apinun o long Sarere Sande. Olsem wanem? Yu save tokim ol yu amamas long mekim wok painia? Pes bilong yu i lait na bai ol i save, yu amamas long mekim wok autim tok? Yu strong long tokim ol yangpela na ol narapela tu, em gutpela sapos ol tu i mekim dispela wok? Taim yu autim tok wantaim ol, yu save mekim gutpela toktok na strongim ol? Sapos olsem, orait yu tu yu insait long dispela bikpela wok bilong skulim ol narapela.
4 Olgeta long kongrigesen i mas save, wok bilong skulim ol yangpela em i bikpela samting. Olsem wanem? Yu inap stretim rot wantaim ol na bai yu ken autim tok wantaim ol? Yu inap redim sampela tok wantaim ol na mekim traim na bai ol i ken kamapim long taim bilong autim tok long ol haus? Taim yu autim tok wantaim ol, yu tingim sampela rot bilong kirapim ol long mekim ol wok bilong spirit? Olgeta wan wan pablisa i mas save, maski ol yangpela i mekim liklik tok tasol long ol haus, dispela inap kirapim ol long tingim ol wok bilong spirit ol inap mekim inap olgeta taim bihain na ol bai kisim gutpela blesing long en inap oltaim oltaim.
5 Ol Yangpela i Ken Helpim Ol Yet: Mipela laik kirapim yupela ol yangpela long bihainim yet ol tok Jehova i lainim yumi long en, na givim baksait long ol samting bilong dispela graun. Wok long skelim tingting na pasin bilong yu yet. Yu gat wanem tingting long ol samting Jehova i laik bai yu mekim long olgeta de? Yu save wok strong na bai ol tingting bilong Satan i no ken pulim yu? Yumi olgeta na ol yangpela tu i laik bai ol wanlain bilong yumi i ken laikim yumi, tasol olsem wanem? Yu larim ol i pulim yu long mekim pasin nogut? Tok aposel Pol i mekim long Rom 7:21-23 i makim olsem pasin bilong graun i strong long pulim yumi long bihainim pasin bilong en.
6 Sapos yu no laik bai pasin bilong graun i pulim yu, na yu no laik bihainim rot ol wanlain bilong yu i save bihainim—yu laik bihainim narapela rot na bihainim ol tok bilong God—orait, yu mas strongim bel. Ol man bilong bipo ol i bin mekim olsem. Tingim pasin bilong Noa long strongim bel. Em i bilip na em i no poromanim ol man nogut, na dispela i kamapim long ples klia pasin nogut bilong olgeta man bilong graun. (Hi 11:7) Yumi mas wok strong long lukautim bilip bilong yumi na gutpela samting bai kamap. No ken bihainim pasin bilong ol man i save pret na no gat bun, em ol i bihainim lain bilong Satan. Painim ol man Jehova i amamas long ol na poromanim ol tasol. (Fl 3:17) Bung wantaim ol man ol bai wokabaut wantaim yu i go long nupela taim God i tok promis long kamapim. Tingim dispela samting: I gat wanpela rot tasol bilong i go long laip oltaim.—Mt 7:13, 14.
7 Yumi amamas long lukim ol yangpela i litimapim nem bilong God na givim biknem long em, na yumi save Jehova tu i amamas long lukim ol i mekim olsem! Tru tumas, Jehova i amamas long lukim ol yangpela i mekim bikpela wok long tokim ol man long ol samting em i laik mekim. Ol yangpela i “gutpela blesing tru” i kam long God, na em i laik bai ol gutpela samting tasol i painim ol. (Sng 127:3-5; 128:3-6) Krais Jisas i bihainim pasin bilong Papa bilong em long tingim ol liklik pikinini, na em i bin amamas long bung wantaim ol, na em i lusim hap taim bilong strongim ol long lotuim Jehova. Em i kamapim klia olsem em i sori tru long ol. (Mk 9:36, 37; 10:13-16) Olsem wanem? Yumi tingim ol yangpela wankain olsem Jehova na Krais Jisas i tingim ol? Ol yangpela i mas save, Jehova na ol ensel i amamas long pasin ol i mekim bilong i stap gut long em na long i stap gutpela piksa ol narapela i ken bihainim. Yumi mas tokim ol, ol i mekim gutpela wok, na yumi mas kirapim ol long winim ol mak bilong spirit ol i bin putim long ol yet na i mekim Jehova i belgut tru. Gutpela sapos yupela ol yangpela i wok strong long mekim ol dispela samting, long wanem, yupela bai kisim planti gutpela blesing long nau i go inap long planti yia bihain!
[Questions for Part 3]
1. Ol elda i ken mekim wanem bilong helpim ol yangpela long kongrigesen?
2. Olsem wanem pasin bilong mekim tok amamas long ol yangpela i helpim ol?
3. Ol painia i ken mekim wanem bilong helpim ol yangpela long kongrigesen?
4. Olgeta long kongrigesen i ken mekim wanem bilong helpim wok bilong skulim ol yangpela long autim tok?
5. Ol yangpela i ken mekim wanem bilong helpim ol yet long kamap strong long ol samting bilong spirit?
6. Ol yangpela i mas painim wanem kain poroman?
7. God Jehova na Krais Jisas i gat wanem tingting long ol yangpela?