Mekim Vidio Konferens Bilong Ol Kongrigesen Miting

Planti gavman long olgeta hap bilong graun i putim lo olsem i mas i gat sosel distensing, na tu, ol i stopim ol manmeri long mekim ol bikpela bung. Ol Witnes Bilong Jehova i tingting strong long bihainim ol dispela lo, tasol long wankain taim ol i wok yet long mekim ol bung bilong lotu. Bilong mekim olsem, ol kongrigesen i yusim ol vidio konferens aplikesen, kain olsem Zoom, bilong mekim ol miting.

Bilong ol kongrigesen i ken mekim ol miting bilong ol long olgeta taim, Gavening Bodi i tok orait long yusim mani em ol i kisim long rot bilong donesen long baim ol Zoom akaun bilong ol kongrigesen. Dispela i bin helpim tru sampela kongrigesen em ol i no inap long baim wanpela vidio konferens akaun em pe bilong en inap olsem K50 i go K68 samting o moa. Planti taim ol dispela kongrigesen i yusim ol fri aplikesen, tasol dispela i limitim namba bilong ol manmeri i konekt long taim bilong miting, na tu, i no seif tumas long yusim. Tasol nau, olgeta kongrigesen em ol i yusim ol Zoom akaun em oganaisesen i bin baim bilong ol, ol i ken lukautim gut sekiuriti bilong dispela akaun, na tu, planti manmeri moa inap long bung long taim bilong ol miting. Stat long taim bilong lok-daun i kam inap nau, winim 65,000 kongrigesen long winim 170 kantri i wok long yusim ol dispela akaun.

Kairagi Kongrigesen long Manado, North Sulawesi, Indonesia i stop long yusim wanpela fri vidio konferens aplikesen na ol i stat long yusim wanpela Zoom akaun em oganaisesen i bin baim. Brata Hadi Santoso i tok: “Ol bratasista em ol i no save tumas hau long yusim wanpela fon o teblet samting, nau ol i ken enjoim ol miting; wanpela risen em bikos i no gat wok long ol i mas konekt inap planti taim long taim bilong wanpela miting.”

Lester Jijón, Jr., em wanpela elda long Guayacanes Oeste Kongrigesen long Guayaquil, Ekwado, em i tok: “Planti bratasista ol i stap rabis, olsem na em bai hatwok tru long sampela kongrigesen long baim laisens bilong yusim Zoom we inap alauim kongrigesen olgeta long konekt long taim bilong miting. Nau, oganaisesen i givim helpim, olsem na mipela i yusim wanpela Zoom akaun na nau planti manmeri moa inap konekt fri long taim bilong miting, na tu, mipela i no pret olsem mipela bai abrusim limit.”

Johnson Mwanza em wanpela elda long Ngwerere North Kongrigesen long Lusaka, Sambia, em i tok: “Planti taim, planti bratasista i tok olsem, ‘oganaisesen i stretim rot bilong mekim ol miting long Zoom na dispela i helpim mipela long pilim olsem mipela i pas gut moa wantaim ol bratasista, na tu, mipela i pilim olsem Jehova i laikim tru mipela na i lukautim mipela.’”

Oganaisesen i yusim mani em ol i bin basetim bilong helpim wok bilong disasta rilif long baim ol dispela Zoom akaun. Ol dispela mani i kam long rot bilong ol donesen em ol bratasista i givim long olgeta hap bilong graun. Planti i mekim ol dispela donesen long rot bilong donate.jw.org. Tenkyu tru long ol kontribiusen bilong yupela, dispela i helpim tu ol disasta rilif wok i kamap long olgeta hap bilong graun.​—2 Korin 8:14.