Pas i Kam Long Gavening Bodi
YUMI stap klostu tru long nupela taim, olsem na em i bikpela samting long yumi mas wetim Jehova. (Sef. 3:8) Profet Daniel i bin tok olsem ‘God i save kamapim as bilong ol samting i hait, na em i soim ol samting bai i kamap bihain.’ (Dan. 2:28) Yumi ken amamas olsem yumi stap long pinis bilong dispela taim Daniel i tok profet long en na yumi kisim mining bilong ol tok hait Jehova i wok long kamapim long nau!
Long rot bilong “wokboi i gat gutpela tingting,” isi isi Jehova i bin kamapim laik bilong em long bungim wanpela bikpela lain bilong olgeta hap em ol i lotuim em nau long dispela taim bilong “las de.” (Mt. 24:45; KTH 7:9; 2 Ti. 3:1) Aisaia 2:2, 3 i tok “wanpela taim bai i kamap bihain” na ol dispela samting bai kamap. Long olgeta wan wan yia, dispela wok bilong bungim ol man i go yet maski ol pasin nogut na pait i pulap long dispela graun.
Long 2004, yumi bin tingim moa yet olsem yumi mas bihainim tok bilong Jisas: “Was gut. Yupela . . . i mas redi.” (Mt. 24:42, 44) Tru tumas, ol samting i wok long kamap long graun i gat bikpela mining long ol Kristen, ol i luksave long “ol mak bilong dispela taim nau” na ol i kirap mekim samting. (Mt. 16:1-3) Bilong truim Tok Bilong Em, Jehova bai wok yet wantaim lain bilong em, em ol i bihainim pasin tiokratik, maski ol man i biruaim ol.
Maski sampela i laik pasim o stopim wok bilong autim tok bilong Kingdom, ol brata bilong yumi ol i wok yet long autim tok i tru na bung wantaim. (Ap. 5:19, 20; Hi. 10:24, 25) Long Rasia long Jun 2004, wanpela kot bilong apil long Moscow i tok disisen bilong narapela kot i stret taim ol i tambuim wok bilong ol Witnes Bilong Jehova na tokim ol long pinisim koporesen bilong ol long Moscow. Tasol ol brata i no givap; ol i save long wok Jehova i laik bai ol i mekim, na ol i bihainim tok bilong Em, tok bilong ol man nogat. (Ap. 5:29) Yumi bilip tru olsem Jehova bai soim rot long ol wokboi bilong em maski ol kot i laik mekim nogut long ol.
Inap sampela yia nau long Ripablik Bilong Jojia, ol man i bin kisim ol samting bilong ol brata, paitim ol, na kukim ol buk na nius bilong ol. Tasol i no gat wanpela samting inap pasim ol bratasista. (Ais. 54:17) Long sevis yia bilong 2004, gavman bilong Jojia i orait gen long rejistaim ol Witnes Bilong Jehova olsem wanpela lotu. Ol i mekim ol kibung na ol man i no traim long pasim ol, na i no gat hevi long salim ol buk samting i go long ol. Namba bilong ol pablisa na namba bilong ol man i kam long Memorial i go antap.
Long Amenia, Eritrea, Ripablik Bilong Korea, Ruanda, na Turkmenistan, ol i bin kalabusim sampela brata, long wanem, ol i holimpas bilip bilong ol. Ol man i mekim nogut long ol, tasol ol brata i save long tok bilong Baibel i stori long as bilong ol dispela hevi, na dispela i helpim ol long bihainim yet laik bilong Jehova na wetim Em long kisim bek ol.—1 Pi. 1:6; 2 Pi. 2:9.
Taim yu skelim Ripot Bilong 2004 Sevis Yia long Wastaua bilong Februeri 1, 2005, bai yu amamas long gutpela pasin bilong Jehova. (Sng. 31:19; 65:11) Mipela i laik bai dispela ripot i ken strongim yupela long bihainim yet ol pasin i save amamasim God.—1 Te. 4:1.
Mipela i wok hat tru long helpim kain kain man long kisim tok i tru. Olsem: Mipela i wokim ol vidio, ol DVD, na ol narapela samting long tok ples sain bilong ol yaupas na mipela i bin redim ol buk samting long rait Brel bilong helpim ol yaupas na aipas long ol samting bilong spirit. Planti pablisa i bin lainim ol tok ples bilong ol man bilong ol narapela kantri, em ol i kam sindaun long hap bilong kongrigesen bilong ol.
Na tu, i gat planti handet grup i kamap long ol hap i stap longwe na i hatwok long i go long en. Wanpela brens i gat moa long 300 kain grup olsem na winim 7,000 pablisa i stap long ol dispela grup. Long dispela rot planti nupela kongrigesen inap kamap! Na 16,760,607 manmeri i bin kam long Memorial long 2004 sevis yia, winim 10 milion bilong ol dispela manmeri ol i no Witnes Bilong Jehova. Dispela i makim olsem kaikai i mau pinis na yumi mas wok long kisim.
Yumi tenkyu long Jehova long ol gutpela blesing em i givim long yumi na long gutpela pasin bilong em long lukautim yumi long olgeta de. (Snd. 10:22; Mal. 3:10; 1 Pi. 5:7) Taim yumi wanbel na mekim wok i go nau long dispela taim bilong pinis, yumi bilip tru long Jehova. Maski wanem kain hevi i painim yumi, yumi laik tingim tru yiateks bilong yumi bilong 2005: “Jehova em i helpim bilong mi.” (Sng. 121:2, NW ) Mipela i laikim yupela tru na mipela i beten bilong helpim yupela.
Mipela ol brata bilong yupela,
Gavening Bodi Bilong Ol Witnes Bilong Jehova