Yu Save Long Dispela?

Tupela koin em rabismeri i givim i makim hamas pe?

Long taim bilong ol aposel, ol Juda i save givim tupela drakma olsem takis bilong tempel wanpela taim long yia, em pe man inap kisim sapos em i wok mani inap tupela de. (Matyu 17:24) Tasol Jisas i tok ol man i save baim tupela liklik pisin long wanpela “koin i gat liklik pe,” em olsem pe man inap kisim sapos em i wok mani inap 45 minit. Na man inap baim faipela liklik pisin sapos em i dabolim dispela mani, o wok mani inap 90 minit.​—Matyu 10:29; Luk 12:​6, NW.

Jisas i lukim mani em rabismeri i putim long bokis mani bilong tempel, em i liklik moa long pe bilong faipela pisin. Dispela tupela koin o tupela lepton, ol i liklik mani tru ol i wokim long kopa, na ol i save mekim wok long en long Israel long dispela taim. Ol i wankain long pe man inap kisim sapos em i wok mani inap 12-pela minit tasol.

Jisas Krais i tingim olsem mani dispela rabismeri i givim i winim tru mani bilong ol manmeri em “ol i gat planti mani i stap, na ol i tromoi hap tasol [olsem ekstra mani bilong ol] i go long bokis.” Bilong wanem Jisas i tingim tru mani em rabismeri i givim? Baibel i stori olsem rabismeri i gat “tupela liklik mani,” olsem na em inap givim wanpela na larim narapela i stap bilong em yet. Tasol em i givim “olgeta mani bilong en. Em i no gat mani moa i stap bilong baim kaikai.”​—Mak 12:​41-​44; Luk 21:​2-4.

Wanem taim Sol i kisim nem Pol?

Papamama bilong aposel Pol i bilong lain Hibru na long rot bilong papa em i kamap sitisen bilong Rom. (Aposel 22:​27, 28; Filipai 3:5) Olsem na ating taim em i liklik yet, em i gat nem Hibru, em Sol, na nem Rom, em Pol. Sampela wanblut bilong Pol tu, ol i gat nem bilong Rom na nem bilong Grik. (Rom 16:​7, 21) Na tu, ol Juda long dispela taim​—em ol manmeri husat i stap namel long ol man bilong ol arapela kantri​—ol i gat tupela nem.​—Aposel 12:12; 13:1.

Inap tenpela yia bihain long Pol i kamap Kristen, i luk olsem ol man i save kolim nem Hibru bilong em, em Sol. (Aposel 13:​1, 2) Tasol long namba wan raun bilong em olsem misineri long yia 47 o 48 C.E. samting, ating em i tingting long yusim nem Rom bilong em, em Pol. Em i kisim wok bilong tokaut long gutnius long ol man em ol i no bilong lain Juda, na ating em i pilim olsem ol man bai orait long em sapos em i yusim nem bilong Rom. (Aposel 9:15; 13:9; Galesia 2:​7, 8) Ating em i yusim tu nem Pol, long wanem, long tok Grik pasin bilong ol long kolim nem Hibru, em Sol, krai bilong en i wankain olsem wanpela tok nogut. Maski i gat wanem as na em i senisim nem, Pol i kamapim olsem em i redi long “kisim pasin bilong olgeta kain man, long wanem, [em i] laik traim olgeta rot bilong kisim bek sampela bilong ol.”​—1 Korin 9:22.

[Piksa long pes 12]

Wanpela lepton, sais tru bilong en