Askim
◼ Ol papamama i mas was gut long wanem samting taim ol pikinini bilong ol i mekim wok autim tok?
I stret ol papamama Kristen i kisim ol pikinini bilong ol i go wantaim ol long autim tok, na lainim ol long autim gutnius bilong Kingdom long ol narapela. Taim ol papamama i mekim olsem ol i mas was gut long ol pikinini bilong ol, long wanem, samting nogut inap kamap long teritori maski ol i autim tok long ol teritori em ol i ting i gutpela. Nau long dispela taim bilong “planti hevi nogut tru” pasin bilong ol man long tingim ol yet na mekim pasin sem nogut tru i go bikpela, olsem na ol man i save bagarapim na mekim nogut long planti pikinini. (2 Ti. 3:1-5) Ol papamama i mas tingting stret na was gut long ol pikinini bilong ol na bai ol man bilong mekim ol pasin nogut i no ken bagarapim ol. Ol papamama i ken mekim wanem?
Baibel i givim gutpela tok long yumi mas was gut na tingting gut long wanem samting nogut inap kamap. (Snd. 22:3; Mt. 10:16) Tingting i stap long dispela tok hia i no bilong putim ol lo, tasol em i savetingting long ol papamama o wanpela man i bikpela pinis i ken wok wantaim wanpela pikinini taim em i mekim wok autim tok. Sapos tupela yangpela pablisa i wok wantaim, em i gutpela long papamama o wanpela man i bikpela pinis i ken putim ai long ol long olgeta taim. Taim ol pikinini i go bikpela na ol i kamapim olsem ol inap lukautim ol yet, nau papamama i ken skelim olsem ol i mas i gat man bilong was long ol o nogat.—Lukim Askim long Wok Kingdom bilong Disemba 1992.
Em i savepasin long was gut long taim yumi raun long ka, PMV, o wokabaut long rot. Pasin bilong was gut i save helpim man long abrusim birua o bagarap long rot na ol hevi na pen em inap kisim long dispela bagarap, na em i no inap tromoi mani bilong baim dokta na marasin, na long baim kompensesen o kot.
I stret long ol yangpela i “mas litimapim nem bilong Bikpela.” (Sng. 148:12, 13) Ol gutpela tok ol i kamapim na gutpela pasin bilong ol long taim ol i mekim wok bilong autim tok i kirapim tru tingting bilong ol man na i litimapim nem bilong Jehova. Ol papamama, yupela i mas helpim ol pikinini bilong yupela long mekim wok bilong autim gutnius long olgeta taim, na tu, long olgeta taim yupela i mas sambai na lukautim ol bambai ol samting nogut i save kamap long nau i no ken painim ol!
This is a repeat of article in km 1/99 taken from km-E 5/99 “Question Box”.