Bikpela Wok Bilong Singautim Ol Man
1. Wanem taim bai wok bilong tilim ol invatesen pepa bilong kibung bilong 2014 i kirap?
1 Sapos yu laik wokim wanpela bikpela kaikai bilong ol pren o famili, kain kaikai we yu bai tromoi bikpela haptaim na mani bilong redim, bai yu amamas tru long go singautim ol. Olsem tasol, lain bilong God i bin mekim bikpela wok tru long redim ol tok samting bai kamap long ol kibung rijinel na kibung intenesenel bilong 2014. Inap tripela wik paslain long ol kibung i kirap, bai yumi amamas long insait long wok bilong singautim ol narapela man long kam long kibung. Wanem samting bai helpim yumi long amamas long singautim ol man?
2. Wanem samting bai kirapim yumi long givim bel tru long mekim dispela wok?
2 Sapos yumi pilim tru ol gutpela tok samting em Jehova i redim bilong yumi kisim long ol dispela kibung, dispela bai kirapim yumi long givim bel tru long insait long dispela wok. (Ais. 65:13, 14) Yumi mas tingim tu olsem, long olgeta yia dispela wok bilong singautim ol man i bin kamapim ol gutpela samting. Sampela man yumi singautim, ol bai kam bung wantaim yumi long kibung. Maski hamas man bai kam long kibung, wok yumi mekim long singautim ol man, dispela bai litimapim nem bilong Jehova na i kamapim klia gutpela pasin bilong em long givim samting.—Sng. 145:3, 7; Rev. 22:17.
3. Olsem wanem bai yumi tilim ol invatesen pepa?
3 Lain elda bai skelim olsem wanem kongrigesen bai tilim ol invatesen pepa long olgeta hap bilong teritori, na ol bai lusim ol invatesen pepa long ol haus i no gat man o long ol pablik ples insait long teritori bilong ol o nogat. Long ol wiken, yupela i mas tilim ol nius wantaim ol invatesen sapos i stret long mekim. Sapos namba 1 Sarere bilong mun i kamap long det ol i makim bilong tilim invatesen pepa, yumi mas wok strong long tilim invatesen pepa na yumi no mekim wok bilong kirapim Baibel stadi. Taim dispela wok i pinis, bai yumi amamas long save olsem yumi bin givim bel tru long mekim dispela wok na singautim planti man long kam bung wantaim yumi long harim ol gutpela tok Jehova i bin redim bilong yumi!
[Blok long pes 5]
Bai Yu Tok Wanem?
Taim yu tok moning o apinun pinis, yu ken tok: “Mipela i mekim wanpela bikpela wok bilong singautim ol man long kam long wanpela bikpela bung. Det, taim, na ples em dispela kibung bai kamap long en i stap long dispela invatesen pepa.”