Wok Bilong Singautim Ol Man i Kam Long Memorial Bai Kirap Long Mas 1
1. Wanem taim bai yumi kirap long singautim ol man long kam long Memorial? Bilong wanem dispela wok bai stap longtaim liklik?
1 Long Fraide, Mas 1, bai yumi kirap long tilim invatesen pepa bilong singautim ol man i kam long Memorial bilong tingim indai bilong Jisas, olsem yumi save mekim long olgeta yia. Memorial bai kamap long Mas 26, olsem na wok bilong tilim invatesen bai stap longtaim liklik, i no olsem long ol yia i go pinis. Olsem na rot i op long singautim planti man moa, moa yet sapos ol i stap long ol hap we kongrigesen i gat bikpela teritori.
2. Ol elda bai stretim wanem rot bilong yumi kisim invatesen, na olsem wanem bai yumi inapim olgeta hap bilong teritori?
2 Stretim Rot Bilong Tilim Invatesen Pepa: Ol elda bai toksave long olsem wanem bai yumi inapim ol teritori bilong yumi. Bai ol i toksave tu sapos yumi mas lusim invatesen long ol haus i no gat man, o nogat. Sapos i gat sampela invatesen i stap yet bihain long yumi pinisim pinis teritori, ating yumi ken tilim taim yumi autim tok long ol pablik ples. Wasman autim tok bai stretim rot long putim sampela invatesen—i gat det, taim na ples bilong mekim Memorial long en—long bukrum na ol pablisa i ken kisim, tasol no ken putim olgeta invatesen pepa i kamaut, taim em i pinis orait putim sampela moa. Yumi mas kisim tasol inap long yumi bai tilim long wan wan wik.
3. Yumi mas tingim wanem samting taim yumi tilim invatesen pepa?
3 Yumi Ken Tok: Sapos yumi mekim sotpela tok tasol, bai yumi inap tilim invatesen long planti man moa. Long pes 4 i gat ol tok yu ken mekim bilong tilim invatesen long teritori. Tasol sapos man bilong haus i gat ol askim, orait yumi ken stori liklik wantaim em. Taim yumi tilim invatesen long ol wiken, yumi ken tilim tu ol magasin, sapos i stret long mekim. Long Mas 2, bai yumi wok strong long tilim invatesen na yumi no mekim wok bilong kirapim Baibel stadi.
4. Bilong wanem yumi mas givim bel tru long mekim dispela wok?
4 Yumi laik bai planti man i bung wantaim yumi long Memorial. Tok bilong Memorial bai kamapim klia Jisas em i husat tru. (1 Kor. 11:26) Olsem wanem dai bilong Jisas i helpim yumi? (Rom 6:23) Na bilong wanem em i bikpela samting long tingim Jisas? (Jon 17:3) Olsem na yumi mas givim bel tru long mekim dispela wok!