Olsem Wanem Yumi Inap Helpim Ol Poroman Marit i No Witnes?
1 Ol poroman marit bilong planti wokboi bilong Jehova, ol i save mekim pasin pren long ol brata na ol i amamas long kongrigesen, tasol ol i no wok long kamap wanpela wokboi bilong God. Wanpela man marit i tok: “Taim mi tingim wok bilong go long ol haus na autim tok, dispela i olsem bikpela banis i pasim rot bilong mi.” Ating sampela i mekim ol pasin i no stret em ol i mas lusim, o ol i pilim olsem ol i no inap bihainim wankain sediul tiokratik olsem poroman marit bilong ol i save bihainim. Yumi inap helpim ol olsem wanem?
2 Soim Olsem Yu Tingim Ol: Taim yumi soim olsem yumi tingim ol narapela na luksave long ol samting ol i tingting long en, ating dispela bai opim rot long ol long harim tok i tru bilong Baibel. (Fl. 2:4) Ol manmeri em pastaim ol i no wanbel long bilip bilong ol poroman marit bilong ol, ol i save toktok long pasin ol Witnes i bin mekim bilong tingim ol. Dispela man marit em mipela i kamapim tok bilong em pastaim, em i tok: “José, wanpela elda long kongrigesen, em i bin mekim samting bilong tingim mi. Mi ting pasin bilong em long kirapim mi i mekim na mi kirap givim bel long stadi.” Narapela man marit i tingim pasin bilong ol brata i bin kam lukim em na ol i wok long toktok long ol samting em i laik toktok long en. Em i tok: “Dispela i helpim mi long senisim tingting bilong mi long lotu [bilong meri bilong mi]. Mi lukim olsem ol poroman bilong em i gat save na ol inap toktok long kain kain samting.”—1 Ko. 9:20-23.
3 Givim Helpim Long Ol: Ol poroman marit em ol i no Witnes ol inap pilim tru gutpela pasin ol brata i mekim bilong helpim ol. (Snd. 3:27; Ga. 6:10) Taim ka bilong wanpela man marit husat i no Witnes i bagarap, wanpela yangpela Witnes i helpim em. Em i tok: “Mi pilim tru dispela samting.” Narapela brata i lusim wanpela de olgeta long helpim man bilong wanpela sista—em man i no Witnes—long sanapim banis long graun bilong em. Taim ol i wok tupela i toktok wantaim na ol i kamap pren. Tupela wik bihain, dispela man i kam long brata na tok: “Nau em taim bilong mi long mekim sampela senis long laip bilong mi. Inap yu stadi wantaim mi long Baibel?” Em i wok long kamap strong na nau em wanpela Witnes i baptais pinis.
4 Taim yumi wok long painim ol man i gat gutpela bel long teritori bilong yumi, yumi laik wok yet long helpim ol manmeri husat i marit long ol wanbilip bilong yumi.—1 Ti. 2:1-4.
This is a repeat of article in km 2/04 taken from km-E 1/04 “How Can We Help Non-Witnes Mates?”