Pas i Kam Long Gavening Bodi
“GOD Papa bilong yumi, wantaim Bikpela Jisas Krais, i ken marimari long yupela na mekim bel bilong yupela i stap isi.” Dispela em tok Pol i bin mekim wok long en bilong tok gude long ol kongrigesen taim em i raitim pas long ol. Mipela tu i laik bai wankain samting i painim yupela.—Ef. 1:2.
Yumi pilim tru gutpela pasin marimari Jehova i bin mekim long yumi long rot bilong ofa bilong Krais Jisas! Long rot bilong dispela ofa, yumi inap i stap gut long ai bilong God. Tasol i no long strong bilong yumi yet na yumi inap i stap gut olsem, maski yumi givim bel long stadi, autim tok, o mekim ol narapela gutpela wok. Long rot bilong Jisas Krais, God i lusim rong bilong yumi na wokim rot bilong yumi i ken kisim laip oltaim, na dispela i no olsem pe yumi kisim long wok yumi mekim, nogat. Dispela i olsem presen i kamapim marimari bilong Jehova long yumi.—Ro. 11:6.
Pol i raitim pas long ol wanbilip bilong em, na em i tok: “Mipela i tok strong long yupela olsem, ‘Yupela i kisim pinis marimari bilong God, na nogut yupela i lusim nating marimari bilong em.’ God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.” Paslain long bagarap i painim Jerusalem long taim bilong ol aposel, i gat hap “taim bilong God i mekim gut” long ol man. Dispela i mekim na Jehova i kisim bek ol dispela man i laikim em na i stap gut long em, em ol i bin ranawe lusim Jerusalem paslain long em i bagarap long yia 70 C.E.—2 Ko. 6:1, 2.
Long nau tu, yumi stap long “taim bilong God i mekim gut long yumi” na “kisim bek yumi.” Ol man em Jehova i orait long ol olsem wokman bilong em na em i mekim gut long ol, ol inap abrusim bagarap long “De bilong Bikpela” em klostu nau bai kamap.—Sef. 1:14.
De bilong Jehova i wok long i kam klostu na yumi gat bikpela wok. Yumi gat wok bilong toksave long ol man long dispela de, na tu, helpim ol man i gat gutpela bel long kisim marimari bilong Jehova na bai ol tu i ken abrusim bagarap. Pol i save olsem dispela wok i bikpela wok tru. Em i tok: “Sapos mi no autim gutnius, bai mi stap nogut tru.” Na tu, em i kamapim tingting bilong em taim em i tok: “God i givim mi wok bilong helpim . . . ol saveman na ol man i no gat save tu. Olsem na bel bilong mi i kirap long autim gutnius.”—1 Ko. 9:16; Ro. 1:14, 15.
Yumi bai i gat asua long ai bilong Jehova sapos yumi no mekim dispela wok bilong toksave long ol manmeri. Yumi save long tok Jehova i mekim long profet Esekiel, em i tok: “Man bilong graun, mi mekim yu i kamap wasman bilong ol Israel. Taim mi gat strongpela tok bilong autim long ol, orait bai mi givim yu, na yu mas autim long ol. Sapos mi lukim wanpela man i mekim pasin nogut na mi tok, em i mas i dai, orait yu mas toksave long em. Yu mas tokim em long senisim tingting na pasin bilong em na bai em i no ken lus. Sapos yu no tokim em, orait bai sin bilong en i stap olsem tasol, na em bai i dai. Tasol long ai bilong mi em i asua bilong yu tasol na em i dai.”—Ese. 3:17, 18.
Nau em taim bilong las de na i gat planti hevi. Em hatwok long mekim ol wok bilong kongrigesen, wok autim tok, ol samting bilong helpim famili, na wok mani. Na tu, planti bilong yupela i mas karim hevi bilong sik, bel hevi, i go lapun, na hevi bilong ol man i birua long yupela. Planti bilong yupela i “karim ol bikpela hevi.” Mipela i laik strongim yupela olsem tok Jisas i mekim: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” (Mt. 11:28) Mipela i laik mekim gutpela tok amamas long yupela olgeta i wok strong long mekim yet wok bilong Jehova maski yupela i karim ol bikpela o liklik hevi.
Yupela i bin givim bel tru long autim tok na skulim ol man na Jehova i bin blesim wok bilong yupela, olsem na long olgeta wan wan wik 4,762 manmeri i save kisim baptais. Long sevis yia i go pinis, i gat 1,375 nupela kongrigesen i kamap. Mipela i beten long Jehova olsem dispela nupela buk Tru Tru Baibel i Tok Wanem?, em nau i stap long 120 tok ples, bai helpim planti milion manmeri long kisim marimari na bel isi i kam long Jehova nau long dispela “taim bilong God i kisim bek yumi.”
Yupela i ken save tru olsem Gavening Bodi i laikim yupela tru na mipela i save beten long God i helpim yupela. Na tu, mipela i tenkyu long yupela i save beten bilong helpim mipela.
Mipela ol brata bilong yupela,
Gavening Bodi Bilong Ol Witnes Bilong Jehova