Wok Bilong Singautim Ol Man i Kam Long Memorial Bai Kirap Long Mas 17
1. Wanem wok bai kirap long Mas 17?
1 Yumi save mekim Memorial long olgeta yia bilong tokaut long indai bilong Jisas. (1 Kor. 11:26) Olsem na yumi laik bai ol narapela tu i mas kam na harim ol gutpela tok long pasin laikim bilong Jehova long givim dispela gutpela presen bilong baim bek man. (Jon 3:16) Long dispela yia, wok bilong singautim ol man i kam long Memorial bai kirap long Sarere, Mas 17. Olsem wanem? Yu tingting long mekim bikpela wok moa long taim bilong Memorial?
2. Yumi ken tok wanem bilong tilim invatesen pepa?
2 Yumi Ken Tok: I gutpela long mekim sotpela tok tasol. Yumi ken tok olsem: “Halo. Mipela i laik givim dispela invatesen pepa long yu na famili bilong yu bilong singautim yupela i kam long wanpela bikpela bung bai kamap long Epril 5. Long olgeta yia mipela i save mekim dispela bung long olgeta hap bilong graun. Bai i gat wanpela tok bilong Baibel i kamap na olgeta man i ken harim na i no gat pe, na em bai stori long samting indai bilong Jisas i mekim na Jisas i mekim wanem samting long nau. Dispela invatesen pepa i gat taim, det, na ples dispela miting bai kamap.” Taim yumi tilim invatesen pepa, yumi ken tilim tu ol magasin.
3. Yumi laik singautim husat i kam long Memorial?
3 Singautim Planti Man Moa: Yumi laik singautim planti man i kam long Memorial. Olsem na yu mas singautim ol Baibel sumatin, ol gobek, famili, wanwok, wanskul, ol neiba, na ol narapela. Ol elda bai stretim rot long ol teritori em yupela bai tilim invatesen pepa long en. Gutpela samting i save kamap long wok bilong yumi long singautim ol man i kam long Memorial long olgeta yia. Las yia wanpela meri i kam long bung bilong Memorial na wanpela atendan i tokim em olsem em bai helpim em long painim pablisa husat i bin invaitim em. Dispela meri i tok em i no save long wanpela i stap long dispela bung, tasol long moning wanpela i bin kam long haus bilong em na tilim invatesen pepa long em.
4. I gat wanem ol as na yumi givim bel long insait long dispela wok?
4 Ating wanpela inap kam long Memorial long wanem yu bin tilim invatesen pepa long em. Maski ol i kam long Memorial o nogat, wok yu mekim bilong singautim ol man, dispela i autim tok long ol. Ol invatesen pepa yu tilim long ol i kamapim klia olsem long nau Jisas i stap olsem strongpela King. Pasin bilong yu long givim bel long insait long dispela wok i stap klia long ai bilong olgeta man—ol man long teritori, ol narapela pablisa, na bikpela samting moa, Jehova—olsem yu pilim tru dispela presen bilong baim bek ol man.—Kol. 3:15.