Ol Lapun—Yupela i Gutpela Samting Tru Long Kongrigesen

Ating krismas bilong yu i go antap na yu no inap mekim planti samting em yu bin mekim bipo. Yu stap gut long mekim wok bilong Jehova inap planti yia, tasol ating yu gat tingting kranki long yu yet bikos sindaun bilong yu i mekim na nau yu no inap mekim planti samting. Olsem, ating yu skelim ol wok yu mekim long nau wantaim ol wok yu mekim long pastaim. Sapos olsem, orait yu ken mekim wanem bilong daunim kain tingting olsem?

SAMTING JEHOVA I LAIK YU MAS MEKIM

Askim yu yet, ‘Jehova i laik mi mas mekim wanem?’ Tok bilong Lo 6:5 i ken mekim gut bel bilong yu, em i tok: “Yupela i mas laikim Jehova, God bilong yupela. Yupela i mas laikim em long bel olgeta bilong yupela na long laip olgeta bilong yupela na long strong olgeta bilong yupela.”

Olsem dispela ves i kamapim, Jehova i laik bai yu lotuim em long bel olgeta, laip olgeta, na strong olgeta bilong yu. Taim yu tingim dispela tok, dispela inap helpim yu long sakim pasin bilong skelim yu yet wantaim ol narapela o skelim ol samting yu inap mekim long nau wantaim ol samting yu bin mekim long bipo.

Tingim dispela: Taim yu yangpela, yu bin givim wanem samting long Jehova? Planti wokman bilong Jehova bai tok olsem ol i bin givim bes bilong ol long mekim wok bilong em. Ating yu tu i bin givim bes bilong yu long Jehova taim yu yangpela, na dispela i stret long sindaun bilong yu long dispela taim. Sapos olsem, orait long nau yu inap givim wanem samting long Jehova? Long nau yu givim bes bilong yu long Jehova we i stret long sindaun bilong yu na em samting yu inap long mekim long nau. Sapos yu holim kain tingting olsem, yu bai luksave olsem yu wok long givim bes bilong yu long Jehova long nau wankain olsem yu mekim long pastaim. Yu givim bes bilong yu long mekim wok bilong em long bipo, na yu wok long givim bes bilong yu long nau tu.

YU KEN HELPIM GUT OL NARAPELA

I gat narapela samting em yu mas tingim: No ken tingim krismas bilong yu olsem samting i pasim yu long mekim ol wok, yu ken tingim dispela olsem rot i op long yu ken helpim ol narapela. Olsem wanpela Kristen i gat bikpela krismas, yu ken mekim ol samting long nau em yu no inap long mekim taim yu yangpela. Olsem, yu ken mekim ol dispela samting:

Serim ekspiriens bilong yu wantaim ol narapela. Tingim ol dispela tok long Baibel em ol bilipman i bin mekim:

King Devit: “Bipo mi yangpela na nau mi lapun pinis, tasol mi no bin lukim God i givim baksait long stretpela man, na mi no bin lukim ol pikinini bilong em i sot long kaikai.”—Sng. 37:25.

Josua: “Harim! Klostu nau bai mi dai. Long bel olgeta bilong yupela na long laip olgeta bilong yupela, yupela i save pinis olsem i no gat wanpela tok bilong ol gutpela tok promis em Jehova, God bilong yupela, i bin autim i popaia. Olgeta dispela tok promis i kamap tru long yupela. I no gat wanpela promis i bin popaia.”—Jos. 23:14.

Ating yu tu i bin mekim ol wankain tok olsem. Devit na Josua i stori long ol samting i bin kamap long laip bilong ol. Bikos dispela tupela gutpela wokman bilong Jehova i stori long ol samting ol i lukim na harim insait long planti yia ol i mekim wok bilong Jehova, olsem na ol tok bilong ol i gat bikpela mining long en.

Sapos yu mekim wok bilong Jehova inap planti yia pinis, yu tu i ken stori long ol ekspiriens bilong yu long ol blesing em yu bin kisim. Yu tingim wanpela gutpela memori we Jehova i bin blesim lain bilong em? Sapos olsem, orait yu ken stori long ol narapela long dispela! Dispela inap strongim ol wankain olsem em i bin strongim yu. Na tingim olsem taim ol narapela i harim ol ekspiriens bilong yu long mekim ol wok bilong Jehova, yu inap strongim tru ol long dispela rot.—Rom 1:​11, 12.

Narapela rot yu ken strongim ol narapela em long go long ol miting bilong kongrigesen, sapos yu inap long mekim olsem. Long dispela hap, yu inap helpim ol wanbilip na yu yet bai kisim helpim tu. Connie, em yumi stori pinis long em, em i tok: “Taim mi go long ol miting, dispela i save daunim bel hevi bilong mi. Mi save amamas tru taim mi pilim pasin laikim bilong ol bratasista long Haus Kingdom. Mi traim long soim olsem mi pilim tru pasin laikim bilong ol long rot bilong givim ol liklik presen long ol. Na tu, mi laik wok yet wantaim ol bratasista bilong mi long mekim ol wok bilong sapotim kongrigesen.”

JEHOVA I TINGIM TRU OL GUTPELA WOK YU MEKIM

Baibel i stori long planti manmeri em Jehova i laikim ol maski sindaun bilong ol i mekim na ol i no inap mekim bikpela wok moa bilong em. Tingim Simeon, em wanpela man Israel husat i gat bikpela krismas, em i bin stap laip taim Jisas i bon. Long ol taim we Simeon i save go long tempel, ating em i save lukim ol yangpela man i mekim ol bikpela wok long dispela hap. Yu ting Simeon i holim wanem tingting long em yet? Ating em inap tingim olsem krismas bilong em i go antap na Jehova i no inap yusim em moa long mekim ol bikpela wok. Tasol Jehova i no holim kain tingting olsem long em. Em i tingim Simeon olsem “man bilong mekim stretpela pasin na daun long God” na Em i blesim em taim em i larim em i lukim bebi Jisas. Na tu, Jehova i yusim Simeon long mekim tok profet olsem Jisas em i dispela Mesaia em God i tok promis long salim i kam! (Luk 2:​25-35) I klia tru olsem Jehova i no tingim tasol bikpela krismas bilong Simeon, em i tingim moa strongpela bilip bilong em, na “holi spirit i stap long em.”

Yu tu i ken bilip tru olsem Jehova i tingim tru pasin bilong yu long stap gut long em na mekim wok bilong em, maski sindaun bilong yu i pasim yu long mekim bikpela wok moa. Long ai bilong Jehova “man i ken givim samting em i gat, na em i no gat wok long givim samting em i no gat.”—2 Kor. 8:12.

So putim tingting long ol samting yu inap long mekim. Olsem, tingim ol narapela narapela rot bilong autim tok em yu inap insait long en, maski yu mekim olsem insait long liklik haptaim tasol. Yu ting yu inap strongim ol narapela long rot bilong ringim ol na stori liklik wantaim ol o salim wanpela kat long ol? Ol liklik samting yu mekim bilong soim olsem yu laikim ol, dispela inap strongim tru ol wanbilip bilong yu na moa yet taim ol i kisim helpim i kam long wanbilip husat i mekim wok bilong Jehova inap planti yia.

Krismas, helt, na sindaun inap pasim sampela lapun long mekim bikpela wok moa olsem long bipo. Lukim wanpela ekspiriens long Is Afrika long blok “Dispela i Seivim Laip Bilong Em.”

Yupela i ken tingim olsem gutpela eksampel bilong yupela long stap gut long Jehova na mekim wok bilong em inap planti yia, dispela i strongim ol narapela. Yupela i stap gutpela piksa long pasin bilong sanap strong, na yupela i ken bilip tru olsem “God i no man bilong mekim pasin i no stret na bai em i lusim tingting long ol wok yupela i bin mekim na pasin bilong yupela long laikim tru nem bilong em. Yupela i bin helpim ol manmeri holi, na yupela i wok yet long mekim olsem.”—Hib. 6:10.

SAPOS INAP MEKIM YET OL WOK

Ol wok painimaut i soim olsem planti manmeri i gat bikpela krismas em ol i mekim ol wok bilong helpim ol narapela, ol i gat gutpela helt, tingting bilong ol i sap, na ol i stap laip longpela taim moa winim ol narapela.

Em tru olsem ol gutpela wok yumi mekim i no inap pinisim olgeta ol hevi bilong kamap lapun. Kingdom Bilong God tasol bai pinisim tru sin i stap long yumi we i mekim yumi kamap lapun na yumi dai.—Rom 5:12.

Wok bilong Jehova yu mekim, olsem helpim ol narapela long kisim save long em, dispela i strongim bilip bilong yu na inap lukautim tu helt bilong yu. Yupela ol lapun bratasista, plis yupela i ken save tru olsem Jehova i tingim tru ol gutpela wok bilong em yupela i bin mekim na pasin bilong yu long holimpas bilip i mekim yu dia tumas long kongrigesen.