2005 “Bihainim Tok Bilong God” Kibung Distrik Bilong Ol Witnes Bilong Jehova
1 Olsem Nambawan Bikpela Tisa bilong yumi, Jehova i stretim rot bilong yumi long bung wantaim bambai yumi skul long ol pasin bilong em. (Ais. 30:20, 21; 54:13) Em i save mekim olsem long rot bilong wokboi i gat gutpela tingting, em ol i save stretim rot bilong ol kain bung olsem ol kibung distrik i save kamap long olgeta yia. (Mt. 24:45-47) Yumi gat wankain tingting olsem Devit, em i tok: “Bai mi litimapim nem bilong yu, God, namel long ol manmeri i bung bilong lotu.” (Sng. 26:12) Devit i luksave olsem em i bikpela samting long kisim skul long Jehova na em i wok strong long i stap namel long ol lain bilong Jehova taim ol i bung wantaim.
2 Inap 8,154 manmeri i bin kam bung long 8-pela “Wokabaut Wantaim God” kibung distrik i kamap long Papua Niugini las yia. Olsem wanem? Yu bai stap namel long “ol manmeri i bung” long “Bihainim Tok Bilong God” Kibung Distrik long dispela yia? Na yumi laik bai planti manmeri moa i kam bung, a? Sapos olsem, orait dispela tok bai helpim yu long redim ol samting paslain bambai yu ken i go long kibung.
3 Stretim Ol Samting Bilong Yu Ken i Go Long Tripela De: “Ol man bilong wok ol i save tingting gut na mekim wok, olsem na wok bilong ol i kamap gutpela.” (Snd. 21:5) Ol dispela tok i kamapim klia olsem em i bikpela samting long stretim ol samting paslain bambai yu inap i go long kibung, a? Bilong yu ken i stap long tripela de bilong kibung na kisim ol tok bilong spirit bilong strongim yu, i gutpela yu kirap nau na stretim ol samting na bai yu ken i go long tripela de bilong kibung.
4 Nau em i gutpela taim bilong kirap bungim mani bilong i go long kibung. Tru, i hatwok long painim mani bilong i go long kibung distrik i kamap longwe. Na i mas i gat mani tu bilong baim ples slip na kaikai long taim bilong kibung, na tu, yu mas i gat mani bilong putim long bokis kontribiusen long kibung. Yu ken mekim wanem? I gutpela yu ken stretim tok wantaim olgeta insait long famili long mekim sampela samting bilong bungim mani bilong i go long kibung distrik. Sampela famili i save lukautim kakaruk na bai ol i ken salim bilong kisim mani bilong i go long kibung. Sampela i save kisim pis na sampela narapela i save planim kaikai samting na bai ol i ken salim bilong kisim mani bilong i go long kibung. Tasol bikpela samting em yupela i mas kirap nau long redi na mekim ol samting bambai famili olgeta i ken i go long “Bihainim Tok Bilong God” Kibung Distrik.
5 Sapos yu mas askim bos bilong yu long kisim malolo, o yu mas toktok wantaim poroman marit bilong yu husat i no wanpela Witnes, orait no ken wet i go inap long taim i kam klostu bilong i go long kibung na yu mekim. Wanem ol hevi yu karim, beten long Jehova long ol dispela hevi, na yu ken bilip tru olsem long rot bilong helpim bilong em, “em bai i mekim ol dispela samting i kamap gutpela.” (Snd. 16:3) Na tu, i gutpela yu helpim Baibel sumatin bilong yu long redim ol samting na bai em tu i ken i go long dispela tripela de bilong kibung.
6 Helpim Ol: Pol i stori long sampela brata olsem ol i ‘helpim em gut tru.’ (Kl. 4:7-11) Wanpela rot ol i helpim Pol long en em long ol samting bilong skin. Olsem wanem yu ken ‘helpim gut tru’ ol narapela long ol samting bilong kibung? Ating i gat sampela i mas kisim helpim long trenspot o ples slip, olsem ol pablisa i lapun, ol lain i gat sik, ol lain i insait long fultaim sevis, na sampela narapela i gat hevi. Ol famili bilong ol i mas go pas long helpim ol long ol dispela samting. (1 Ti. 5:4) Tasol sapos ol i no inap long mekim olsem, orait ol wanbilip bilong ol i ken helpim ol. (Jem. 1:27) Ol wasman bilong Buk Stadi i mas toktok wantaim ol lain long grup bilong ol em ol i mas kisim helpim na bai ol elda i ken save olsem ol samting ol dispela brata o sista i mekim bilong redi long kibung i orait o nogat.
7 I Mas i Gat Ol Volantia: Jisas i stap gutpela piksa long pasin bilong daunim laik bilong em yet na tingim ol narapela. (Lu. 9:12-17; Jo. 13:5, 14-16) Ol lain i amamas long wok olsem volantia long ol kibung, ol tu i kamapim klia dispela wankain laik. Bihain, klostu moa long taim bilong kibung, ol Komiti Bilong Kibung bai stretim ol samting bilong ol kibung, na ol bai singautim ol narapela brata long mekim wok long ol dipatmen bilong kibung. I mas i gat ol elda em ol i amamas na redi long mekim ol wok ol i kisim. Pasin bilong ol long amamas long wok i stap olsem gutpela piksa long olgeta insait long kongrigesen i ken bihainim.—1 Pi. 5:2, 3.
8 Long rot bilong “bosboi i gat gutpela tingting,” God Jehova i bin stretim rot bilong ol lain bilong em long bung wantaim bilong kisim ol samting bilong spirit long ol kibung distrik bilong yumi i save kamap long olgeta yia. (Lu. 12:42) Tru yu mas wok strong bilong redim ol samting paslain long taim bilong kibung na bai yu ken i go long tripela de bilong kibung tasol hatwok bilong yu i no inap lus nating. Dispela “Bihainim Tok Bilong God” Kibung Distrik bai strongim yumi long stap gut long Jehova long nau na i go inap oltaim oltaim. Yumi mas wok strong long bihainim tok bilong man bilong raitim song, em i tok: “Yumi manmeri bilong God, yumi bung pinis, orait yumi mas litimapim nem bilong God.”—Sng. 68:26.
[Blok long pes 5]
2005 “BIHAINIM TOK BILONG GOD” OL HAP BILONG KIBUNG DISTRIK
NOVEMBA 18-20
PORT MORESBY (Tok Inglis tasol), Assembly Hall of Jehovah’s Witnesses, Gerehu.
NOVEMBA 25-27
ALOTAU (Tok Inglis tasol), Kingdom Hall of Jehovah’s Witnesses.
WEWAK (Tok Pisin tasol), Kingdom Hall of Jehovah’s Witnesses.
DISEMBA 2-4
AGI (Tok Hiri Motu tasol), Kingdom Hall of Jehovah’s Witnesses.
KIUNGA (Tok Pisin tasol), Kingdom Hall of Jehovah’s Witnesses.
DISEMBA 9-11
BANZ (Tok Pisin tasol), Kingdom Hall of Jehovah’s Witnesses.
PORT MORESBY (Tok Pisin na tok ples sain bilong ol yaupas), Assembly Hall of Jehovah’s Witnesses, Gerehu.
DISEMBA 16-18
LAE (Tok Pisin tasol), Lae International School Sports Pavilion, Buimo Rd.
PORT MORESBY (Tok Hiri Motu tasol), Assembly Hall of Jehovah’s Witnesses, Gerehu.
RABAUL (Tok Pisin tasol), Maltec High School.
This article has been taken partly from km-E 12/04 “2005 ‘Godly Obedience’ District Convention of Jehovah’s Witnesses”