Mekim Gutpela Wok Long Ol Nupela Buklet
Long kibung distrik ‘Kingdom Bilong God i Mas i Kam!’ bilong las yia, yumi bin amamas tru long kisim 2-pela nupela buklet: Harim Tok Bilong God na Stap Oltaim na Harim Tok Bilong God. Dispela 2-pela buklet i bilong helpim ol manmeri bilong kain kain sindaun na tokples. Na ol dispela buklet i stap pinis long 8-pela tokples long Papua Niugini. Buklet Harim Tok Bilong God i no gat planti rait long en. Ol i wokim dispela buklet bilong helpim ol man i no inap long harim gut tok na ol man i no save long rit. Dispela buklet inap helpim tu ol liklik pikinini. Long tupela buklet wantaim, long pinis bilong ol pes i gat 2-pela o sampela skripsa bilong mekim sampela stadi moa long en. Buklet Harim Tok Bilong God na Stap Oltaim i gat ol tok i stori long ol piksa. Ol pablisa i ken mekim wok long buklet Harim Tok Bilong God na Stap Oltaim bilong stori long buklet Harim Tok Bilong God. Yu ken mekim wok long ol dispela tok taim yu tilim buklet Harim Tok Bilong God na Stap Oltaim, na long taim yu mekim gobek.
Yu ken mekim sotpela tok bilong tilim buklet Harim Tok Bilong God na Stap Oltaim. Taim yu soim ol piksa long pes 2 na 3, yu ken tok:
◼ “Planti man i ting olsem, bilong stap gut oltaim ol i mas go long heven. Tasol yu yet i gat wanem tingting long stap oltaim long graun? [Larim man i bekim tok.] Baibel i tok yumi inap kisim laip oltaim, na tu, em i tokim yumi long rot bilong kisim laip oltaim.” Ritim Aisaia 55:3. Soim piksa i stap long pes 2 na 3 na askim man olsem: “Yu laik stap long kain ples olsem?” Tilim buklet na stretim rot bilong mekim gobek.
Taim yu mekim gobek, putim mak long kirapim Baibel Stadi wantaim man na soim piksa long pes 22-23, na askim em:
◼ “Dispela em i naispela piksa tru, a? [Larim man i bekim tok.] Buklet mi bin givim yu las taim, i gat dispela piksa tu.” Kamapim tok i stap long pes 22 na 23, na askim em: “Yu laik stap oltaim long dispela gutpela ples paradais? [Larim man i bekim tok.] Sapos yu laik stap long dispela ples, orait lukim samting Baibel i tok yu mas mekim. [Ritim Jon 17:3.] Mi bai amamas long kam bek na stadi wantaim yu long Baibel, i no gat pe, long rot bilong dispela buklet. Yu ting em orait?” Makim de na taim stret bilong kam bek na lukim man bilong haus.
Yumi olgeta i ken wok strong long tokim ol narapela long ol gutpela tok i stap long dispela 2-pela nupela buklet. Yu ken tilim ol dispela buklet long tokples i stret long man bambai em inap lain long pasin bilong harim tok bilong God na kisim savetingting.—Snd. 1:5.
This article is unique to PNG