Lotu​​—Mi Yet Bai Makim o Papamama Bai Makim?

LONG Polan, planti man i save tokim ol Witnes Bilong Jehova olsem, “Mama i bin karim mi long dispela lotu, na mi bai stap yet long en i go inap long taim mi dai.” Dispela i soim olsem, long tingting bilong ol, lotu em samting ol man i kisim long ol papamama. Olsem wanem? Ol manmeri long hap bilong yu i gat wankain tingting long lotu? Kain tingting olsem i save kamapim wanem samting? Lotu i kamap olsem samting em ol man i kisim long papamama na ol i bihainim nating tasol. Orait yu ting dispela samting inap kamap long sampela Witnes Bilong Jehova em ol i bin lainim tok i tru long rot bilong papamama o ol bubu bilong ol?

Dispela samting i no bin kamap long Timoti, em mama na bubu meri bilong em ol i bilipmeri na ol i bin stiaim em long bilip long God tru na laikim em tru. Timoti i save long ol tok i stap long Rait Holi kirap long taim em i “liklik pikinini yet.” Bihain Timoti, wantaim mama na bubu meri, i bilip strong long bel olsem lotu Kristen i skulim ol man long tok i tru. Em i “bilip strong” long ol tok em i harim long ol Rait Holi we i stori long Jisas Krais. (2 Ti. 1:5; 3:​14, 15) Olsem na maski ol papamama Kristen long nau ol i wok strong long helpim ol pikinini long kamap wokman bilong Jehova, ol pikinini yet i mas kisim laik bilong mekim olsem.​—Mk. 8:34.

Olgeta wan wan man i mas skelim gut na bilip olsem dispela tok em i tru, o nogat. Ol i mas mekim olsem bambai pasin bilong laikim tumas Jehova i stap olsem as na ol i mekim wok bilong Jehova, na ol bai stap gut long em maski wanem samting i kamap. Dispela bai strongim tru bilip bilong ol.​—Ef. 3:17; Kl. 2:​6, 7.

Wok Bilong Ol Pikinini

Alberta i bin kamap bikpela insait long famili Witnes, na em i tok: “Oltaim mi pilim olsem ol Witnes Bilong Jehova i bihainim lotu i tru, tasol mi no wanbel long ol tok ol i mekim long mi mas bihainim wanem ol pasin long i stap bilong mi.” Sapos yu wanpela yangpela, ating yu tu yu gat wankain tingting olsem em, a? I gutpela sapos yu kisim save long wanem ol samting God i laik bai yumi mekim long i stap bilong yumi, na yu ken kisim amamas long mekim laik bilong em. (Sng. 40:8) Albert i tok: “Mi kirap long beten. Pastaim mi pilim hatwok. Tasol mi mas fosim mi yet long beten. I no longtaim na mi pilim olsem God inap tingim mi sapos mi wok strong long mekim ol pasin i stret. Dispela i strongim mi long senisim pasin bilong mi.” Sapos yu kisim pasin bilong pas gut wantaim Jehova, yu inap kisim laik bilong mekim ol samting Jehova i laik bai yumi mas mekim.​—Sng. 25:14; Jem. 4:8.

Tingim wanpela gem yu bin pilaim, olsem soka. Sapos yu no save long ol lo bilong en, o yu no save gut long pilaim dispela gem, ating bai yu les long en. Tasol sapos yu lain long ol lo bilong en na yu inap pilai gut, ating bai yu amamas tu long painim rot bilong pilai. Na i wankain tu long ol wok Kristen. Olsem na yu yet i mas redim ol samting bilong ol miting Kristen. Yu yet i mas insait long ol samting bilong wok Kristen. Maski yu yangpela yet, ating gutpela pasin bilong yu bai strongim ol arapela!​—Hi. 10:​24, 25.

Na i wankain tu long wok bilong tokim ol narapela long bilip bilong yu. Pasin bilong laikim tru Jehova i mas kirapim yu long mekim dispela wok, na i no olsem sampela i fosim yu long mekim. Askim yu yet: ‘Bilong wanem mi laik tokim ol man long Jehova? Wanem ol samting i mekim na mi laikim tru Jehova?’ Yu mas save long Jehova olsem em i wanpela gutpela Papa. Long rot bilong Jeremaia, Jehova i tok: “Long dispela taim bai laik bilong yupela na tingting bilong yupela i strong tru long painim mi. Olsem na bai yupela inap i kam klostu long mi.” (Jer. 29:​13, 14) Bilong mekim olsem, yu mas mekim wanem? Jakub i tok: “Mi mas senisim tingting bilong mi. Kirap long taim mi liklik yet, mi save go long ol miting na autim tok, tasol mi no pilim tru ol dispela samting, mi mekim nating tasol. Tasol taim mi kisim sampela save moa long Jehova na pas gut wantaim em, em long dispela taim nau mi kirap insait tru long ol wok bilong tok i tru.”

Sapos yu gat ol gutpela poroman i save strongim yu, bai yu kisim amamas long autim tok. Wanpela savetok bilong Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting.” (Snd. 13:20) Olsem na yu mas painim ol pren husat i putim ol wok bilong spirit olsem mak ol i laik winim na ol i amamas long mekim wok bilong Jehova. Jola i tok: “Mi poroman wantaim planti yangpela em ol i save tingim ol samting bilong spirit na dispela i strongim mi. Mi kirap autim tok long olgeta mun na mi amamas tru.”

Wok Bilong Papamama

Jola i tok: “Mi tenkyu tru long papamama i bin skulim mi long Jehova.” Yes, papamama inap tru long stiaim ol pikinini long makim wanem lotu ol i laik bihainim. Aposel Pol i tok: “Yupela papa, . . . stretim gut ol pikinini bilong yupela na skulim ol long tok bilong Bikpela.” (Ef. 6:4) Dispela tok bilong Baibel i soim klia olsem papamama i gat wok long skulim ol pikinini long tingting na pasin bilong Jehova, na i no long tingting na pasin bilong ol yet. Nogut yu putim long tingting bilong ol pikinini ol samting yu laik bai ol i mekim​—mobeta yu helpim ol long putim mak long bihainim pasin na wokabaut i stret wantaim laik bilong Jehova!

Yu ken lainim gut ol pikinini long ol tok bilong Jehova na “tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” (Lo 6:​6, 7) Ewa na Ryszard, ol i gat 3-pela pikinini man, tupela i tok: “Planti taim mipela i toktok long olkain wok insait long fultaim sevis.” Orait wanem samting i kamap? “Ol pikinini i laik putim nem long insait long Skul Tiokratik taim ol i liklik mangi yet, na ol i kamap pablisa, na ol yet i kirap wokim disisen long kisim baptais. Bihain olgeta i insait long fultaim sevis.”

Em i bikpela samting long papamama i stap olsem gutpela piksa. Ryszard i tok: “Mipela i pasim tok long bel olsem mipela i no ken giaman tasol na bihainim wanpela kain pasin long haus na narapela kain pasin insait long kongrigesen.” Olsem na askim yu yet: ‘Ol pikinini bilong mi i lukim mi i bihainim wanem kain pasin long i stap bilong mi? Ol i lukim olsem mi laikim tru Jehova? Ol beten na pasin bilong mi long mekim stadi bilong mi yet i soim olsem mi laikim tru Jehova? Ol i lukim dispela pasin laikim long tingting mi holim long wok autim tok, long ol samting bilong kisim amamas, long ol samting bilong skin, na long ol tok mi mekim long ol arapela insait long kongrigesen?’ (Lu. 6:40) Ol pikinini bai lukim ol samting yu mekim long olgeta de, na ol bai luksave sapos pasin bilong yu i no wankain long tok yu mekim.

Em i bikpela samting long stretim ol pikinini taim yu mekim bikpela long ol. Tasol Baibel i tok long “skulim pikinini bilong yu long bihainim gutpela pasin.” (Snd. 22:6) Ewa na Ryszard i tok: “Mipela i mekim Baibel stadi wantaim wan wan pikinini.” Ol papamama yet i mas skelim olsem ol bai stadi wantaim ol wan wan pikinini o bungim olgeta wantaim. Tasol maski ol i mekim stadi olsem wanem, ol i mas tingim ol wan wan pikinini taim ol i mekim stadi. Bilong mekim olsem, ol i mas redi long senisim pasin bilong stadi na bihainim stretpela tingting. Nogut yu tok tasol olsem sampela kain musik i nogut​—mobeta yu soim ol pikinini long olsem wanem ol i ken bihainim savetingting long mekim ol gutpela disisen, na olsem wanem ol stiatok bilong Baibel inap helpim ol.

Ating ol pikinini i save gut long ol samting yu laik bai ol i mekim, na i luk olsem ol i bihainim laik bilong yu. Tasol ol tok bilong yu i mas i go daun long bel bilong ol. Baibel i tok: “Tingting [“long bel,” NW] bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.” (Snd. 20:5) Skelim gut tingting bilong ol pikinini bambai yu ken luksave sapos i gat hevi i hait i stap long bel bilong ol, na sapos i olsem, orait hariap long stretim. No ken sutim tok long ol​—soim olsem yu tingim ol, na givim sampela askim i stret long mekim. Tasol was gut, nogut yu givim planti askim tumas long ol. Sapos yu soim olsem yu tingim tru ol, bel bilong ol bai pilim tru, na dispela bai helpim yu long helpim ol.

Wok Bilong Kongrigesen

Yu stap olsem wokman bilong God, olsem na yu ting yu inap helpim ol yangpela bilong kongrigesen long pilim tru gutpela samting bilong spirit ol i bin kisim long papamama? Tru, em wok bilong papamama long skulim ol pikinini, tasol ol lain bilong kongrigesen, na moa yet em ol elda, ol i ken helpim papamama long mekim dispela wok. Na em i bikpela samting moa long helpim ol famili em papa o mama i no wanpela Witnes Bilong Jehova.

Ol elda inap mekim wanem bilong helpim ol yangpela long laikim tru Jehova na pilim olsem ol bratasista i amamas long ol i stap wantaim ol? Mariusz, em i wasman bilong wanpela kongrigesen long Polan, em i tok: “Ol elda i mas toktok oltaim wantaim ol yangpela. Ol i no ken toktok tasol long taim ol yangpela i gat hevi, nogat. Ol i mas toktok wantaim ol long taim ol i autim tok, na bihain long miting, na long ol narapela taim tu.” Askim ol yangpela, ol i gat wanem tingting long kongrigesen. Dispela kain pasin bilong toktok gut wantaim ol bai helpim ol yangpela long pas gut wantaim kongrigesen na ol i pilim olsem ol i insait tru long en.

Sapos yu wanpela elda, orait olsem wanem? Yu wok strong long save gut long ol yangpela long kongrigesen bilong yu? Albert, em yumi bin stori long em long pastaim, nau em i holim wok elda tasol em i bin bungim sampela hevi long taim em i bin i stap tineja. Em i tok: “Taim mi bin i stap yangpela man, mi bin laik tru bai wanpela elda i mekim sepeding visit long mi.” Na ol elda inap beten long ol yangpela i ken i stap gut long ol samting bilong spirit, na long dispela rot ol i soim ol yangpela olsem ol i tingim ol na i laik helpim ol.​—2 Ti. 1:3.

I gutpela long ol yangpela i insait long ol wok samting bilong kongrigesen. Sapos ol i no mekim olsem, ating ol bai tingting long putim ol wok bilong graun olsem mak bilong winim. Olsem wanem? Yupela ol lain i gat bikpela krismas, yupela inap wok wantaim ol long autim tok na kamap pren bilong ol? Long taim bilong malolo, lusim hap taim wantaim ol yangpela na bai ol i pilim olsem ol inap bilip long yu na save olsem yu laik i stap pren bilong ol. Jola i tok: “Wanpela painia sista i soim olsem em i tingim mi. Taim mi bin i go autim tok wantaim em, dispela em namba wan taim we mi yet i bin amamas long mekim olsem.”

Em Samting Bilong Yu Yet Long Makim

Yupela ol yangpela, askim yupela yet: ‘Mi putim wanem ol mak bilong winim? Sapos mi no baptais yet, mi putim dispela olsem mak bilong winim?’ Dispela tingting bilong yu long kisim baptais i mas kirap long bel, olsem yu laikim tumas Jehova long bel olgeta bilong yu, na i no olsem yu ting yu mas bihainim pasin bilong famili.

Tru tumas, mipela i laik bai Jehova i stap Pren tru bilong yu, na yu tingim tok i tru olsem gutpela samting tru yu holim. Long rot bilong profet Aisaia, Jehova i tokaut olsem: “Yupela i no ken pret, long wanem, mi God bilong yupela na mi stap wantaim yupela.” Jehova bai stap wantaim yu sapos yu stap pren bilong em. Em bai i strongim yu na ‘was gut long yu long bikpela strong bilong em.’​—Ais. 41:10.

[Futnot]

[Piksa long pes 4]

Luksave long tingting i stap long bel bilong pikinini

[Piksa long pes 6]

Tingting bilong kisim baptais i save kirap long bel, taim man i laikim tumas Jehova