Tilim Memorial Invatesen Pepa Long Olgeta Hap!
1. I gat wanem spesel wok bai kamap paslain long Memorial long olgeta hap bilong graun?
1 “Yupela i mas mekim olsem bilong tingim mi.” (Lu. 22:19) Bilong bihainim dispela tok bilong Jisas, olgeta manmeri i lotuim Jehova na ol manmeri i gat laik long harim tok bai bung wantaim long Mas 30, 2010, bilong tingim i dai bilong Jisas. Kirap long Mas 13 i go long Mas 30, bai i gat wanpela spesel wok long olgeta hap bilong graun bilong singautim ol man i kam long Memorial.
2. Olsem wanem yumi ken tilim invatesen pepa?
2 Pasin Bilong Tilim: Pastaim givim invatesen pepa long man bilong haus na bai em i ken lukim piksa i stap long fran bilong pepa, na bihain yu ken tok olsem: “Long apinun bilong Mas 30, planti milion manmeri long olgeta hap bilong graun bai bung na tingim i dai bilong Jisas. Mi kam bilong givim dispela invatesen pepa bilong singautim yu na famili bilong yu long kam long dispela bung. Ol pren bilong yu tu i ken kam. Plis lukim taim na ples we mipela bai mekim dispela bung.” Sapos inap, yu ken ritim Luk 22:19 long man bilong haus bilong em i ken lukim dispela tok bilong Baibel. Tingim, yumi gat sotpela taim bilong inapim teritori, olsem na i gutpela long mekim sotpela tok tasol.
3. Yumi ken singautim husat?
3 Sapos kongrigesen bilong yupela i gat bikpela teritori, ol elda i ken givim tok orait long yupela i lusim wanpela invatesen pepa long haus i no gat man long en. Sapos i stret, tilim ol invatesen pepa wantaim ol magasin. No ken lusim tingting long singautim ol gobek, Baibel sumatin, wanwok, wanskul, wanblut, neiba, na ol narapela yu save bung wantaim ol.
4. Taim yumi pilim tru pasin laikim bilong Jehova long stretim rot bilong baim bek yumi, dispela bai kirapim yumi long mekim wanem?
4 Redi Long Insait Tru Long Wok: Taim bilong Memorial em gutpela taim bilong mekim bikpela wok moa long autim tok. Olsem wanem? Yu inap stretim sediul bilong yu bambai yu ken mekim wok painia haptaim? Yu gat wanpela pikinini o wanpela Baibel sumatin husat i wok long kamap strong? Sapos olsem, orait go long ol elda na painimaut sapos ol i winim mak long kamap pablisa i no baptais na ol i ken insait long dispela spesel wok. Taim yumi pilim tru pasin laikim bilong Jehova long stretim rot bilong baim bek yumi, dispela bai i kirapim yumi long kam long Memorial, na tu, long singautim planti man long kam bung wantaim yumi.—Jo. 3:16.