Ol i Kisim Gutpela Gras Olsem Wanem?
OL PISIN ol i kolim rola ol i planti long hap sentral na saut bilong Afrika. Planti taim ol i sindaun long diwai o long waia telefon arere long rot. Long ol dispela ples antap ol inap lukim gut ol samting na bai ol i no hatwok tumas long kisim binatang samting bilong kaikai.
Sapos yu raun long kantri Botswana o Simbabwe, ating bai yu inap lukim wanpela blupela samting i flai spit i go—em dispela pisin tasol. Dispela tok rola long tok Inglis i makim samting i tantanim, olsem na nem rola i stret long dispela pisin, long wanem, taim ol i flai, sampela taim ol i tantanim nabaut na ol gutpela kala kala bilong gras i kamap ples klia. Gras bilong wing i gat 4-pela kain blupela kala na i gat blakpela na braunpela kala tu. Kala bilong bros i retpela liklik na pes i gat olsem yelopela na waitpela gras, na het bilong en i grinpela. Yumi kirap nogut long kain kain gutpela kala bilong dispela pisin, a? Orait, yumi laik save, ol i kisim dispela gutpela gras olsem wanem?
Sapos yu lukim gut lek bilong pisin rola bai yu lukim samting kain olsem grile i karamapim skin bilong lek—lek i no gat gras. Ol man bilong bilip olsem yumi kamap long rot bilong ol binatang samting ol i tok ol snek i bin senis senis na kamap pisin, na grile bilong snek i kamap olsem gras bilong pisin. Yu ting dispela tok i stret?
Tingim dispela samting: Gras bilong pisin em i wanpela gutpela samting tru. Namel long wanpela gras i gat wanpela samting olsem bun, na i gat planti planti liklik gras olsem han i pas long arere arere bilong bun. Sapos wanpela samting i mekim na hap gras i op, pisin bai mekim long maus bilong em na pasim bek dispela gras, olsem yumi save pasim sen, olsem sipa, i stap long klos bilong yumi. Wanpela buk (Integrated Principles of Zoology) i tok olsem.
Orait yumi tingim dispela planti ol liklik liklik gras bilong pisin na yumi tingting: Ol dispela gutpela gras inap kamap nating? Yu ting ol saveman bilong saiens i painim pinis sampela samting bilong makim olsem wanpela grile bilong snek i bin senis na kamap wanpela gras bilong pisin? Dispela buk i tok moa olsem: ‘Tru, ol pisin bilong nau i gat hap grile long skin bilong ol (ating long lek bilong ol) na ol i gat gras tu, tasol taim ol i glasim gut ol pisin bilong bipo em ol i dai pinis na ol pisin bilong nau, ol i no painim wanpela samting i olsem hap snek na hap pisin wantaim, o hap grile i wok long senis na i kamap gras bilong pisin, nogat.’
Tru tumas, gras bilong pisin i kamapim long ples klia olsem i gat wanpela Man i stap bilong wokim olgeta samting, na em i save gut tu long pasin bilong putim ol gutpela gutpela kala wantaim. Ol pisin olsem dispela pisin rola ol i insait long ol lain “pisin” em ol i “litimapim nem bilong [Jehova],” em i God tru.—Buk Song 148:7, 10-13.
[Piksa Kredit Lain long pes 25]
National Parks Board of South Africa