Namba 6 Hap—Mekim Ol Baibel Stadi i Save Helpim Ol Man
Taim Sumatin i Givim Askim
1 Taim sumatin i kirap stadi long olgeta wik, no ken stori nabaut nabaut long ol narapela narapela tok bilong Baibel. Yu mas stori gut long wanpela tok na bihain stori long narapela. Dispela bai helpim sumatin long kisim stretpela save na long kamap strong long ol samting bilong spirit. (Kl. 1:9, 10) Tasol sampela taim ol sumatin bai kamapim askim long sampela samting long taim bilong stadi. Yu ken mekim wanem taim kain samting olsem i kamap?
2 Bihainim Gutpela Tingting: Ol askim sumatin i kamapim long ol samting i insait long stadi yu ken bekim long taim em i kamapim. Sapos ol narapela sapta long buk yupela i stadi long en bai kamapim bekim bilong askim bilong sumatin, orait toksave long em long dispela. Tasol sapos wanpela askim sumatin i kamapim i no insait long samting bilong stadi, o yu mas mekim wok painimaut bilong kisim bekim bilong en, orait i gutpela yu bekim askim bilong em long taim stadi i pinis o long narapela taim. Sampela pablisa i luksave olsem taim ol i raitim ol askim sumatin i kamapim, dispela i save strongim bel bilong sumatin olsem pablisa i tingim dispela askim bilong em, na tu, long dispela rot pablisa i no larim dispela askim i pulim ol long toktok long sampela narapela samting.
3 Ol buk samting bilong stadi wantaim ol man long en i no kamapim olgeta tok Baibel i mekim long ol wan wan bilip bilong Baibel. Tasol olsem wanem sapos sumatin i hatwok long kisim wanpela bilip o em i holim strong wanpela bilip giaman? I gutpela long skelim ol narapela buk samting i stori gut long tok Baibel i mekim long dispela samting. Sapos sumatin i holim yet dispela bilip, orait no ken stori moa long dispela inap sampela taim bihain na wok long mekim yet stadi bilong em. (Jo. 16:12) Taim em i kisim save moa long Baibel na em i wok long kamap strong long ol samting bilong spirit, em bai kliagut long dispela tok bilong Baibel.
4 Mekim Pasin Daun: Sapos yu no save long bekim bilong askim sumatin i kamapim, orait no ken kamapim tingting bilong yu yet. (2 Ti. 2:15; 1 Pi. 4:11) Tokim em olsem yu bai mekim wok painimaut long askim bilong em pastaim na bihain bai yu kamapim bekim bilong en. O yu ken skulim sumatin long pasin bilong mekim wok painimaut bilong em yet. Yu mas wok long soim em long olsem wanem em i ken yusim ol buk samting em oganaisesen bilong Jehova i kamapim. Long dispela rot em yet inap long painim bekim bilong ol askim bilong em.—Ap. 17:11.