Mekim Wok Autim Tok i Kamap Gutpela Moa—Trenim Sumatin Long Kisim Pasin Bilong Stadi Gut

Bikpela Samting: Taim Baibel sumatin i kisim save long ol bikpela tok bilong Baibel, dispela bai helpim em long kamap strong long bilip. (Hib. 5:12–6:1) Tasol sumatin i mas mekim sampela samting moa. Taim sumatin i kisim nupela save long Baibel, em i mas bungim dispela save wantaim save em i holim pinis, na em i mas luksave long hau dispela save inap helpim em. (Snd. 2:1-6) Taim sumatin i lain long mekim wok painimaut, em inap long yusim ol tok i stap long ol buk na nius bilong yumi na bekim ol askim i kamap long tok bilong Baibel. Taim sumatin i wok strong long bihainim save em i kisim, dispela bai redim em long bungim olgeta kain traim i painim ol Kristen.—Luk 6:47, 48.

Rot Bilong Mekim:

Helpim sumatin long luksave olsem em i mas beten askim Jehova long helpim em paslain long em i mekim stadi bilong em yet.—Jon 14:26; 1 Kor. 2:10.
Kirapim sumatin long redi gut paslain long taim bilong Baibel stadi. Soim em stadi buk bilong yu na skulim em long pasin bilong makim ol bikpela tok olsem bekim bilong em.
Kirapim sumatin long yusim ol toktok bilong em yet taim em i bekim ol askim. No ken ritim tasol ol askim na larim sumatin i ritim tasol ol bekim i stap long buk.
Kirapim sumatin long ritim Baibel long olgeta de. Soim em sediul bilong Baibel ritim i stap long jw.org/tpi, na em i ken bihainim dispela sediul na ritim Baibel. Em tru olsem i hatwok long kisim pasin bilong ritim Baibel long olgeta de, tasol sapos sumatin i tingting strong long kisim dispela pasin, dispela bai helpim em tru.—Sng. 1:2, 3.
Soim sumatin long olsem wanem em inap yusim litresa na Web-sait bilong yumi long painim bekim bilong ol askim i kamap long tok bilong Baibel. Helpim em long save long ol sotpela hap tok i makim nem bilong ol buk em yumi yusim planti taim long ol miting.

Long Dispela Mun, Traim Dispela:

Long pinis bilong wanpela liklik het tok o sapta, askim Baibel sumatin long stori long ol bikpela tok em i bin kisim save long en long dispela stadi. Sapos yu no gat sumatin, orait yu yet i ken ritim wanpela hap long Baibel o wanpela paragraf long Wastaua na kolim gen ol bikpela tok yu kisim save long en. Dispela bai helpim yu na pasin bilong yu long rit bai i kamap gutpela moa.