Askim
◼ Olsem wanem yumi mas mekim ol wok insait long kongrigesen?
Ol wok long ol kongrigesen bilong lain bilong Jehova i kamap gutpela, long wanem, ol bratasista i save wok gut wantaim. (1 Ko. 14:33, 40) Tingim ol samting ol i save mekim bilong redim wanpela miting bilong kongrigesen. Ol bratasista i save redim miting, na tu, ol i save mekim planti wok paslain na bihain long miting. Sampela narapela wok ol bratasista i save mekim na ol man i no lukim, ol dispela wok tu i bikpela samting. Olsem wanem yumi olgeta inap helpim ol dispela wok?
Redi long mekim wok. Ol man i amamas long mekim wok ol bai i gat planti wok long mekim. (Sng. 110:3, NW ) Ol i mas tingim ol man i gat sik na ol lapun. Helpim wok bilong klinim Haus Kingdom. Yumi inap mekim planti gutpela wok na yumi no ken wet long wanpela i askim yumi long mekim. Yumi mas i gat laik long mekim.
Mekim wok long pasin daun. Ol man i gat pasin daun ol i amamas long helpim ol narapela. (Lu. 9:48) Pasin daun bai helpim yumi na yumi no kisim planti wok tumas na bihain yumi no inap mekim. Na tu, pasin daun bai helpim yumi na yumi no mekim ol samting em yumi no gat namba long mekim.—Snd. 11:2.
Stap olsem man ol narapela i ken bilip long em. Long Israel bilong bipo, ol i kirapim Moses long makim ol man em ‘ol inap bilip long ol’ na bai ol i stap lida bilong ol. (Kis. 18:21) Long nau tu i mas i gat ol man i gat dispela pasin. Yu mas mekim gut olgeta wok yu kisim. (Lu. 16:10) Sapos yu no inap mekim wanpela wok bilong yu, orait yu mas stretim rot bilong narapela i ken mekim dispela wok.
Givim bel tru long mekim wok. Ol Kristen i mas givim bel olgeta long mekim wok bilong ol na long wok skin bilong ol tu. (Kl. 3:22-24) Yumi mas mekim olsem moa yet taim yumi mekim wok bilong helpim lotu i tru. Maski wanpela wok yumi mekim i no gat nem, kongrigesen i kisim helpim taim yumi mekim gut dispela wok.
Olgeta wan wan wok yumi mekim i givim rot long yumi long kamapim long ples klia olsem yumi laikim Jehova na ol brata bilong yumi. (Mt. 22:37-39) Olsem na yumi mas mekim gut ol wok ol i givim yumi.