Ol Miting Bilong Wok

Wik i Kirap Long Mas 13

Singsing 41

10 min: Ol toksave bilong kongrigesen. Sampela Toksave bilong Wok Kingdom. Mekim wok long ol tok i stap long laspela pes o ol narapela tok i stret long hap bilong yupela, na mekim soim long pasin bilong tilim Wastaua bilong Februeri 15 na Awake! bilong Februeri. Long pinis bilong wan wan soim, pablisa i mas mekim wok long pepa bilong singautim man i kam long Memorial.

15 min: “Helpim Ol Narapela na Bai Ofa Bilong Krais i Ken Helpim Ol.”a Tok i kamap bihain long dispela bai stori moa long olsem wanem yumi ken mekim wok long p. 206-8 bilong buk Baibel i Tok taim yumi singautim ol man i kam long Memorial.

20 min: Kaikai Bilong Bikpela​—⁠Wanpela Bung i Litimapim Nem Bilong God. Toktok wantaim ol bratasista na kamapim ol askim long ol tok i stap long p. 206-8 bilong buk Baibel i Tok. Mekim kirap bilong tok i no winim wanpela minit na soim olsem wanem yumi ken kirap stori long dispela bung long man bilong haus long rot bilong ritim namba wan paragraf. Orait nau singautim odiens long bekim ol dispela askim, no ken ritim ol paragraf: (par. 2) Long wanem de Jisas i kamapim Memorial bilong tingim indai bilong em? (par. 3) Hamas taim long wanpela yia ol i mas mekim bung bilong Kaikai Bilong Bikpela? (par. 4) Baibel i stori olsem wanem long dispela bung bilong Memorial? (par. 5) Olsem wanem yumi save Jisas i no bin tanim bret i kamap bodi tru bilong em, na wain i kamap blut tru bilong em? (par. 6) Bret i no gat yis i makim wanem samting? (par. 7) Retpela wain i makim wanem samting? (par. 8) Husat tasol i kisim bret na wain? (par. 9) Long wanem de Memorial i kamap long olgeta yia? Bilong wanem yumi mas go long Memorial? Stori long sampela bikpela skripsa. Kirapim ol bratasista long stadi long ol dispela tok wantaim ol Baibel sumatin na ol narapela em ol i singautim ol i kam long Memorial. Ol i ken mekim olsem long rot bilong ritim ol paragraf, stori long ol bikpela tok, na kamapim ol askim olsem i stap long dispela hap.

Singsing 134 na beten.

Wik i Kirap Long Mas 20

Singsing 18

10 min: Ol toksave bilong kongrigesen. Riviu long ol bikpela tok bilong blok “Ol Samting Bilong Tingim Long Memorial.”

23 min: Kliagut Long Wok God i Givim Long Krais. Wanpela tok i kam long buk Oganaisesen Bilong Mekim Laik Bilong Jehova, p. 11-14. Taim yu stori long par. 1 na 2 aninit long het tok “Wok Bilong Krais,” inap 3-pela o 4-pela minit toktok long pasin bilong mekim wok long pepa bilong singautim ol man i kam long Memorial. Kamapim sampela tok bilong Wok Kingdom bilong Februeri 2006, p. 3, par. 3.

12 min: Kisim Strong Long Rot Bilong Skelim Tok Bilong Baibel Long Olgeta De. Wanpela tok na toktok wantaim ol bratasista long tok i go pas long buklet Skelim Sampela Tok Bilong Baibel Long Olgeta De​—⁠2006. Stretim rot bilong wanpela famili i mekim soim long pasin bilong skelim teks bilong dispela de wantaim stori bilong en.

Singsing 103 na beten.

Wik i Kirap Long Mas 27

Singsing 44

15 min: Ol toksave bilong kongrigesen. Kirapim ol pablisa long putim ripot bilong autim tok bilong Mas. Ripot bilong ol akaun. Sapos kongrigesen i bin salim sampela kontribiusen i go long brens na brens i bin tok tenkyu long dispela, orait kamapim dispela tok tenkyu long kongrigesen. Mekim wok long ol tok i stap long laspela pes o ol narapela tok i stret long hap bilong yupela, na mekim soim long pasin bilong tilim Wastaua bilong Mas 1 na Awake! bilong Februeri. Na tu, soim olsem wanem ol bratasista i ken mekim wok long pepa bilong singautim ol man i laik harim tok long kam long Memorial.

10 min: Sampela tok bilong helpim kongrigesen.

20 min: “Skulim Ol Man i Gat Pasin Daun Long Wokabaut Long Rot God i Makim.”b Kamapim sampela tok bilong Wastaua, Julai 1, 2004, p. 16, par. 9.

Singsing 170 na beten.

Wik i Kirap Long Epril 3

Singsing 199

15 min: Ol toksave bilong kongrigesen. Kamapim sampela tok long “Amamas Long Stadi Long Buk Tru Tru Baibel i Tok Wanem?” Stori long sediul bilong stadi long buk Baibel i Tok. Na tu, soim olsem wanem ol bratasista i ken mekim wok long pepa bilong singautim ol man i laik harim tok long kam long Memorial.

10 min: “Pas i Kam Long Gavening Bodi.” Wanpela brata i save gut long rit em i ken ritim pas na sapos i gat taim stori long sampela bikpela tok.

10 min: Yu Ting God i Bosim Yet Ol Samting? Wanpela tok na soim long laspela pes bilong Wastaua bilong Epril 1, 2006. Long olgeta taim rot i op, singautim ol man i kam long spesel pablik tok. Singautim olgeta Baibel sumatin bilong yu na famili bilong ol, maski ol i no save sindaun long Baibel stadi. Singautim olgeta man yumi save long ol em ol i amamas long harim tok, na ol narapela man yumi save bungim long teritori long kam long spesel pablik tok. Mekim soim long pasin bilong mekim wok long Wastaua bilong Epril 1, taim yu singautim wanpela i no save autim tok moa o i no kam moa long ol miting.

10 min: Sampela ekspiriens. Askim odiens long kamapim sampela ekspiriens nau tasol ol i bin kisim. Stori long sampela Baibel stadi ol i bin kirapim. Ol i ken mekim soim long wanpela o tupela gutpela ekspiriens.

Singsing 93 na beten.

[Ol Futnot]