Yu Tingim Yet?

Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:

Olsem wanem yumi inap kisim blesing taim yumi givim taim long toktok, putim yau, na tingim Jehova?

Yumi bai mekim ol gutpela disisen, kamap ol gutpela tisa, i gat strongpela bilip, na pasin bilong yumi long laikim Jehova bai kamap strong moa.—w22.01, p. 30-31.

Olsem wanem yumi bai kisim helpim taim yumi lain long trastim Jehova na ol man em i makim bilong i go pas long yumi?

Nau em i taim bilong lain long trastim wei bilong God long mekim ol samting long rot bilong i no holim tupela tingting long daireksen na ol disisen ol elda i mekim. Taim traipela hevi tru i kirap, yumi bai redi long bihainim tok maski sapos yumi kisim ol instraksen em yumi pilim olsem i no stret o i no gat as bilong en.—w22.02, p. 4-6.

Ensel i laik tok wanem taim em i tokim Sekaraia olsem “[Gavana] Serubabel i holim tul i save hangamap long string bilong mesarim ol samting long han bilong em”? (Sek. 4:8-10)

Dispela visen i strongim lain bilong God olsem dispela tempel, we i no luk nais long ai bilong sampela, ol bai pinisim na em bai i stret wantaim laik bilong God.—w22.03, p. 16-17.

Olsem wanem yumi ken stap “gutpela eksampel long . . . pasin bilong [yumi] long toktok”? (1 Tim. 4:12)

Yumi save toktok long gutpela pasin na long pasin rispek taim yumi autim tok, givim bel long singsing, bekim tok oltaim long ol miting, na mekim ol tok tru na strongim ol narapela, na sakim ol tok nogut.—w22.04, p. 6-9.

Wai na 4-pela wel animal (ol kingdom) long Daniel sapta 7, i kamap wanpela wel animal olsem Revelesen 13:1, 2 i stori long en?

Dispela wel animal long Revelesen 13 i no makim wanpela kingdom tasol, olsem Rom, nogat. Em i makim olgeta gavman bilong graun em ol i bin bosim ol manmeri.—w22.05, p. 9.

Wanem nambawan rot yumi soim olsem yumi trastim stretpela pasin bilong God?

Sapos wanpela i bin tok nogut long yumi, bagarapim bel bilong yumi, o rongim yumi, yumi laik lusim pasin bilong belhat na bel nogut, na larim ol samting long han bilong Jehova. Em bai pinisim olgeta pen na hevi em sin i kamapim.—w22.06, p. 10-11.

Wanpela brata husat i beten long taim bilong miting em i mas tingim wanem samting?

Taim brata i beten, em i no ken mekim ol tok bilong stretim kongrigesen o mekim ol toksave. Moa yet long ol kirap bilong miting, i no gat wok long kolim “planti tok” long beten. (Mat. 6:7)—w22.07, p. 24-25.

Long wanem rot “ol man i bin mekim ol stingpela pasin,” “kirap bek bilong ol em bilong kisim kot”? (Jon 5:29)

Ol bai i no inap kisim hatpela kot long ol samting ol i bin mekim long bipo, nogat. Jisas bai skelim ol long ol tingting na ol pasin ol i mekim bihain long ol i kirap bek.—w22.09, p. 18.

Long wanpela kibung i kamap long Septemba 1922, J. F. Rutherford i mekim wanem tok em ol bratasista i amamas long en?

Long wanpela kibung i kamap long Sida Poin, Ohio, Amerika, em i tokaut olsem: “King i kirap pinis long wok! Yupela i man bilong autim tok bilong dispela samting. Olsem na yupela i mas autim tok, autim tok, autim tok bilong King na Kingdom bilong em!”—w22.10, p. 3-5.

Aisaia sapta 30 i kamapim wanem 3-pela rot em God i save helpim yumi long sanap strong na karim hevi?

Dispela sapta i soim olsem em i save (1) putim gut yau long ol beten bilong yumi na bekim ol beten bilong yumi, (2) stiaim yumi, na (3) givim yumi ol blesing long nau na long bihain.—w22.11, p. 9.

Wai na yumi ken tok olsem ol tok bilong Buk Song 37:10, 11, 29 i bin kamap tru long bipo na ol bai kamap tru long bihain tu?

Tok bilong Devit i kamapim klia gutpela sindaun tru em lain Israel i bin kisim, olsem long taim Solomon i mekim wok king. Jisas i stori long wanpela paradais bai kamap long bihain na em i kamapim tok bilong ves 11. (Mat. 5:5; Luk 23:43)—w22.12, p. 8-10, 14.