Go Oltaim Long Ol Miting—Yumi Mas Mekim
1 Ol famili Kristen i save go oltaim long ol miting bilong kongrigesen. Tasol ol samting yumi mas mekim long olgeta de inap givim hevi long yumi. Hia long Papua Niugini, ol man i stap long narapela narapela hap na hevi bilong ol i narapela narapela kain. Olsem wanem? Ol wok bilong lukautim haus, wok mani, wok gaden, maket, painim pis, o mekim homwok i wok long kisim taim em bipo yu bin yusim bilong lotuim Jehova? Taim yumi tingim ol samting olsem Jehova i save tingim, dispela bai helpim yumi long putim ol bikpela samting i stap namba wan.—1 Sml. 24:6; 26:11.
2 Long laik bilong em yet, wanpela man Israel i no bihainim tingting bilong Jehova na em i bungim paiawut long de Sabat. Ating em i ting em i wok long lukautim famili bilong em o em i ting em i liklik samting tasol. Tasol strafe Jehova i givim long em i soim olsem i no stret tru long mekim ol samting bilong skin long taim bilong mekim ol samting bilong lotu.—Nam. 15:32-36.
3 Winim Dispela Hevi: Planti i wok strong bambai ol samting olsem wok mani, wokim gaden, maket, na ol narapela kain wok olsem bilong helpim i stap bilong ol i no ken pasim ol long i go long ol miting. Sampela i bin winim dispela hevi long rot bilong toktok wantaim bos, pasim tok wantaim wanwok long senisim taim bilong wok, painim narapela wok mani i stret long sediul bilong ol, o lusim sampela samting bilong skin. Sampela i pasim tok strong long bel olsem long ol de bilong miting, ol bai sotim taim bilong wok gaden, maket, o painim pis na bai ol i gat taim bilong i go long miting. Tru tumas, taim yumi mekim ol dispela samting bilong tingim lotu i tru, God i save amamas.—Hi. 13:16.
4 Sampela taim, moa yet sapos kongrigesen i gat ol miting long nait, homwok inap kamap olsem wanpela hevi. Wanpela yangpela i tok: “Mi save mekim hap homwok paslain long ol miting na ol narapela homwok bihain long miting taim mi kam bek long haus.”
5 Bilong famili i ken kamap long miting long taim stret, ol i mas wok gut wantaim na stretim gut ol wok bilong lukautim ol samting long haus. (Snd. 20:18) Ol yangpela pikinini tu i ken lain long putim klos na redi i stap bilong lusim haus long taim stret famili i makim. Sampela famili i mas lusim haus paslain tru, long wanem, i hatwok long kisim PMV samting o ol i mas wokabaut longwe long kamap long Haus Kingdom. Pasin bilong papamama yet inap lainim ol pikinini olsem ol miting i bikpela samting.—Snd. 20:7.
6 Long nau ol samting i wok long i go nogut moa, olsem na em i bikpela samting tru long yumi mas i go oltaim long ol miting bilong kongrigesen. Yumi laik wok yet long bihainim tingting bilong Jehova na pasin bilong i go oltaim long ol miting i mas stap olsem wanpela samting yumi mas mekim.—Hi. 10:24, 25.
This is a repeat of article in km 2/04 taken from km-E 2/04 “Regular Meeting Attendance-A Priority”