Pas i Kam Long Gavening Bodi
Yes Ol Brata na Sista:
Papa bilong yumi long heven, Jehova, em i as bilong pasin laikim. Olsem na Baibel i tok: “God em i pasin laikim.” (1 Jon 4:8) Tru Jehova em God i Gat Olgeta Strong, tasol Baibel i no tok olsem “God em i bikpela strong.” Pasin laikim i nambawan as bilong wok bos bilong em. Olsem na dispela i pulim yumi i go long em!
Yumi amamas olsem Jehova i no fosim yumi long mekim wok bilong em, nogat. Em i no wanpela bos nogut. Em i laik bai yumi mekim wok bilong em, long wanem, yumi laikim tru em. Taim yumi mekim olsem, yumi soim olsem yumi laikim wok bos bilong em, long wanem, yumi save pasin bilong em long bosim ol samting i stret na em i mekim long pasin laikim. Dispela i bin kamap ples klia long taim em i bin wokim namba 1 man na meri.
Jehova i no subim Adam na Iv long bihainim tok bilong em, nogat. Em i larim ol yet i ken makim rot ol i laik bihainim. Sapos ol i laikim tru Jehova na amamas long ol samting em i bin mekim long ol, ol bai sakim samting Satan i mekim bilong kirapim ol long bikhet.
Bihain, klostu long taim Moses i laik i dai, em tokim lain Israel: “Nau mi soim yupela tupela rot. Sapos yupela i bihainim wanpela rot, yupela bai i kisim gutpela laip tru, na bai yupela i stap gut oltaim. Na sapos yupela i bihainim narapela rot, bai yupela i kisim taim nogut na bagarap, na bai yupela i dai.” (Lo 30:15) Ol man i stap fri long makim rot ol yet i laik bihainim long i stap bilong ol. Olsem na Josua i tokim ol Israel: “Sapos yupela i no laik lotu long Bikpela, orait yupela i tingting gut nau. Bai yupela i lotu long husat?” Ol manmeri i bekim tok bilong Josua: “Mipela i no inap tru long lusim Bikpela.” (Jos. 24:15, 16) Long nau tu yumi gat wankain tingting olsem. Yumi laikim Jehova, olsem na yumi “no inap tru” long lusim em.
Long kongrigesen Kristen, yumi kliagut long wanem ol samting i insait long pasin bilong i stap fri. Ol elda i gat namba long givim tok kaunsel, na tu, stretim man, tasol ol i no gat wok long daunim o bosim sindaun o bilip bilong ol narapela. Aposel Pol i tok: “I no olsem mipela i stap bos bilong bilip bilong yupela, nogat. Bilip bilong yupela i mekim na yupela i sanap strong. Tasol mipela ol wanwok bilong yupela bilong mekim yupela i amamas.”—2 Kor. 1:24.
Yumi save kisim amamas moa taim yumi mekim samting long laik bilong yumi yet na narapela i no subim yumi long mekim! Jehova i laik bai yumi mekim ol gutpela wok, long wanem, pasin laikim i kirapim yumi long mekim. Tok bilong Pol i kamapim klia as na dispela i bikpela samting: “Sapos mi givim olgeta samting bilong mi bai ol arapela i ken kisim kaikai, na sapos mi givim bodi bilong mi olsem sakrifais bai mi ken litimapim nem bilong mi yet, tasol mi no gat pasin laikim, orait olgeta dispela samting i no inap helpim mi liklik.”—1 Kor. 13:3.
Taim Jehova i lukim planti milion brata na sista bilong yumi i mekim wok bilong em, long wanem, ol i laikim em long bel olgeta bilong ol, dispela i mekim em i belgut tru!
Jehova i laikim tru olgeta wokman bilong em—yupela ol pikinini na tineja pikinini tu, em yupela i soim olsem yupela i laikim em, na yupela i no bihainim pasin bilong dispela graun long inapim ol laik bilong yupela yet. Mipela tu i laikim yupela.—Luk 12:42, 43.
Yupela i laikim Jehova, olsem na las yia, yupela ol brata, sista, na ol yangpela i bin lusim olsem 1,748,697,447 aua long autim gutnius. Pasin laikim i kirapim 7,782,346 long insait long wok bilong autim tok long olgeta hap bilong graun. Yumi amamas long 268,777 nupela bratasista, planti em ol yangpela husat i dediket long Jehova long rot bilong kisim baptais long wara. Dispela i makim olsem 5,168 i save kisim baptais long olgeta wiken. Na dispela i kirapim tru bel bilong yumi!
Long dispela taim bilong pinis, lain bilong God i karim planti hevi na ol hatwok, ol man i birua long ol, kain kain sik, na sampela i karim hevi bilong i go lapun. Tasol yumi mas wok strong na bai yumi no “surik” na “givap.” Mipela i laikim tru yupela olgeta.—Hib. 10:39; 2 Kor. 4:16.
Ol brata bilong yupela,
Gavening Bodi Bilong Ol Witnes Bilong Jehova