Strongim Bel Wankain Olsem Sadok

1-2. Sadok em i husat? (1 Stori 12:​22, 26-28)

PIKSAIM long tingting samting i kamap. Bikpela lain tru winim 340,000 man i bin bung bilong mekim Devit i kamap king bilong Israel olgeta. Inap 3-pela de olgeta, long ol ples maunten klostu long Hebron, ol dispela man i toktok gut wantaim, ol i mekim ol singsing bilong preisim Jehova, na ol i lap na amamas wantaim. (1 Sto. 12:39) Bikpela lain tru i bung olsem na i no gat rot long ol man inap luksave long wanpela yangpela man nem bilong em Sadok i stap namel long ol. Tasol Jehova i luksave long em na Em i laik bai yumi save olsem Sadok i bin stap long dispela hap. (Ritim 1 Stori 12:​22, 26-28.) Sadok em i husat?

² Sadok em wanpela pris husat i bin wok gut wantaim Hetpris Abiatar. Na tu, God i givim bikpela savetingting long Sadok na em i givim em tu pasin bilong kliagut long laik bilong Em. (2 Sml. 15:27) Ol manmeri i save go lukim Sadok bilong kisim gutpela edvais. Na tu, em i man i gat strongpela bel. Long dispela atikol, yumi bai stori long pasin bilong Sadok long strongim bel.

3. (a) Wai na ol man i lotuim Jehova i mas strongim bel? (b) Yumi bai stori long wanem samting long dispela atikol?

³ Long dispela taim bilong las de, Satan i wok strong tru long mekim nogut long lain bilong God. (1 Pita 5:8) Yumi mas strongim bel taim yumi wetim Jehova long pinisim Satan na dispela haptaim nogut bilong nau. (Sng. 31:24) Yumi bai stori long 3-pela rot we yumi ken bihainim pasin bilong Sadok long strongim bel.

SAPOTIM KINGDOM BILONG GOD

4. Wai na lain bilong Jehova i mas strongim bel bilong sapotim Kingdom Bilong God? (Lukim tu piksa.)

⁴ Yumi lain bilong Jehova i save givim bel olgeta long sapotim Kingdom Bilong God, tasol planti taim yumi mas strongim bel bilong mekim olsem. (Mat. 6:33) Olsem, dispela graun i pulap tru long ol pasin nogut, olsem na yumi mas strongim bel bilong bihainim ol lo bilong Jehova na long autim gutnius bilong Kingdom. (1 Tes. 2:2) Na tu, planti taim yumi mas strongim bel bambai yumi no ken insait long ol tok pait bilong politik em ol man i save mekim we i save brukim lain. (Jon 18:36) Planti wokman bilong Jehova i bin karim hevi bilong mani, ol man i mekim nogut long ol, o kalabusim ol bikos ol i no laik insait long ol wok politik o joinim ami.

5. Wai na Sadok i mas strongim bel bilong sapotim Devit?

⁵ Sadok i no go long Hebron bilong selebretim tasol wok king bilong Devit, nogat. Em i karim ol samting bilong pait i go wantaim em na em i redi long mekim pait. (1 Sto. 12:38) Em i redi long bihainim Devit i go long pait na em i redi long lukautim lain Israel long ol birua bilong ol. Ating Sadok i no gat bikpela ekspiriens tumas long pait, tasol em i gat pasin bilong strongim bel.

6. Olsem wanem pasin bilong Devit long strongim bel i stap olsem gutpela piksa em Sadok i ken bihainim? (Buk Song 138:3)

⁶ Sadok em i wanpela pris, so em i lainim pasin bilong strongim bel long husat? Em i stap namel long ol man em ol i gat strongpela bel na ol i no save pret. I klia tru olsem em i kisim skul long eksampel bilong ol. Olsem, pasin bilong Devit long strongim bel na “lidim ol Israel i go long pait” i kirapim olgeta Israel long givim bel tru long sapotim em. (1 Sto. 11:​1, 2) Oltaim Devit i save wetim Jehova long helpim em taim em i go pait long ol birua. (Sng. 28:7; ritim Buk Song 138:3.) Sadok i kisim skul tu long ol narapela man i stap wantaim em, olsem Jehoiada na pikinini man bilong em Benaia em man bilong pait, na tu, 22 hetman bilong ol traib em ol i kam helpim Devit. (1 Sto. 11:​22-25; 12:​26-28) Olgeta dispela man i wokim disisen olsem ol bai sapotim wok king bilong Devit.

7. (a) Yumi inap kisim skul long eksampel bilong husat ol manmeri long nau em ol i gat pasin bilong strongim bel? (b) Yu kisim wanem skul long stori bilong Brata Nsilu olsem vidio i kamapim?

⁷ Taim yumi skelim stori bilong ol manmeri em ol i strongim bel na sapotim wok king bilong Jehova, dispela i save strongim bel bilong yumi. King bilong yumi Jisas Krais i sanap strong na sakim ol presa bilong insait long ol wok politik bilong Satan long dispela graun. (Mat. 4:​8-11; Jon 6:​14, 15) Oltaim em i bilip na wetim Jehova i strongim em. Long nau tu, i gat planti eksampel bilong ol yangpela man em ol i no laik insait long ami o sapotim wok politik bilong dispela graun. I gutpela long yu ken skelim sampela ekspiriens bilong ol long jw.org.a

HELPIM OL BRATASISTA BILONG YU

8. Long wanem ol taim ol elda i mas strongim bel bilong helpim ol bratasista?

⁸ Lain bilong Jehova i save amamas long helpim narapela narapela. (2 Kor. 8:4) Tasol sampela taim ol i mas strongim bel bilong mekim olsem. Olsem, taim woa i kirap long wanpela hap, ol elda long dispela hap i luksave olsem ol bratasista i nidim ol tok bilong strongim ol, ol i nidim sapot, na tu, ol i mas kisim helpim long ol samting bilong strongim bilip olsem Baibel na ol pablikesen o kaikai na klos samting. Ol elda i laikim tru ol bratasista bilong ol, olsem na sampela taim ol i wok strong tru long helpim ol long ol samting ol i nidim, maski ol yet inap kisim bagarap long dispela rot. (Jon 15:​12, 13) Taim ol i mekim olsem, ol i bihainim pasin bilong Sadok long strongim bel.

9. Olsem 2 Samuel 15:​27-29 i kamapim, Devit i tokim Sadok long mekim wanem? (Lukim tu piksa.)

⁹ Ol man inap kilim Devit i dai. Pikinini man bilong em Apsalom i tingting strong long stilim wok king long han bilong em. (2 Sml. 15:​12, 13) Devit i mas lusim Jerusalem wantu tasol! Em i singautim ol wokman bilong em olsem: “Yumi mas lusim Jerusalem kwiktaim na ranawe. Nogut Apsalom i kilim yumi olgeta.” (2 Sml. 15:​14, BB) Taim ol i wok long lusim Jerusalem, Devit i luksave olsem wanpela man i mas stap bek bambai em i ken tokim Devit long ol plen bilong Apsalom. So em i salim Sadok na ol narapela pris i go bek long taun bilong mekim wok olsem ol man bilong karim tok. (Ritim 2 Samuel 15:​27-29.) Ol i mas was gut taim ol i mekim olsem. Samting Devit i tokim ol dispela pris long mekim inap putim hevi long ol na ol man inap kilim ol i dai long en. Apsalom em man bilong tingim em yet tasol na em i save belhat na bekim rong na mekim pasin giaman tu, so tingim samting em inap mekim long Sadok na ol dispela narapela pris sapos em i painimaut olsem ol i mekim wok olsem ol spai bilong lukautim Devit!

10. Olsem wanem Sadok na ol narapela i bin lukautim Devit?

¹⁰ Devit i wokim wanpela plen em Sadok na Husai—em narapela pren bilong Devit—i ken bihainim. (2 Sml. 15:​32-37) Husai i bihainim dispela plen bilong Devit na Apsalom i trastim em na bihainim plen bilong pait em Husai i mekim, na dispela i givim inap taim long Devit long redi long dispela pait. Bihain Husai i tokim Sadok na Abiatar long dispela plen. (2 Sml. 17:​8-16) Na dispela tupela man i salim tok i go long Devit. (2 Sml. 17:17) Jehova i helpim Sadok na ol narapela pris i wok wantaim em, na ol i mekim bikpela samting bilong lukautim laip bilong Devit.—2 Sml. 17:​21, 22.

11. Olsem wanem yumi ken bihainim pasin bilong Sadok long strongim bel taim yumi helpim ol bratasista bilong yumi?

¹¹ Sapos ol i askim yumi long helpim ol bratasista bilong yumi long taim bilong ol bikpela hevi, olsem wanem yumi ken soim olsem yumi gat strongpela bel wankain olsem Sadok? (1) Bihainim daireksen. Long ol kain taim olsem, em i bikpela samting long yumi mas stap wanbel. Bihainim daireksen i kam long brens ofis long kantri bilong yu. (Hib. 13:17) Planti taim ol elda i mas skelim gen arensmen em kongrigesen i mekim bilong redim ol pablisa long taim bilong disasta, na tu, ol i mas skelim daireksen i kam long oganaisesen long wanem samting ol i mas mekim taim wanpela disasta i laik kamap. (1 Kor. 14:​33, 40) (2) Strongim bel, tasol was gut. (Prov. 22:3) Bihainim savetingting. No ken mekim ol samting we hevi inap painim yu. (3) Bilip na wetim Jehova i helpim yu. Tingim olsem Jehova i tingim tru laip bilong yu na ol bratasista bilong yu. Em i ken helpim yu long givim gutpela helpim long ol bratasista bilong yu.

12-13. Yu kisim wanem skul long stori bilong Viktor na Vitalii? (Lukim tu piksa.)

¹² Tingim stori bilong Viktor na Vitalii, em tupela brata Kristen em ol i bin wok strong long bringim kaikai na wara samting i go long ol wanbilip bilong ol long Yukren. Viktor i tok: “Mipela i lukluk long olgeta hap bilong painim kaikai. Planti taim mipela i harim ol man i sutim gan klostu long mipela. Wanpela brata i givim ol kaikai long stua bilong em olsem donesen. Dispela donesen i helpim planti pablisa long i gat kaikai inap long ol i ken stap laip inap sampela haptaim. Taim mipela i wok long lodim ol samting i go insait long kar, wanpela bom i pundaun inap 20 mita longwe long mipela. Long dispela de olgeta, mi wok long beten strong long Jehova long strongim bel bilong mi, na bai mi ken wok yet long helpim ol pablisa.”

¹³ Vitalii i tok: “Bilong mekim dispela wok, mipela i mas i gat pasin bilong strongim bel tru. Fes taim mi mekim dispela raun, mi bin draiv inap 12-pela aua. Mi beten long Jehova long dispela raun bilong mi olgeta.” Vitalii i strongim bel long mekim olsem, tasol em i was gut tu. Em i tok moa olsem: “Mi wok long beten na askim Jehova long givim mi savetingting na pasin bilong bihainim gutpela tingting. Mi draiv tasol long ol rot we gavman i tok orait long en. Mi strongim bilip bilong mi taim mi yet i lukim hau ol bratasista i wok bung wantaim. Ol i rausim ol samting i pasim rot, ol i kisim na lodim ol rilif saplai, na ol i givim mipela kaikai na ples bilong slip taim mipela i mekim dispela raun.”

STAP GUT YET LONG JEHOVA

14. Taim wanpela yumi laikim tumas i no stap gut moa long Jehova, dispela inap mekim wanem long yumi?

¹⁴ Taim wanpela wanfamili o wanpela gutpela pren bilong yumi i lusim Jehova, dispela inap mekim yumi bel hevi moa winim ol narapela hevi yumi karim. (Sng. 78:40; Prov. 24:10) Taim yumi pas gut moa wantaim dispela man o meri, em bai hatwok moa long karim dispela hevi. Sapos kain samting olsem i bin painim yu na yu bel hevi, orait eksampel bilong Sadok long stap gut long God i ken strongim yu.

15. Wai na Sadok i mas strongim bel bilong stap gut yet long Jehova? (1 King 1:​5-8)

¹⁵ Sadok i stap gut yet long Jehova taim gutpela pren bilong em Abiatar i lusim Jehova. Dispela samting i kamap klostu long pinis bilong wok king bilong Devit. Taim Devit i lapun tru na klostu em i laik i dai, pikinini man bilong em Adoniya i traim long kisim wok king em Jehova i promis long givim long Solomon. (1 Sto. 22:​9, 10) Abiatar i makim olsem em i laik sapotim Adoniya. (Ritim 1 King 1:​5-8.) Taim Abiatar i mekim olsem, em i no stap gut long Devit, na tu, em i no stap gut long Jehova! Yu inap piksaim long tingting bikpela bel hevi tru em Sadok i pilim? Winim 40 yia samting, Sadok na Abiatar i bin wok gut wantaim olsem ol pris. (2 Sml. 8:17) Ol i bin lukautim “Bokis Kontrak bilong God” wantaim. (2 Sml. 15:29) Pastaim, dispela tupela man wantaim i bin sapotim wok king bilong Devit na ol i mekim planti narapela wok tu.—2 Sml. 19:​11-14.

16. Wanem samting i helpim Sadok long stap gut yet long Jehova?

¹⁶ Sadok i stap gut yet long Jehova, maski Abiatar i no stap gut long Jehova. Devit i no gat tupela tingting long pasin bilong Sadok long stap gut long em. Taim Devit i kisim save long samting Adoniya i plen long mekim, em i makim Sadok, Natan, na Benaia long anointim Solomon i kamap king. (1 Kin. 1:​32-34) Sadok i bin stap wantaim ol man em ol i stap gut long lotuim Jehova, olsem Natan na ol narapela man em ol i bin sapotim King Devit, na dispela i bin strongim em tru. (1 Kin. 1:​38, 39) Taim Solomon i kamap king, em i “makim pris Sadok long kisim ples bilong Abiatar.”—1 Kin. 2:35.

17. Olsem wanem yu ken bihainim pasin bilong Sadok sapos wanpela yu laikim tumas i no stap gut moa long Jehova?

¹⁷ Olsem wanem yu ken bihainim pasin bilong Sadok? Sapos wanpela yu laikim tumas i mekim disisen long lusim Jehova, orait soim Jehova olsem yu laik stap gut long em. (Jos. 24:15) Jehova bai strongim yu long bihainim stretpela pasin. Bilip na wetim em i helpim yu long rot bilong beten na poroman gut wantaim ol wanbilip em ol i stap gut long God. Jehova i tingim tru pasin bilong yu long stap gut long em na em bai givim yu gutpela pe long yu mekim olsem.—2 Sml. 22:26.

18. Yu kisim wanem skul long stori bilong Marco na Sidse?

¹⁸ Tingim stori bilong Marco na meri bilong em Sidse, em tupela bikpela pikinini meri bilong ol i lusim tok i tru. Marco i tok: “Kirap long taim ol pikinini bilong yu i bon, yu laikim ol tru. Na yu bai mekim olgeta samting bilong lukautim ol na bai bagarap i no ken painim ol. So taim ol i mekim disisen long lusim Jehova, dispela i save brukim tru lewa.” Em i tok moa olsem: “Tasol Jehova i bin sapotim mipela. Em i save strongim mipela, na taim mi no gat strong, meri bilong mi i gat strong, na taim em i no gat strong, mi gat strong.” Sidse i tok: “Mipela inap long karim dispela hevi, long wanem, Jehova i bin givim mipela strong em mipela i nidim. Mi wok long kisim tingting olsem em asua bilong mi, so mi tokim Jehova long samting mi pilim. I no longtaim i go pinis, wanpela sista em mi no bin lukim em inap planti yia, em i kam long mi na em i putim han antap long solda bilong mi na em i lukluk long ai bilong mi na em i tok: ‘Tingim Sidse, em i no asua bilong yu!’ Jehova i helpim mi na long dispela rot, mi inap holimpas yet amamas bilong mi long mekim wok bilong em.”

19. Yu tingting strong long mekim wanem samting?

¹⁹ Jehova i laik bai olgeta wokman bilong em i gat strongpela bel wankain olsem Sadok. (2 Tim. 1:7) Tasol em i no laik yumi bilip long strong bilong yumi yet. Em i laik bai yumi bilip na wetim em i helpim yumi. So taim wanpela hevi i painim yu na yu mas strongim bel, orait askim Jehova long helpim yu. Yu ken bilip tru olsem em bai helpim yu long strongim bel wankain olsem em i bin helpim Sadok!—1 Pita 5:10.