Spesel Wok Bilong Toksave Long Memorial!
1. Ol pablisa bai insait long wanem wok i kamap long olgeta hap bilong graun kirap long Mas 21, 2009? Bilong wanem ol i insait long en?
1 Long Fonde, Epril 9, 2009, ol lain i lotuim God Jehova long olgeta hap bilong graun, ol bai bung bilong tingim nambawan bikpela samting em i mekim bilong kamapim pasin laikim bilong em long ol. (Ro. 5:6-8) Yumi save olsem planti milion i gat laik long harim tok bilong Baibel, ol bai bung wantaim yumi taim yumi mekim bung bilong tingim indai bilong Jisas. Kirap long Mas 21, bai yumi tilim wanpela spesel invatesen pepa bilong Memorial long olgeta hap bilong graun.
2. Yu mas tingim wanem ol samting taim yu tilim invatesen pepa?
2 Ol Samting Bilong Tingim: Mekim gutpela wok long ol tok piksa, ol askim, na ol skripsa em tok bilong en i stap long invatesen pepa. Olsem, yu inap soim piksa i stap long karamap bilong pepa na tok: “Mi laik singautim yu i kam bung wantaim mipela long tingim indai bilong Jisas, dispela bung bai kamap long Fonde, Epril 9, 2009.” Bihain soim em long het tok bilong invatesen pepa na ol askim. Kamapim klia olsem i orait long em i ken bringim famili bilong em na ol narapela em i laik long kisim ol i kam.
3. Paslain long Memorial, olsem wanem yu inap go bek planti taim na kirapim ol man yu tilim invatesen pepa long ol long kam long Memorial?
3 Sapos kongrigesen bilong yupela i gat bikpela teritori, orait ol elda i ken tokim yupela long putim ol invatesen pepa long ol haus i no gat man. Long ol wiken, tilim ol magasin na invatesen pepa wantaim. Putim mak long singautim ol gobek, Baibel stadi, famili, wanskul, wanwok, neiba, na ol narapela yu save bung wantaim ol. Long yia i go pinis, wanpela sista i bin singautim 30 long famili bilong em na planti taim em i bin kirapim ol long tingim bikpela samting bilong dispela bung. Em i amamas tru olsem 25 i bin kam na bihain 4-pela bilong ol i kirap stadi long Baibel!
4. Yumi mas stretim wanem ol samting nau? Bilong wanem yumi mas mekim olsem?
4 Stretim Ol Samting Nau: Ating planti pablisa bai mekim bikpela wok moa long Mas na Epril. Sapos ol pikinini bilong yu o ol Baibel sumatin bilong yu i wok long kamap strong, orait dispela em i gutpela taim tru bilong ol long kamap ol pablisa i no baptais. Nau em i taim bilong stretim ol samting na insait tru long dispela wok bilong tokim ol narapela long tingim tupela bikpela pasin laikim tru.—Jo. 3:16; 15:13.