Putim Gut Yau
1 Bilong putim gut yau long tok, man i mas bosim gut skin. Na tu, em i mas i gat laik long lain na kisim helpim long ol tok em i harim. Jisas i tok, yumi mas tingim pasin bilong yumi long “harim gut tok.”—Lu. 8:18.
2 Yumi mas putim gut yau taim yumi go long ol miting bilong kongrigesen, ol kibung sekit, ol bikpela de kibung, na ol kibung distrik. (Hi. 2:1) Long daunbilo i gat sampela tok bilong helpim yu long putim gut yau long ol tok i kamap long ol dispela bung Kristen.
◼ Pilim tru ol gutpela helpim yumi save kisim long ol miting. Ol miting i wanpela bikpela rot we Jehova i “skulim” yumi long rot bilong “bosboi i gat gutpela tingting.”—Ais. 54:13; Lu. 12:42.
◼ Redi gut pastaim. Redim ol tok bai kamap long ol miting, na kisim Baibel na ol buk bilong stadi i kam wantaim yu.
◼ Long taim bilong miting, wok strong long putim gut yau. No ken toktok wantaim ol man i sindaun klostu long yu, na no ken lukluk long samting ol narapela i mekim. No ken tingting long ol samting yu bai mekim bihain long miting o ol narapela samting bilong yu yet.
◼ Skelim ol tok i kamap. Askim yu yet: ‘Olsem wanem mi ken bihainim dispela tok? Long wanem taim bai mi bihainim?’
◼ Raitim sotpela tok bilong ol bikpela poin na ol skripsa. Dispela bai helpim yu long putim tingting long ol tok ol brata i kamapim, na dispela bai helpim yu long tingim gen ol bikpela tok yu ken mekim wok long en long bihain.
3 Skulim Ol Pikinini Long Putim Gut Yau: Ol pikinini i mas lain long ol tok bilong God. (Lo 31:12) Long Israel bilong bipo, taim pris i kaunim Lo, “ol pikinini inap long putim yau gut na kisim save long tok,” ol tu i gat wok long harim gut. (Neh. 8:1-3) Sapos ol papamama i insait tru long ol miting na putim gut yau, ating ol pikinini bilong ol tu bai mekim wankain samting. Em i no gutpela tingting long larim ol pikinini i bringim ol toi na ol buk bilong droim piksa i kam long ol miting bilong amamasim ol. Pasin bilong i go i kam nating long toilet, em tu i no helpim ol long putim gut yau long ol tok. “Ol pikinini i save mekim olkain longlong pasin,” olsem na ol papamama i mas wok strong long mekim ol samting bambai ol pikinini bilong ol i ken sindaun gut na harim gut ol tok bilong miting.—Snd. 22:15.
4 Taim yumi putim gut yau long tok, yumi kamapim klia olsem yumi gat gutpela tingting na yumi laik “kisim save moa yet.”—Snd. 1:5.
This is a repeat of article in km 1/01 taken from km-E 1/01 “Be a Good Listener.”