Tupela Koin i Gat Liklik Pe Tru

Wanpela gutpela rot bilong sapotim wok bilong Kingdom, em long rot bilong givim mani olsem kontribiusen bilong helpim wok autim tok long olgeta hap. Tasol olsem wanem sapos yumi no gat planti mani?

Wanpela taim Jisas i lukim wanpela wido meri i stap rabis i putim tupela koin i gat liklik pe tru long mani boks bilong tempel. Pasin bilong laikim tru Jehova i kirapim em long “putim olgeta mani bilong en, olsem olgeta samting em i holim,” maski “em i sot tru.” (Mak 12:41-44) Jisas i stori long dispela samting, na dispela i soim olsem mani dispela wido i givim i bikpela samting tru long ai bilong God. Ol Kristen long taim bilong ol aposel tu i ting em i wanpela gutpela samting tru long givim mani olsem kontribiusen. Ol Kristen i stap rabis na ol Kristen i gat planti mani i givim samting ol inap givim. Aposel Pol i kamapim eksampel bilong ol Masedonia, em ‘maski ol i stap rabis tru, ol i bin askim planti taim long insait long gutpela wok bilong givim presen.’—2 Kor. 8:1-4.

Olsem na sapos yumi inap givim tasol ‘tupela koin i gat liklik pe tru,’ yumi mas tingim olsem planti liklik kontribiusen inap kamapim bikpela kontribiusen. Pasin bilong yumi long amamas long givim samting i amamasim Papa bilong yumi long heven, bikos “God i save laikim tumas man i amamas long givim samting.”—2 Kor. 9:7.