Referens Bilong Laip na Wok Autim Tok Miting
Ogas 3-9
GUTPELA SAVE I KAM LONG BAIBEL | KISIM BEK 13–14
‘Sanap Strong na Lukim Ol Samting Jehova Bai Mekim Bilong Kisim Bek Yupela’
Moses—Man i Gat Bilip
Ating Moses i no save olsem God bai brukim solwara Retsi na opim rot bilong lain Israel i ken ranawe. Tasol Moses i bilip tru olsem God bai mekim samting bilong lukautim lain bilong Em. Na Moses i laik bai lain Israel i gat wankain bilip. Baibel i tok: “Moses i bekim tok long ol manmeri olsem, ‘Maski pret. Sanap strong na nau bai yupela i lukim olgeta samting Bikpela i laik mekim bilong helpim yupela.’” (Kisim Bek 14:13) Yu ting Moses i bin helpim lain Israel long kisim strongpela bilip? Yes, long wanem, Baibel i tok long Moses wantaim lain Israel olsem: “Ol i bilip, olsem na ol i brukim solwara Retsi olsem ol i wokabaut long graun i drai.” (Hibru 11:29) Bilip bilong Moses i helpim em yet na i helpim tu olgeta husat i lain long bilip long Jehova.
God i Gat Olgeta Strong i Save Tingim Gut Yumi
Ritim Kisim Bek 14:19-22. Piksaim long tingting olsem yu stap long dispela taim. Ami bilong Fero i ronim yupela na nau yupela i kam kamap long solwara Retsi. Nau God i wokim wanpela mirakel. Wanpela klaut i sanap baksait long yupela na i pasim ami bilong ol Isip na ol i stap long tudak. Tasol klaut i givim lait long yupela! Nau yu lukim Moses i apim han bilong em na makim solwara, na strongpela win long hap sankamap i mekim na solwara i bruk tupela hap. Orait nau yu na famili bilong yu wantaim ol animal na olgeta manmeri i wokabaut i go long narapela sait. Wantu yu luksave long narakain samting tru. Graun i no malumalum o i kamap ais; graun i drai na strong na isi long yupela i wokabaut. Dispela i helpim ol lain husat i no inap wokabaut hariap long i go kamap gut long hapsait.
Yu No Ken Lusim Tingting Long Jehova
Ol Isip i traim stretim ol karis i bagarap, na ol i mekim na lain Israel i kam kamap long hapsait bilong solwara, long hap is. Orait nau Moses i taitim han i go long solwara Retsi, na Jehova i mekim na traipela banis wara i pundaun. Planti milion ton wara i kapsait antap long Fero wantaim ol ami bilong em na olgeta i dring wara na i dai. I no gat wanpela bilong ol dispela birua i abrusim bagarap. Em nau, ol Israel i stap fri!—Kis. 14:26-28; Sng. 136:13-15.
Ol kantri nabaut i harim tok bilong dispela samting na inap longpela taim ol i pret. (Kis. 15:14-16) Inap 40 yia bihain, Rahap bilong Jeriko i tokim tupela man Israel: “Mipela olgeta i pret long yupela, na mipela i guria nogut tru. Long wanem, ol i bin stori long mipela long Bikpela i mekim solwara Retsi i drai long taim yupela i lusim Isip.” (Jos. 2:9, 10) Ol dispela lain haiden i no lusim tingting long samting Jehova i bin mekim bilong kisim bek ol manmeri bilong em. Tru tumas, i gat planti as moa na ol Israel i mas tingim Jehova.
Mekim Wok Painimaut
it-1 1117
Haiwe, Rot
Long bipo, i gat ol haiwe na ol rot i stap namel long ol taun long hap bilong Palestain. Ol man i save raun long sampela bilong ol dispela rot bilong karim ol kago i go i kam bilong salim. (Nam 20:17-19; 21:21, 22; 22:5, 21-23; Jos 2:22; He 21:19; 1Sm 6:9, 12; 13:17, 18) Wanpela bikrot ol man i save bihainim, em kirap long Isip i go long ol taun bilong Filistia, em taun Gasa na taun Askelon, na bihain dispela rot i go olsem long hap not-is na i go olsem long hap bilong Megido. Dispela bikrot i go moa yet olsem long hap not bilong Raunwara Galili long taun Hasor, na bihain i go olsem long Damaskus. Dispela rot kirap long Isip na i go olsem long Filistia, em i sotpela rot bilong i go kamap long Graun Bilong Promis. Tasol Jehova i tingim lain Israel na stiaim ol i go bihainim narapela rot na bai ol Filistia i no ken pait long ol Israel na mekim ol i bel hevi.—Ki 13:17.
it-1 782 par. 2-3
Ol Israel i Lusim Isip na i Go
Solwara Retsi i bruk long wanem hap na ol Israel inap wokabaut i go long hapsait?
Taim lain Israel i wokabaut i go kamap long Etem, “long arere bilong ples nating,” God i tokim Moses long tokim ol Israel long “go bek na wokim kem long Pihahirot. . . . arere long solwara.” Dispela bai mekim na Fero i ting olsem ol Israel “i paul na raun raun nating.” (Ki 13:20; 14:1-3) Ol saveman i ting olsem rot ol Israel i bihainim em rot ol i kolim el Haj. Ol i tok olsem tok Hibru em yumi tanim olsem “go bek” i no makim olsem ol i “tanim i go long sait,” nogat, mining bilong en i olsem ol i tanim na i go bek long hap ol i kam long en. Ol i ting olsem taim ol Israel i wokabaut i go kamap long hap not long het bilong Galf Bilong Sues, ol i tanim na wokabaut i go bek raunim hap is bilong Jebel ʽAtaqah, em ol maunten i stap long boda bilong hap wes bilong dispela Galf Bilong Sues. Lain Israel i bikpela lain tru, olsem na sapos ol birua i ronim ol i kam olsem long hap not, ol Israel bai hatwok long ranawe kwiktaim, long wanem, solwara i stap long fran bilong ol na i pasim rot bilong ol.
Stori bilong ol Juda long bipo i kamapim wankain tingting. Tasol bikpela samting, dispela i stret wantaim stori em Baibel i kamapim, tasol tingting bilong ol saveman i no kamapim dispela samting. (Ki 14:9-16) I luk olsem hap we ol Israel i brukim Solwara Retsi em i stap longwe long het bilong Galf Bilong Sues (o hap wes bilong Solwara Retsi). Dispela i mekim na ol ami bilong Fero bai i no go raunim tasol as bilong Galf Bilong Sues na kam antap kwiktaim na pait long lain Israel.—Ki 14:22, 23.
Baibel Ritim
Ogas 10-16
GUTPELA SAVE I KAM LONG BAIBEL | KISIM BEK 15-16
“Litimapim Nem Bilong Jehova Long Rot Bilong Singsing”
Bilong Wanem Nau Yumi Mas Pret Long Trupela God?
11 Jehova i bagarapim ami bilong Isip na dispela i givim biknem long em long ai bilong ol manmeri i lotu long em, na ol man long planti hap i save long Em. (Josua 2:9, 10; 4:23, 24) Em i kisim biknem tru, winim ol god giaman bilong Isip em ol i no gat strong na ol i no inap helpim ol man i lotu long ol. Ol Isip i bilip long ol god bilong ol na long ol man na long strong bilong ami bilong ol na ol i lus. (Song 146:3) Tasol Jehova i mekim strongpela wok na kisim bek lain bilong em! Dispela i kirapim ol Israel long mekim singsing bilong litimapim nem bilong God i gat laip, na singsing i kamapim klia olsem ol i aninit long em.
Bilong Wanem Nau Yumi Mas Pret Long Trupela God?
15 Sapos yumi bin abrusim bagarap na yumi sanap wantaim Moses, bai yumi tu i kirap mekim singsing olsem: “Bikpela, wanem arapela god i stap na i strongpela olsem yu? I no gat wanpela. Yu nambawan king na yu stap holi. Yu antap tru na gutpela olgeta. Na husat inap olsem yu? I no gat wanpela. Yu save wokim olkain mirakel na mekim ol bikpela wok, na ol manmeri i pret tumas long yu.” (Kisim Bek 15:11) Insait long ol planti handet yia i kam inap long nau, ol man i bin litimapim nem bilong God olsem. Long laspela buk bilong Baibel, aposel Jon i stori long ol gutpela wokboi bilong God em God i makim ol long spirit holi, na Jon i tok: “Ol i singim song bilong Moses, em wokman bilong God, na song bilong Pikinini Sipsip.” Wanem dispela bikpela song? I olsem: “Bikpela, yu God I Gat Olgeta Strong, yu save mekim ol narakain strongpela wok . . . King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”—KTH 15:2-4.
16 Olsem na long nau tu i gat ol manmeri i save lotu long God, em ol i kamap fri na ol i save pilim tru ol gutpela samting God i bin wokim na ol lo bilong em. Sampela manmeri bilong olgeta lain ol i bin kamap fri long ol samting bilong spirit; ol i klia long ol pasin doti bilong dispela graun na bihainim ol stretpela lo bilong God. Long olgeta yia, ol handet tausen manmeri i ranawe lusim pasin nogut bilong dispela graun na nau ol i stap insait long stretpela klinpela lain i lotu long Jehova. Klostu nau, taim strafe bilong God i painim ol lotu giaman na ol narapela lain nogut bilong dispela graun olsem paia, ol manmeri i lotu long Jehova bai ol i stap oltaim long stretpela nupela taim.
it-2 454 par. 1
Musik
Planti bilong ol singsing em ol Israel i save mekim long ol grup, em ol i save bihainim kain stail olsem: tupela lain i save senis senis long singsing wan wan lain bilong singsing, o wanpela tasol i singsing na ol narapela i singim kores. Long Baibel, ol i kolim dispela stail bilong singsing olsem “bekim singsing.” (Ki 15:21; 1Sm 18:6, 7) Dispela kain stail bilong singsing i stap long sampela singsing bilong Buk Song, kain olsem long Buk Song 136. Stori bilong tupela bikpela grup bilong mekim singsing bilong tok tenkyu long taim bilong Nehemia, em ol i bin mekim singsing bilong dediketim banis bilong Jerusalem, i soim olsem ol i bihainim dispela kain stail bilong singsing.—Ne 12:31, 38, 40-42.
it-2 698
Profet Meri
Miriam em fes profet meri Baibel i stori long en. God i bin givim tok long em, ating long rot bilong ol singsing. (Ki 15:20, 21) Olsem na Baibel i tok Miriam na Aron i tokim Moses olsem: “[Jehova] i givim tok long rot bilong mitupela tu.” (Nam 12:2) Long rot bilong profet Maika, Jehova i tok olsem em i salim “Moses, Aron, na Miriam” i go long ol Israel na bringim lain Israel i go lusim Isip. (Mai 6:4) Tru, Jehova i save givim tok long Miriam, tasol em i no givim wok long Miriam wankain olsem Moses. Taim Miriam i toktok planti long namba bilong Moses, em samting em i no gat rait long mekim, God i mekim save long em.—Nam 12:1-15.
Mekim Wok Painimaut
Yu Save Long Dispela?
Bilong wanem God i bin givim ol liklik pisin quail long ol Israel bilong kaikai long ples drai nating?
Bihain long ol Israel i lusim Isip, inap tupela taim God i bin givim liklik pisin quail olsem abus bilong ol Israel i ken kaikai.—Kisim Bek 16:13; Namba 11:31; NW.
Longpela bilong pisin quail em inap olsem 18 sentimita na hevi bilong en 100 gram. Long taim bilong kamapim pikinini ol i stap long planti hap bilong westen Esia na Yurop. Ol i pisin bilong raun, olsem na long taim bilong kol ol i save go i stap long Not Afrika na Arebia. Long taim bilong ol long flai i go long ol narapela hap, ol i save raun i go long hap is bilong solwara Mediterenian na flai i go antap long Poin Bilong Sainai.
Buk The New Westminster Dictionary of the Bible i tok, ol pisin quail “i save flai gut na hariap tru long rot bilong win, tasol sapos win i senisim ron bilong en, o taim ol pisin i sotwin long longpela hap ol i bin flai long en, wanpela bikpela lain pisin olgeta inap pundaun i go daun long graun na slip tasol.” Paslain long ol i raun gen, ol i mas malolo long graun inap 1-pela o 2-pela de, dispela i mekim na i isi long ol man bilong painim abus long kisim ol. Bihain liklik long yia 1900, kantri Isip i bin salim inap 3 million quail long olgeta yia olsem abus bilong kaikai.
Tupela taim we ol Israel i bin kaikai pisin quail em long mun Epril samting. Tru, planti taim ol quail i save flai i go abrusim maunten Sainai long dispela taim, tasol Jehova yet i bin ‘mekim win i kirap na bringim’ planti pisin i go insait long kem bilong lain Israel.—Namba 11:31.
Askim
Bihain liklik long taim ol Israel i lusim Isip, ol i kirap toktok planti long kaikai. Olsem na Jehova i salim mana long ol. (Kisim Bek 12:17, 18; 16:1-5) Long dispela taim, Moses i tokim Aron olsem: “Kisim wanpela sospen graun na pulapim mana long en na putim sospen i stap long ai bilong Bikpela, bai ol lain pikinini i kamap bihain ol i ken save long en.” Baibel i tok: “Orait Aron i putim dispela sospen mana klostu long Bokis Kontrak [ples i gat ol pepa bilong ol bikpela samting] long hap i kam, olsem Bikpela i bin tokim Moses.” (Kisim Bek 16:33, 34) Yumi save olsem Aron i bin putim mana i go insait long sospen, tasol em i mas wet inap long taim Moses i wokim pinis Bokis Kontrak na putim tupela ston insait long en na nau em inap putim mana tu i go insait.
Baibel Ritim
Ogas 17-23
GUTPELA SAVE I KAM BAIBEL | KISIM BEK 17-18
“Ol Man i Gat Pasin Daun i Save Trenim Ol Arapela na Givim Wok Long Ol”
Moses—Man i Gat Pasin Laikim
Moses i mekim pasin laikim long ol wanlain Israel. Ol i luksave olsem Jehova i wok long yusim Moses bilong stiaim ol manmeri bilong Em, olsem na ol i kam lukim Moses long stretim ol hevi bilong ol. Baibel i tok: “Planti manmeri i kam long Moses long moningtaim i go inap long apinun tru.” (Kisim Bek 18:13-16) Piksaim long tingting olsem Moses i pilim taiet tru long sindaun de olgeta na putim yau long ol Israel i kamapim hevi bilong ol. Tasol Moses i laikim ol manmeri, olsem na em i amamas long mekim olsem.
Bilong i Stap Amamas Yumi Mas Bilip Long Narapela
Taim ol dispela man i no kisim yet ol dispela wok i gat namba, ol i bin soim olsem ol i gat ol gutpela pasin. Ol i bin kamapim klia pinis olsem ol i save aninit long God na daun long em na ol i pret long mekim ol samting em i no laikim. Em i klia tru long olgeta manmeri olsem ol dispela man i bin wok strong long bihainim ol lo bilong God. Ol i nolaik tru long pasin bilong kisim mani long rot i no stret, na dispela i makim olsem ol i gat strong long bihainim stretpela pasin na dispela bai pasim ol long mekim ol pasin nogut long namba ol i holim. Ol i no inap mekim nogut long ol man i bilip long ol bambai ol i ken helpim ol yet o ol wanblut o pren bilong ol, nogat.
Stretpela Pasin i Stiaim Stretpela Man
Moses tu i gat pasin daun. Taim em i mekim bikpela wok tumas long stretim hevi bilong ol narapela, na strong bilong em i laik pinis, tambu bilong em, em Jetro, i tokim em long rot bilong stretim dispela hevi, olsem: Em i mas tilim sampela wok i go long ol narapela man i gat save long mekim. Moses i save em i no inap mekim olgeta samting, olsem na em i bihainim tok bilong Jetro. (Kisim Bek 18:17-26; Namba 12:3) Man i gat pasin daun i no surik long tilim sampela wok i go long ol narapela, na em i no pret na ting, sapos em i tilim wok i go long ol man i gat save long mekim, bai em i no inap bosim moa wok. (Namba 11:16, 17, 26-29) Em i gat laik tru long helpim ol dispela man long kamap strong long ol samting bilong spirit. (1 Timoti 4:15) Gutpela yumi mekim wankain pasin, a?
Mekim Wok Painimaut
“Yupela i No Ken Seksek Nating”
14 Aron na Hur i bin holim han bilong Moses long taim bilong pait. Long nau, yumi ken painim rot bilong sambai long ol arapela husat i karim hevi bilong kamap lapun, bikpela sik, pasin birua insait long famili, stap wanpis, o wanpela ol i laikim tumas i dai. Yumi ken strongim tu ol yangpela em ol narapela i putim presa long ol long mekim pasin i no stret o kisim biknem long dispela haptaim bilong nau long sait bilong skul na wok mani. (1 Tes. 3:1-3; 5:11, 14) Painim rot bilong soim olsem yu tingim tru ol narapela taim yu stap long Haus Kingdom, mekim wok autim tok, kaikai wantaim ol narapela, o toktok wantaim ol narapela long fon.
it-1 406
Hap Bilong Baibel
Ol samting i stap long Baibel i kamapim klia olsem ol buk em Moses i raitim, God i stiaim em na em i raitim, na ol i kamapim tok bilong lotu i tru. Em i no laik bilong Moses yet long kamap lida bilong lain Israel na go pas long ol; pastaim taim God i givim wok long em, em i no laik mekim. (Ki 3:10, 11; 4:10-14) Tasol God i helpim Moses na givim strong long em long wokim ol mirakel, na Fero na ol pris bilong em i save wokim mejik, ol i luksave olsem God i stiaim Moses long mekim ol samting. (Ki 4:1-9; 8:16-19) Moses yet i no gat tingting long stap mausman bilong God na man bilong raitim buk bilong Baibel, nogat. Moses i bihainim tok bilong God na holi spirit i stiaim em na em inap toktok na raitim ol buk bilong Baibel.—Ki 17:14.
Baibel Ritim
Ogas 24-30
GUTPELA SAVE I KAM LONG BAIBEL | KISIM BEK 19-20
“Tenpela Lo na Yu”
w89 11/15 6 par. 1
Tenpela Lo Inap Helpim Yu Olsem Wanem?
Namba 1 lo i go namba 4 lo i stori long ol samting yumi mas mekim bilong Jehova. (Namba 1 Lo) Em i laik yumi mas lotuim em wanpela tasol. (Matyu 4:10) (Namba 2 Lo) Ol man i lotuim em i no ken yusim ol imis. (1 Jon 5:21) (Namba 3 Lo) Yumi mas mekim stretpela wok long nem bilong Jehova, na no ken mekim ol samting i daunim nem bilong em. (Jon 17:26; Rom 10:13) (Namba 4 Lo) Long olgeta samting yumi mekim long laip bilong yumi, yumi mas tingim ol samting i holi. Dispela i opim rot long yumi malolo na yumi no tingim olsem yumi stretpela man winim ol arapela.—Hibru 4:9, 10.
w89 11/15 6 par. 2-3
Tenpela Lo Inap Helpim Yu Olsem Wanem?
(Namba 5 Lo) Ol pikinini i bihainim tok bilong papamama, dispela i helpim famili long i stap wanbel, na Jehova bai blesim ol. Na em naispela “lo i gat promis long en”! Dispela bai mekim na “yu ken i stap gut,” na tu, yu ken “stap longpela taim long dispela graun.” (Efesus 6:1-3) Nau yumi stap long “taim bilong las de” bilong dispela taim nogut, olsem na pasin bilong bihainim tok bilong God i opim rot long ol pikinini long i stap laip na i no dai.—2 Timoti 3:1; Jon 11:26.
Pasin bilong laikim ol narapela bai pasim yumi long mekim ol pasin nogut olsem (Namba 6 Lo) kilim man i dai, (Namba 7 Lo) mekim pasin adaltri, (Namba 8 Lo) stil, na (Namba 9 Lo) mekim tok giaman. (1 Jon 3:10-12; Hibru 13:4; Efesus 4:28; Matyu 5:37; Provep 6:16-19) Tasol olsem wanem long laik na tingting bilong yumi? (Namba 10 Lo) i tok yumi no ken mangal, dispela i kirapim yumi long tingim olsem Jehova i laik bai ol samting yumi tingting long mekim i mas stret long ai bilong em.—Provep 21:2.
Mekim Wok Painimaut
it-2 687 par. 1-2
Pris
Lain Kristen i Mekim Wok Pris. Jehova i tok promis olsem sapos lain Israel i stap gut long kontrak ol i wokim wantaim em, ol bai “kamap wanpela lain pris bilong [em] i mekim wok king na stap olsem wanpela lain holi.” (Ki 19:6) Lain pris bilong Aron bai mekim wok i go inap long lain pris i winim ol bai kamap bihain. Lain pris bilong Aron i stap olsem piksa bilong dispela lain pris bai kamap bihain. (Hi 8:4, 5) Dispela lain pris bai stap i go inap long Kontrak Bilong Lo i pinis na kirap bilong nupela kontrak. (Hi 7:11-14; 8:6, 7, 13) Pastaim, Jehova i makim lain Israel long i stap pris bilong em insait long Kingdom em i tok promis long en; bihain em i singautim ol man bilong ol arapela lain long mekim wok pris.—Ap 10:34, 35; 15:14; Ro 10:21.
Liklik hap lain bilong Israel tasol i bilip long Krais, olsem na lain Israel i no inap stap lain pris i mekim wok king na stap olsem wanpela lain holi. (Ro 11:7, 20) Ol Israel i no stap gut long God, olsem na sampela handret yia paslain, Jehova i tok lukaut long ol long rot bilong profet Hosea olsem: “Ol i no laik kisim save long mi, olsem na mi bai rausim ol na ol i no inap mekim wok olsem pris bilong mi; ol i no tingim ol lo bilong God bilong ol, olsem na mi bai i no tingim ol pikinini bilong ol.” (Ho 4:6) Olsem na Jisas i tokim ol bikman bilong lain Juda: “God bai tekewe Kingdom bilong em long yupela na givim long wanpela lain i karim kaikai bilong dispela Kingdom.” (Mt 21:43) Maski i olsem, Krais Jisas i luksave olsem lain pris bilong Aron i stap yet na mekim wok pris. Na taim em i stap long graun, Jisas i daun long Lo. Olsem na taim em i oraitim ol man i gat sik lepra, em i tokim ol long go long ol pris na mekim ofa.—Mt 8:4; Mk 1:44; Lu 17:14.
Sampela Bikpela Tok Bilong Buk Kisim Bek
20:5—Olsem wanem Jehova i save “mekim save long ol” manmeri i gat asua na long ol tumbuna bilong ol i kamap bihain? Taim wanpela man i kamap bikpela pinis, God i save skelim pasin na tingting bilong em. Tasol taim ol Israel i kirap lotuim ol giaman god, ol lain tumbuna bilong ol i kamap bihain i karim hevi bilong dispela samting. Ol Israel i stap gut long God ol tu i pilim hevi bilong dispela samting, long wanem, pasin bilong ol narapela Israel long i no bihainim stret lotu i tru i mekim na i hatwok long ol gutpela manmeri Israel long bihainim pasin bilong i stap gut long God.
Baibel Ritim
Ogas 31–Septemba 6
GUTPELA SAVE I KAM LONG BAIBEL | KISIM BEK 21-22
“Holim Wankain Tingting Long Laip Olsem Bilong Jehova”
it-1 271
Paitim Man
Wanpela Hibru bosman i ken paitim wokboi o wokmeri bilong em sapos em i bikhet o i no harim tok. Sapos wokboi o wokmeri i dai taim bosman bilong em i paitim em, orait ol i mas mekim save long bosman. Tasol sapos dispela wokboi o wokmeri i stap inap wanpela o tupela de na bihain em i dai, dispela i soim olsem bosman bilong em i no tingting long kilim em i dai. Em i paitim dispela wokboi o wokmeri bilong stretim em, long wanem, em i bin baim dispela wokboi o wokmeri long “mani bilong em.” Wanpela man bai i no inap bagarapim ol samting bilong em yet, sapos em i mekim olsem, mani bilong em bai lus. Na tu, wanpela de o tupela de bihain long bosman i paitim wokboi o wokmeri na em i dai, ating i gat narapela as na em i dai. Olsem na sapos wokboi o wokmeri i no dai bihain long wanpela o tupela de, i no gat wok long mekim save long bosman bilong em.—Ki 21:20, 21.
Yu Tingim Tru Laip Olsem God i Save Tingim?
16 Laip bilong olgeta man i bikpela samting long Jehova. Na laip bilong bebi i no bon yet, em tu i samting i dia tumas long em. Long Lo Bilong Moses, sapos man i no min na em i kamapim bagarap long wanpela bel mama, na dispela mama o bebi bilong em i dai, long ai bilong Jehova dispela man i gat asua long kilim man. Dispela i makim olsem, maski em eksiden, wanpela man i bin dai na ol i mas givim pe bilong bekim dispela laip. (Ritim Kisim Bek 21:22, 23.) Long ai bilong God, bebi i no bon yet, em i gat laip. Taim yumi save long dispela, yu ting em i pilim olsem wanem long pasin bilong rausim bel? Yu ting em i pilim olsem wanem taim em i lukim ol i kilim i dai planti milion bebi i no bon yet long olgeta yia?
Jehova i Laik Bai Yu No Ken Kisim Bagarap
Dispela lo i stret tu taim ol animal bilong ples i bagarapim man. Sapos bulmakau man i sutim man long kom bilong en na kilim man i dai, orait papa bilong bulmakau i mas kilim i dai bulmakau na bai em i no ken bagarapim narapela man. I tambu long papa bilong bulmakau i kaikai mit bilong en o salim long ol narapela bilong ol i ken baim na kaikai, olsem na taim em i kilim bulmakau, em i lusim wanpela bikpela samting. Tasol olsem wanem sapos man i kisim bagarap long bulmakau na papa bilong bulmakau i no bosim gut bulmakau? Sapos bihain dispela bulmakau i kilim i dai wanpela man, orait ol i mas kilim i dai bulmakau na papa bilong en wantaim. Dispela lo i mekim na man i tingim gut pasin bilong em sapos em i no save bosim gut ol animal bilong em.—Kis. 21:28, 29.
Mekim Wok Painimaut
Bilong Wanem Yu Mas Dediket Long Jehova?
4 Dediket bilong ol Kristen i bikpela samting tru. Em i no wanpela tok promis nating. Tasol sapos yumi dediket, olsem wanem dispela i helpim yumi? Yumi ken skelim olsem wanem pasin bilong stap gut long narapela man i save kamapim ol gutpela samting. Tingim pasin pren i stap namel long tupela man. Bilong yu ken kisim wanpela pren, yu mas redi long stap olsem wanpela pren. Dispela i makim olsem yu mas stap gut long pren bilong yu—yu pilim olsem yu gat wok long tingim gut em. Wanpela gutpela pasin pren em Baibel i stori long en, em pasin pren bilong Devit na Jonatan. Ol i mekim strongpela tok promis long ol bai stap pren oltaim. (Ritim 1 Samuel 17:57; 18:1, 3.) Ating planti man bai i no mekim kain strongpela tok promis olsem, tasol pasin pren bai kamap strong moa taim tupela i pilim olsem narapela i mas i stap gut long narapela.—Snd. 17:17; 18:24.
5 Lo em God i bin givim long lain Israel i stori long pasin i stap namel long wokboi nating na bosman bilong em, we wokboi i kisim helpim sapos em i stap gut long bosman. Sapos wokboi i laikim gutpela sindaun, em inap wokim kontrak wantaim gutpela bosman bilong stap oltaim aninit long em. Lo i tok: “Sapos dispela wokboi i tok, ‘Mi laikim tumas bosman bilong mi, na mi laikim tumas meri na ol pikinini bilong mi, na mi no laik lusim ol,’ orait bosman bilong en i mas kisim em i go long haus bilong God. Na wokboi i mas sanap long dua o long pos bilong dua, na bos i mas kisim nil na mekim hul long yau bilong wokboi. Na bai em i stap wokboi nating bilong dispela man inap em i dai.”—Kis. 21:5, 6.
it-1 1143
Kom
Tok i stap long Kisim Bek 21:14 i makim olsem sapos wanpela pris i kilim i dai wanpela man, ol bai kilim em i dai, o maski wanpela man i holim kom bilong alta, dispela i no inap pasim ol man long kilim em i dai sapos em i min long kilim i dai narapela man.—Skelim 1Ki 2:28-34.
Baibel Ritim