Wok Bilong Tilim Ol Memorial Invatesen i Kirap Long Epril 2
1. Long dispela yia, bai yumi tilim invatesen bilong Memorial long wanem taim? Dispela wok i kamapim wanem gutpela samting?
1 Kirap long Epril 2 i go inap Epril 17, yumi bai tilim ol invatesen bilong nambawan bikpela bung bilong yia—em Memorial bilong dai bilong Krais. Long ol yia i go pinis, planti man husat i save amamas long harim tok ol i kam long dispela bung. Olsem, long de bilong Memorial, wanpela meri i ringim brens ofis na tok: “Nau tasol mi kam kamap long haus, na wanpela invatesen pepa i stap aninit long dua bilong haus. Mi laik i go, tasol mi no kliagut long wanem taim dispela bung bai kamap.” Brata i tokim em olsem taim bilong bung i stap long invatesen. Meri i tok promis olsem, “Mi bai go long dispela bung bilong yupela long nau nait!”
2. Yumi inap tok wanem taim yumi tilim invatesen?
2 Rot Bilong Tilim: Yumi no gat bikpela haptaim bilong tilim invatesen, olsem na i gutpela long mekim sotpela tok tasol. Yumi inap tok: “Moning. Mipela i laik givim famili bilong yu dispela invatesen, long wanpela bikpela bung i save kamap long olgeta yia, na long dispela yia em bai kamap long olgeta hap bilong graun long Sande, Epril 17. [Givim invatesen long man bilong haus.] Dispela de em de Jisas i bin i dai long en. Wanpela tok bilong Baibel bai kamap na stori long olsem wanem pe bilong Krais long baim bek man inap helpim yumi. Yu no mas baim bilong harim dispela tok. Dispela invatesen i soim atres na taim dispela bung bai kamap long hap bilong yumi.”
3. Olsem wanem yumi inap givim invatesen long planti man?
3 Sapos kongrigesen i gat bikpela teritori, ol elda inap tokim yupela long lusim invatesen long ol haus i no gat man, tasol mas putim long hap we i no pulim ai bilong ol man. Singautim ol gobek, wanblut, wanwok, wanskul, na ol narapela man yupela i save long ol. Taim yupela i tilim invatesen long ol wiken, tilim tu ol magasin taim i stret long mekim olsem. Olsem wanem? Yu inap mekim wok painia haptaim long Epril na insait moa long dispela gutpela wok bilong singautim ol man?
4. Bilong wanem yumi laik bai ol man i kam long Memorial?
4 Ol man i amamas long harim tok na i kam long Memorial, ol bai harim planti gutpela tok! Ol bai harim tok long bikpela pasin laikim bilong Jehova long givim pe bilong baim bek man. (Jon 3:16) Ol bai kisim save long ol samting Kingdom Bilong God bai mekim bilong helpim ol man. (Ais. 65:21-23) Na tu, bai i gat toksave olsem ol inap lukim ol atendan na askim ol long stretim rot bilong kisim Baibel stadi bilong kisim sampela save moa. Yumi beten olsem planti man i gat gutpela bel bai bihainim dispela singaut na bung wantaim yumi long Memorial!