Pas i Kam Long Gavening Bodi
YUMI bihainim pasin bilong Jisas na beten strong long God olsem: “Nem bilong yu i mas i stap holi.” Strongpela laik bilong yumi long bihainim tok bilong dispela beten i kamap ples klia long pasin yumi bihainim long i stap bilong yumi olsem ol Witnes Bilong Jehova. I no olsem yumi save long nem bilong God na em tasol, nogat, yumi mas mekim sampela samting moa. Yumi mas litimapim dispela nem long olgeta taim rot i op long mekim. Tru tumas, nambawan gutpela samting yumi holim em dispela nem olsem wanpela Witnes Bilong Jehova.—Mt. 6:9; Ais. 43:10.
Olsem i stret wantaim tok bilong Song 110:3 (NW ), ol manmeri bilong Jehova i amamas tru long givim ol yet long mekim dispela wok Jehova i tok ol i mas mekim. Bilong wanem ol man i gat kain kain krismas na sindaun i givim bel long mekim wok autim tok? Nambawan as na ol i mekim olsem, em pasin bilong ol long laikim tru God na givim bel olgeta long em. Tok bilong Lo 6:5, 6 i kirapim yumi long laikim Jehova long bel, tingting, na strong olgeta bilong yumi. Dispela pasin laikim yumi pilim tru long bel i kirapim yumi long yusim taim, strong, na ol samting bilong yumi bilong mekim wok bilong Kingdom Bilong God i go bikpela. Wanpela rot bilong mekim olsem, em yumi ken mekim wok autim tok inap tru long skel bilong yumi.
Jehova i laikim tru ol manmeri na dispela i as na em i stretim rot bilong autim gutnius bilong Kingdom bilong em long olgeta hap bilong graun. Em i no laik bai wanpela man i kisim bagarap, nogat, em i laik bai olgeta man i tanim bel na lusim rot nogut ol i bihainim na kam long Man Bilong Wokim ol na bai ol inap kisim laip. (2 Pi. 3:9) Jehova i tok: “Tru tumas mi no save amamas long taim ol man bilong mekim sin, ol i dai. Mi save amamas long ol dispela man i givim baksait long pasin bilong sin na ol i stap gut.” (Ese. 33:11) Wok autim tok yumi mekim i kamapim ples klia long ai bilong ol man olsem Jehova i laikim tru ol manmeri bilong dispela graun. Dispela em i as na taim yumi insait long dispela bikpela wok, yumi amamas na belgut tru.
Pasin bilong yumi long laikim tru Jehova i save kamap ples klia long tingting yumi gat long Tok bilong em, em Baibel. Sapos yumi no gat Baibel, bai yumi no inap save long God na go klostu long em olsem Jems 4:8 i tok long yumi mas mekim. Na tu, yumi no inap save long as na yumi stap laip na wanem samting bai kamap bihain. Yumi no inap save tu olsem tumbuna bilong yumi Adam em i as bilong olgeta hevi i wok long painim yumi. (Ro. 5:12) Yumi no inap save tu long God i kamapim pasin laikim bilong em long rot bilong givim dispela nambawan Pikinini Man bilong em olsem ofa bilong baim bek yumi long sin. Long planti narapela narapela rot, Jehova i givim save na savetingting bilong em long yumi. Yumi amamas tru long gutpela presen em i givim long yumi, em Tok bilong em, em holi spirit bilong em i bin kamapim! Yumi kamapim klia olsem yumi amamas long dispela samting em i givim long yumi na dispela i kirapim yumi long makim haptaim bilong ritim, stadi, na tingim tingim long bel ol tok bilong em. (Ef. 5:15, 16; Sng. 1:1-3) Yumi no ken bel hevi long haptaim yumi lusim bilong ritim Tok Bilong God long olgeta de. Tasol pasin bilong yumi long laikim God i mas kirapim yumi long laikim Tok bilong em na dispela i mekim na yumi inap save gut long em, na tu, dispela i strongim pasin bilong yumi long laikim em.
Long rot bilong Baibel yumi kisim save olsem taim Adam i bin mekim sin long Jehova, em i bringim taim nogut i kam long olgeta tumbuna pikinini bilong em na long yumi olgeta wan wan na yumi stap nogut tru. Tasol God inap stretim rot bilong helpim ol manmeri na em i bin mekim olsem. Em i mekim ol samting na bai laik bilong em long dispela graun bai kamap tru.—Stt. 3:15.
Tru tumas, yumi olgeta wan wan i gat strongpela laik long mekim holi gutpela nem bilong God bilong yumi. Taim yumi wok long kisim save long gutpela God bilong yumi Jehova, dispela i kirapim yumi long wok gut wantaim em na oganaisesen bilong em long kamapim klia gutpela nem na laik bilong em long ol manmeri. Yumi ken bilip tru olsem em i tingim yumi na em bai blesim yumi nau na oltaim long nupela taim em bai kamapim bihain.
Mipela ol memba bilong Gavening Bodi i laik tok olsem mipela i laikim tru yupela ol brata na sista. Mipela i laik tok tu olsem, mipela i tingim tru pasin bilong yupela long yusim haptaim i stap yet bilong wok strong long autim gutnius long planti manmeri paslain long taim bilong ‘bikpela hevi tru’ i kamap. (KTH 7:14) Taim yupela i mekim olsem, yupela i givim rot long ol manmeri long kisim samting yupela i kisim pinis, em save long God na Krais i bringim man long laip oltaim.—Jo. 17:3.
Mipela Ol Brata Bilong Yupela,
Gavening Bodi Bilong Ol Witnes Bilong Jehova