Ol Samting Ol i Mekim Bilong Tokaut Long Nem Bilong God

LONG Baibel, man bilong raitim song, em Devit, i tok: “Bai mi mekim song na litimapim nem bilong God.” Devit i save long nem bilong God olsem na long wanpela singsing, em i tok: “Litimapim nem bilong God Jehova . . . Litimapim gutpela nem bilong em.” (Song 69:30; 72:​18, 19, NW ) Planti man i mekim Tok Pisin i save yusim nem Jehova taim ol i kolim nem bilong God, ol i kisim dispela nem long leta Hibru יהוה, em i stap klostu 7,000 taim long Baibel.

Insait long sampela handet yia nem bilong God i bin i stap long kain kain hap, i no long Baibel tasol. Olsem, dispela ol tok Latin Benedictus Sit Iehova Deus, olsem “Litimapim Nem Bilong Jehova God” i bin i stap long ol koin gol em ol i bin wokim inap planti yia long Swiselan [1]. Insait long sampela handet yia i go pinis, nem bilong God long tok Hibru na tok Latin i bin stap long planti kain koin na medal samting.

Wanem samting i mekim na planti i mekim wok long nem bilong God, olsem yu inap lukim sampela eksampel i stap hia long dispela pes na long neks pes?

Bilong Wanem Ol i Yusim Nem Bilong God?

Kirap long yia 1500 samting, ol lotu Katolik i pait wantaim ol lotu Protesan long olgeta hap bilong Westen Yurop. Sampela provins em Spen i bosim i lusim Misin Katolik, em lotu planti man i insait long en, na ol i joinim Rifom Sios. Dispela i mekim na bikpela pait bilong ol lotu i kamap insait long kantri. Ol i mekim wok long ol koin na ol piksa i stap long en bilong tokaut olsem God i sapotim wanpela bilong dispela tupela lain i pait.

Hau Ol i Yusim Nem Bilong God

Ol man bilong katim piksa na ol tok samting long ol koin i katim fopela leta Hibru bilong makim nem bilong Jehova. Ol i raitim ol dispela leta long tok Inglis olsem JHVH o YHWH. Ol man bilong katim piksa na ol tok samting long ol koin na ol man nating tu i no inap ritim tok Hibru. Olsem na taim ol i raitim nem bilong God long 4-pela leta Hibru planti taim, ol rait i no wankain.

Long 1568 samting long Swiden, ol i wokim wanpela koin i gat nem bilong God long en [2], na long Skotlan ol i mekim olsem long 1591 samting. Klostu long yia 1600, King Charles Namba 9 bilong Swiden i putim nem bilong God​—⁠ol i raitim olsem Ihehova, Iehova, na Iehovah​—⁠long ol koin [3]. Em i gat wanpela kain koin ol i wokim long gol​—⁠em koin i gat naispela bilas tru na pe bilong en i olsem pe wanpela wokman i save kisim insait long 4-pela mun!

I bin i gat winim 60 kain kain koin, em ol i kolim ol Jehova koin, long taim Christian Namba 4 i stap king long Denmak na Nowe kirap long yia 1588 i go inap long 1648. Long yia 1650 samting, ol i wokim “ol Jehova koin” tu long Polan na Swiselan na ol i wokim long Jemani tu.

Long Pait Bilong 30 Yia, em pait i bin kamap long Yurop long yia 1618 i go 1648, na i bin kirap olsem pait bilong ol lotu, ol dispela koin i kamap planti. Bihain long King Gustav Namba 2 Adolph bilong Swiden, em i winim Pait Bilong Breitenfeld long 1631, em i wokim ol koin i gat 4-pela leta Hibru i makim nem bilong Jehova long ol [4]. Ol i wokim ol koin long ol taun olsem Erfurt, Fürth, Mainz, na Würzburg. Long wankain taim, ol provins em ol prins i bosim na ol i sapotim king bilong Swiden, ol tu i kirap wokim ol koin i gat nem bilong God long en.

Insait long 150 yia samting bihain long Pait Bilong 30 Yia i pinis, nem bilong God i stap yet long ol koin na ol medal samting. Ol i wokim ol kain koin olsem long Frans, Meksiko, Ostria, na Rasia, na long sampela arapela kantri tu. Tasol long yia 1700 samting, ol i no wokim tumas koin i gat nem bilong God. Na bihain, nem bilong God i no stap moa long ol tul bilong wokim mani samting.

Helpim Ol Man Long Save Long Nem Bilong God

Yumi no inap lukim nem bilong God long ol koin na pepa mani ol i yusim long nau, tasol wok bilong tokaut long nem bilong God i wok long kamap bikpela tru, winim olgeta taim bipo. Long bipo yet God i bin makim wanpela lain long mekim wok bilong em na em i tokim ol: “Yupela i witnes bilong mi. Mi wanpela tasol mi God.” (Aisaia 43:12) No gat wanpela koin inap inapim dispela bikpela wok. Ol man husat i bin yusim nem bilong God long ol koin bilong ol, ol i bin giaman long autim nem bilong God, long wanem, ol i tok em i sapotim ol long winim pait. Long nau, sampela man i wok long tokaut long nem bilong God long rot em i orait long en.

Ol Witnes Bilong Jehova i laik kirapim yu long kisim save moa long trupela God, Jehova, na mining bilong nem bilong em. Long Baibel, man bilong raitim song i stori long Jehova olsem: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (Song 83:​18, NW ) Em i bikpela samting long yumi kisim save long Jehova, olsem gutpela Pikinini Bilong Em i kamapim taim em i beten na i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

[Piksa long pes 22, 23]

Ol tul bilong ol man bilong katim piksa samting long ol koin

[Ol Piksa Kredit Lain long pes 22]

Koin 1 na ol tul: Hans-Peter-Marquardt.net; koin 2: Mit freundlicher Genehmigung Sammlung Julius Hagander

[Ol Piksa Kredit Lain long pes 23]

Ol koin 3 na 4: Mit freundlicher Genehmigung Sammlung Julius Hagander