Bikpela Pusi Bilong Bus
Wanpela man bilong “Kirap!” long Surinam i raitim dispela stori
MITUPELA meri bilong mi i raun long ka long wanpela rot insait long bikbus, na long wanpela rot baut mitupela i bungim wanpela bikpela pusi bilong bus, em man bilong hait gut insait long bus; long dispela hap ol i save kolim penitigri. Nem tru bilong en, em jagua. Skin bilong en i yelo na braun, na i gat ol blakpela makmak i stap long olgeta hap bilong en, na taim san i holim, skin bilong en i lait moa.
Lain Indian bilong bipo ol i lukim skin bilong dispela traipela pusi i gutpela tru na ol i tok em i wanpela god! Ol i tok, ol dispela makmak i olsem ol sta i stap antap. Na long nau sampela man i tok, jagua em i nambawan animal bilong Saut Amerika. Longpela bilong jagua man em inap olsem 1.8 mita, long nus i go inap long as bilong en, na hevi bilong en em inap olsem 110 kilogram! Em i gat raunpela het na strongpela lek na bikpela han; em i strongpela animal tru.
Taim mipela i wok long lukim dispela jagua, isi isi em i wokabaut i go; arere bilong tel bilong en i blakpela na i tanim i go antap. Em i wokabaut i go insait liklik long bus na i sanap i stap, na nau i hatwok long lukim em, long wanem skin bilong en i wankain kala olsem bilong bus taim san i kam insait long en, na long graun i gat hap san i lait na hap tewel bilong ol lip samting.
I no planti man i save lukim jagua, long wanem em i save hait gut insait long bikbus. Planti bikpela bus i stap long hap bilong Surinam, olsem na em i gutpela hap bilong ol jagua.
Mak Bilong En
Taim jagua i wokabaut, mak bilong lek bilong en i stap. Wanpela man i tok, “Mi lukim mak bilong lek bilong jagua long graun malumalum long nambis bilong solwara Atlantik, na long boda bilong Brasil mi lukim mak bilong jagua long as bilong ol diwai, em jagua i bin sapim pinga bilong en long ol dispela diwai.” Sampela man i tok, jagua i save mekim olsem bilong makim hap bus i bilong em yet.
Wanpela man i gat 83 krismas, em James Brown, em i tok, “Dispela tok i stret.” Bipo em i gat wok long kisim ol man na raun long bus. Em i tok: “Planti taim mipela lukim ol diwai em jagua i bin skrapim, na nau mipela i save, i gat jagua i stap klostu.” Na ol jagua i save skrapim diwai na bai ol i ken sapim kapa bilong pinga bilong ol.
Na taim jagua i raun em i save putim smel bilong en i stap nabaut, na pekpek tu. Wanpela saveman nem bilong em Alan Rabinowitz, em i bin wok inap 2-pela yia bilong kisim save long pasin bilong ol jagua, na em i tok, jagua i save bikpela hap bus bilong em yet, inap olsem 40 i go inap 100 skwe kilomita, na em i putim ol mak long arere bilong dispela hap graun. Olsem na i no planti man i save lukim ol jagua! Tasol sapos yumi bungim olgeta stori bilong ol man i save liklik long ol jagua, yumi ken save long sampela pasin bilong ol.
I Stap Bilong Ol Jagua
San i laik i go daun na ol binatang i wok long krai, na ol pisin i singsing, na ol monki i singaut singaut. Tasol harim! Nek bilong narapela samting i kamap, na nau ol binatang na pisin na monki samting ol i no singaut moa na pairap. Ol i pret na siksti ol i go hait nabaut. Dispela strongpela nek i kamap gen, em i samting bilong pret long en olsem krai bilong laion. Nau wanpela strongpela jagua man i wokabaut i kam.
Dispela hap bilong ol jagua i gat ol bikbus na ol wara na ples tais—em i save laikim kain ples olsem. I gat kain kain bikpela pusi bilong bus, tasol jagua i moa laikim wara, winim ol dispela narapela pusi. Em i save pilai long wara, na em i save kisim pis long wara. Em i save subim wara i go stret long narapela hapsait bilong wara. Het na baksait na arere bilong tel i stap antap long wara. Wanpela saveman, em Heinz Heyde, em i tok: “Ol jagua i save gut long subim wara. Ol i subim strong wara na dispela i kirapim si. Mi bin lukim ol i brukim wara long hap wara i save pundaun!”
Taim jagua i brukim wara na i kamap long narapela hapsait bilong en, em i lusim wara na i go antap na i meknaisim skin bilong en na rausim wara long en. Nau em i go slip long wanpela diwai i stap long arere bilong wara na em i lukluk i go daun long wara. Wantu em i subim han bilong en i go insait long wara na em i hukim wanpela pis na pulim i kam antap.
Mista Heyde i tok, “Wanpela nait mun i lait na mi lukim jagua i wok long kisim bikpela pis inap olsem 1-pela mita. Em i paitim strong tru na tromoi i go antap, na pis i flai i go pundaun baksait long jagua inap olsem 5-pela mita. Jagua em i strongpela animal!” Wanpela man, em Pieter Teunissen, em tu i wanpela saveman bilong ol animal samting, em i tok, “Mi bin lukim mak long wesan bilong nambis na mi save, wanpela jagua i bin tromoi wanpela bikpela trausel i go antap na i pundaun inap olsem 4-pela mita.”
Jagua i gat strong na em inap mekim planti samting tu. Em inap kisim kaikai long 3-pela hap—long wara, na long bus, na long diwai. Taim em i wokabaut insait long wara o em i go antap long diwai, strongpela kapa bilong pinga i helpim em long mekim olsem—em kain olsem ol su i gat nil em ol man i save putim taim ol i wokabaut i go antap long ol traipela maunten. Taim em i wokabaut long graun em i pulim ol pinga i go insait na bai lek i no pairap long graun taim em i kam klostu long wanpela abus, long wanem, aninit long lek i olsem matres.
Tasol man bilong raunim abus em i no ken les kwik—em i mas wet wet i stap, na em i mas ran spit, na em i mas skelim gut taim bilong i go holim abus. Na i wankain tu long jagua. Olsem na mama i mas lainim pikinini inap 2-pela yia samting na bai pikinini i save long pasin bilong kisim abus. Taim ol pikinini i gat 6-pela wik pinis, ol i save raun wantaim mama, tasol ol i save hait long hap i gat bikpela bus na mama yet i go painim abus.
Isi isi em i bihainim arere bilong wara na nau em i lukim sampela kapibara i stap, em ol i wanpela kain rat i bikpela tru olsem wanpela pik. I no gat narapela rat long dispela graun i bikpela olsem dispela kapibara. Isi isi jagua i go klostu long ol, na nau em i slip long bel na lukluk i stap. Em i no meknais liklik; arere bilong tel tasol i meknais. Tasol dispela lain kapibara i pilim olsem i gat birua i stap, na ol i sut i go insait long wara. Tasol i no planti taim jagua i save lus long holim kapibara; klostu olgeta taim em i save kisim wanpela. Olsem na ol i save kolim dispela kapibara olsem “kaikai bilong jagua.”
Jagua i save kaikai planti ol narapela abus tu, olsem ol liklik agauti, na bikpela tepa, na pokupain, na trausel, na pukpuk. Na sampela taim jagua i save lusim bus na i kam long ol bikpela banis bulmakau. Wanpela dokta bilong ol animal samting, em Ronnie Kranenburg, em i tok: “Klostu liklik long taun wanpela jagua i pait wantaim wanpela bulmakau mama na pikinini bilong en.” Tasol ol lapun jagua tasol i mekim olsem, em ol yangpela jagua i bin rausim ol long bus, o ol man i bin sutim ol long gan na ol i gat sua long skin na i no gat strong.
Olsem wanem? Ol jagua i save raunim ol man tu na kaikai? Dispela dokta bilong ol animal i tok, “Nogat.” Na dispela saveman, em Teunissen, em i wanbel long dispela tok. Em i tok, wanpela taim long nait em i wokabaut painim kiau bilong trausel long nambis, na taim em i tanim na i laik i kam bek, long lait bilong sutlam em i lukim ol mak bilong lek bilong jagua i stap antap long mak bilong lek bilong em yet, na nau em i save, wanpela jagua i bin bihainim em! Tasol jagua i ranawe tasol na i no mekim wanpela samting long dispela man.
Mista Teunissen i tok, “Ol jagua i save kaikai trausel, olsem na taim mi raun long nambis long nait bilong painim ol kiau bilong trausel, mi save pret liklik. Taim mi tromoi wesan bilong painim kiau, pairap bilong en i kain olsem trausel i wokim hul long wesan bilong putim kiau. Olsem na bilong pretim jagua, mi save sutim nabaut lait bilong sutlam; mi laik bai jagua i save, trausel i no save holim sutlam; olsem na em i ken save, mi wanpela man—mi no trausel.”
Ol i Hait na Kilim Ol Jagua
Ol man i save kilim i dai planti jagua bilong kisim skin bilong ol. Wanpela bikman bilong wanpela dipatmen bilong gavman (Jaques Berney) i tok, klostu ol i pinisim ol jagua. Olsem na i tambu long wok bisnis long skin bilong ol jagua.
Wanpela nius (Focus) i tok, ol man i wok yet long kilim ol jagua, maski i gat tambu long mekim. Ol i kilim ol long wanem? Ol i save kisim skin bilong ol. Ol meri i save laikim tumas ol klos bilong taim bilong kol em ol i wokim long skin bilong jagua i gat gutpela makmak long gras bilong en. Ol man i save raun long bikbus bilong Amason long nait na sutim ai bilong jagua long lait bilong sutlam, na nau jagua i no inap lukluk; em nau, ol i sutim em long gan long het bilong en.
Dispela nius (Focus) i tok, kwiktaim ol i tekewe skin bilong en na mekim drai, na ol i save pulimapim long ol bokis samting na raitim toksave olsem “Kofi” na ol i salim hait i go long Yurop. Sampela man i tok, ol i save kilim olsem 6,000 jagua long olgeta yia.
Tasol long hap bilong Surinam i gat planti jagua liklik ol i stap yet. Em gutpela tru, nogut ol man i pinisim ol dispela bikpela pusi bilong bus i gat gutpela makmak long skin bilong ol na ol i save hait gut long ol bikbus.
[Piksa Kredit Lain long pes 14]
H. Armstrong Roberts