Redim Ol Nupela Long Karim Hevi Bilong Pasin Birua
1 Taim ol man i kirap stadi long Baibel na ol “i bihainim pasin bilong God,” Satan bai wok strong moa long birua long ol. (2 Ti. 3:12) Ating ol wanwok, ol wanskul, na ol man i sindaun klostu, ol i birua long ol. Na i hatwok moa taim ol famili i birua long ol.—Mt. 10:21; Mk. 3:21.
2 Tok Profet Long Pasin Birua: Ol nupela i mas kliagut olsem ol man bai birua long ol na dispela i makim olsem ol i disaipel tru bilong Krais. (Jo. 15:20) Sampela taim, as na ol man i mekim pasin birua em tingting kranki ol i gat long ol Witnes Bilong Jehova. Taim ol man i mekim nogut yumi, long wanem, yumi kamap disaipel bilong Jisas na bihainim tok bilong God, dispela i givim bikpela amamas long yumi. (Ap. 5:27-29, 40, 41) Tokim ol nupela olsem Jehova bai helpim ol. (Sng. 27:10; Mk. 10:29, 30) Pasin bilong ol long stap gut long Jehova, dispela i kamapim klia ol i stap long sait bilong em long dispela bikpela tok long husat i stap nambawan bos.—Snd. 27:11.
3 Wok Bilong Stretpela Save: Kirapim ol Baibel sumatin bilong yu olsem em i bikpela samting long ol i mas wok yet long kisim stretpela save maski ol i karim hevi. Long rot bilong pasin birua, Satan i laik pasim tok bilong God ol i lainim na bai dispela tok i no ken i go daun long bel bilong ol. (Snd. 4:23; Lu. 8:13) Ol i mas wok yet long kisim stretpela save long Tok Bilong God na bai ol i ken stap strong long bilip.—Sng. 1:2, 3; Kl. 2:6, 7.
4 Ol i Mas Sanap Strong: Long taim wanpela hevi i kamap, pasin bilong sanap strong na karim hevi em i bikpela samting na dispela inap kamapim ol gutpela samting. (Lu. 21:16-19) Taim ol nupela i karim hevi long pasin birua, dispela i helpim ol yet na ol narapela. Ol yet i luksave long pasin bilong Jehova long blesim ol manmeri husat i save karim hevi na sanap strong.—Jem. 1:12.
5 Aposel Pol i amamas long ol brata Kristen bilong em long Tesalonaika em ol i kamap strong long ol samting bilong spirit. Pol i tenkyu long God long ol dispela brata em planti bilong ol em i bin helpim ol long i kam insait long tok i tru. (2 Te. 1:3-5) Yumi tu i ken kisim wankain amamas sapos yumi redim ol Baibel sumatin bilong yumi long karim hevi bilong pasin birua na sanap strong.