Helpim Ol Narapela na Daunim Hevi Bilong Pilim Wanpis—Baibel i Tok Wanem

Ol manmeri long olgeta hap bilong graun i pilim olsem ol i no save long ol narapela na ol i pilim wanpis. Sampela saveman bilong helt i bilip olsem pasin bilong helpim ol narapela bai helpim man long daunim dispela hevi.

• “Taim yumi helpim ol narapela husat i nidim helpim, yumi bai pilim olsem laip bilong yumi i gat as bilong en na dispela bai helpim yumi long daunim hevi bilong pilim wanpis o ol narapela i no save long yumi.”​—U.S. National Institutes of Health.

Baibel i kamapim ol gutpela skultok long ol samting yumi inap mekim bilong helpim ol narapela. Taim yumi bihainim ol skultok bilong en, dispela bai helpim yumi long daunim hevi bilong pilim wanpis.

Samting yu ken mekim

Strongim bel. Painim rot long lusim taim long stap wantaim ol narapela, moa yet bung stret wantaim ol. Redi long serim ol samting yu gat. Taim yu mekim olsem, ol bai amamas long pasin bilong yu, na dispela bai strongim pasin pren bilong yupela.

• Stiatok bilong Baibel: “Bihainim pasin bilong givim ol samting long ol man, na ol bai givim ol samting long yupela.”​—Luk 6:38.

Yusim Taim na Strong Long Helpim Ol Narapela. Painim rot long helpim ol lain i karim hevi. Yu ken mekim olsem taim yu putim yau long ol o mekim sampela samting bilong helpim ol na bai ol inap karim hevi.

• Stiatok bilong Baibel: “Trupela pren i save helpim yumi long olgeta taim.”​—Provep 17:17, Contemporary English Version.

Sapos yu laik save long hau bai yu inap strongim pasin pren bilong yu wantaim ol narapela, ritim atikol “Famili na Pasin Pren.”