Pikinini Bilong Yu i Redi?

1. Wanem ol samting long skul i mekim na pikinini i mas redi?

¹ Taim skul i kirap long nupela yia, ol pikinini bilong yu bai bungim kain kain hevi long skul, na sampela samting bai putim presa long ol. Na tu ol bai gat rot long “tokaut long tok i tru.” (Jon 18:37) Olsem wanem? Yu mekim sampela samting bilong redim pikinini?

2. Pikinini i mas kliagut long wanem ol samting bambai em i ken redi gut?

² Yu ting pikinini bilong yu i kliagut long ol samting i insait long pasin bilong litimapim kantri na ol holide em bilip haiden i as bilong en? Na ol i kliagut long as na i no stret long insait long ol dispela samting? Ol i redi long feisim presa bilong kisim bikpela skul, o kisim boipren o gelpren, o kisim alkohol na drak? Ol bai tok tasol olsem lotu bilong ol i tambuim ol long insait long ol dispela samting, o ol inap stori gut long bilip bilong ol?​—⁠1 Pita 3:⁠15.

3. Olsem wanem ol papamama i ken yusim Famili Lotu long redim ol pikinini?

³ Toktok Long Taim Bilong Famili Lotu: Tru, long olgeta taim yu bai toktok wantaim pikinini taim em i bungim ol hevi na presa long skul. Tasol sapos yu toktok gut wantaim em long ol dispela samting paslain long skul i kirap long nupela yia, dispela bai redim em long sambai long bilip bilong em. I gutpela yupela i toktok long ol dispela samting long taim bilong Famili Lotu. Yu ken askim pikinini long wanem samting i save kamap long skul na i mekim em i tingting planti. Ating yupela i ken skelim gen sampela samting em yupela i bin skelim long ol yia i go pinis, long wanem, nau krismas bilong pikinini i go bikpela liklik na em inap kliagut long ol samting. (Sng. 119:95) Yupela i ken mekim sampela soim we yu stap olsem tisa o wanpela wanskul na pikinini i ken kam na toktok wantaim yu. Skulim em long yusim Baibel na buk Toktok Gut, na buk Sampela Askim Bilong Ol Yangpela bilong stori long bilip bilong em. Wanpela mama i save mekim soim wantaim ol pikinini long pasin bilong toktok wantaim tisa. Em i save redim ol long toktok wantaim nupela tisa bilong ol long kirap bilong yia na toksave long tisa olsem ol i Witnes Bilong Jehova.​—⁠Lukim Wastaua bilong Disemba 15, 2010, p. 3-5.

4. Ol papamama i gat savetingting bai mekim wanem?

⁴ Nau long dispela taim bilong las de, ol yangpela Kristen bai bungim ol hevi we bai “givim hatwok” long ol. (2 Tim. 3:⁠1) Ol papamama i gat savetingting, ol bai redim ol pikinini long winim ol dispela hevi. (Snd. 22:⁠3) Paslain long skul i kirap long nupela yia, yupela ol papamama i mas mekim olgeta samting yupela inap mekim bilong redim ol pikinini.