Pas i Kam Long Gavening Bodi
Yes Ol Wanbilip Witnes Bilong Jehova:
Taim bilong yumi i narapela kain tru! Na yumi gat bikpela amamas! Mipela i amamas tru long wok wantaim yupela ol gutpela brata na sista. Yumi mekim bikpela wok tru, winim olgeta taim bipo, long autim tok long Papa bilong yumi long heven, Jehova.—Sef. 3:9; Jon 14:12.
Yumi kisim amamas long mekim wok bilong Jehova, tasol dispela i no min olsem yumi no gat ol bikpela hevi. Long sevis yia i go pinis, sampela bilong yupela i karim hevi long ol guria, bikpela tait, ol saiklon, na ol arapela bikpela bagarap em laip bilong man inap lus long en. (Mat. 24:7) Planti i karim hevi bilong bikpela sik na lapun. Ol hevi i wok long i go bikpela moa, na yumi olgeta i karim hevi long dispela. (Mat. 24:8) Long sampela kantri olsem Amenia, Eritrea, na Saut Korea, bilip i as na planti brata bilong yumi i stap long kalabus.—Mat. 24:9.
Wanem samting i helpim yumi long stap amamas maski yumi gat ol dispela hevi? Yiateks bilong 2010 i bin kirapim yumi long tingim wanpela bikpela samting: Pasin laikim inap karim olgeta hevi. Pasin laikim i no inap pinis. (1 Kor. 13:7, 8) Tru tumas, pasin bilong laikim narapela narapela—na Jehova tu—i save mekim na yumi inap sanap strong na karim hevi.
Planti husat i tok ol i Kristen, ol i kirap nogut long yumi save autim tok long planti hap na yumi no lusim dispela wok. Maski ol i no wanbel long bilip na tok bilong yumi ol Witnes, bel bilong sampela i kirapim ol long tok, “Yupela i mekim wok em mipela i mas mekim!” Wanem wanpela samting i helpim ol Witnes Bilong Jehova long mekim yet wok autim tok long olgeta de? Bekim bilong dispela askim tu, em pasin laikim. Olsem Papa bilong yumi long heven, yumi no laik bai wanpela man i kisim bagarap. (2 Pita 3:9) Namba bilong ol pablisa i go antap tru long sevis yia i go pinis, olsem 7,508,050, na dispela i kamapim klia laik bilong yumi olsem ol man i mas tanim bel. I no gat narapela lotu i gat planti wokman olsem i insait long dispela wok em pasin laikim i as bilong en, em ol i amamas long lusim taim bilong ol long helpim ol narapela long pas gut wantaim God.
Yumi amamas long lukim truim bilong tok profet bilong Aisaia i wok long kamap yet, em i tok: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en.” (Ais. 2:2-4) Namel long dispela lain i kam bung long haus bilong Jehova, em 294,368 manmeri husat i bin kisim baptais long sevis yia i go pinis. Yumi welkamim ol dispela man i kam insait long oganaisesen bilong yumi. Pasin laikim Kristen bilong yumi i mas kirapim yumi long wok yet long helpim ol long sakim ol samting em birua bilong yumi, Satan, i mekim bilong givim hevi long ol.—1 Pita 5:8, 9.
Namba bilong ol man i bung long Memorial long Tunde, Mas 30, 2010, i bikpela tru 18,706,895. Dispela namba i winim olgeta taim bipo na i soim olsem planti milion manmeri moa inap joinim yumi na lotu long Jehova. Yumi amamas tru olsem Jehova i no pinisim yet dispela taim nogut bilong nau! Taim pinis i no kamap yet, pasin laikim i helpim yumi long karim yet ol hevi na sanap strong.—2 Tes. 3:5.
“Stap Yet Klostu Long Jehova!” Kibung Distrik i bin kamap long 2010, i strongim pasin bilong yumi long pas gut wantaim Papa bilong yumi long heven, Jehova. Tok bilong man bilong raitim song i tru, em i tok: “Ol manmeri i putim Bikpela i stap God bilong ol, ol tu i ken amamas.” (Sng. 144:15) Maski wanem samting bai kamap bihain, yumi bilip tru olsem Jehova i sambai long yumi, olsem na i no gat wanpela samting yumi mas pret long en. (Sng. 23:4) Long rot bilong Pikinini bilong em, klostu nau Jehova bai “bagarapim ol samting Satan i kamapim.” (1 Jon 3:8) Tru tumas, yumi laik tru long dispela de i mas kamap! Tasol taim yumi wetim dispela de, yumi gat planti wok yumi ken bisi long mekim.—1 Kor. 15:58.
Yupela i ken bilip tru olsem oltaim mipela i save tingim yupela long beten bilong mipela. (Rom 1:9) Gutpela sapos yupela i “stap insait yet long pasin laikim bilong God. Yupela i mas bilip na wet long marimari bilong Bikpela Jisas Krais long opim rot long yupela long kisim laip oltaim.”—Jut 21.
Mipela i laikim yupela olgeta!
Ol brata bilong yupela,
Gavening Bodi Bilong Ol Witnes Bilong Jehova