Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g97 11/8 p. 26-27
  • Pisin Kren—I Gat Kala Kala na i Mekim Danis

No gat vidio bilong dispela seksen.

Sori, popaia kamap long lodim vidio.

  • Pisin Kren—I Gat Kala Kala na i Mekim Danis
  • Kirap!—1997
  • Ol Liklik Het Tok
  • Wankain Infomesen
  • Ol i Lukautim Pikinini
  • Danis Bilong Pisin
  • Ol i Wok Long Abrusim Bagarap
  • Ol i Kisim Gutpela Gras Olsem Wanem?
    Kirap!—1991
  • Ol Pisin Bilong Danis i Lait Olsem Paia
    Kirap!—2003
Kirap!—1997
g97 11/8 p. 26-27

Pisin Kren—I Gat Kala Kala na i Mekim Danis

WANPELA MAN LONG KENYA I RAITIM DISPELA STORI BILONG KIRAP!

PISIN kren i gat kangal long het bilong em, em i wanpela naispela pisin tru. Em i gat kala kala na lukluk bilong em i gutpela tru. Longpela bilong em i winim wan mita, na em i gat longpela pul na longpela nek.

Lukluk bilong kren man na kren meri i wankain. Gras bilong baksait bilong kren i blakpela, na gras bilong pul i waitpela na i kamap yelopela klostu long hap bilong tel. Sampela narapela gras bilong pul i braunpela.

Lukluk bilong pes bilong kren i naispela. Pes i waitpela, na gras i stap long het na aninit long maus em i malumalum na i blakpela. Ai i blupela. Wanpela longpela retpela hap skin i hangamap i stap namel long blakpela gras aninit long maus. Taim kren i surikim nek i go longpela, dispela hap skin i meknais. Wanpela naispela samting tru bilong dispela pisin em ol yelopela gras i sanap long het bilong em olsem wanpela hat. Ol dispela longpela gras i lait tumas taim san i holim. Tupela lek bilong pisin i blakpela, na i longpela olsem stik.

Krai bilong dispela pisin em i wanpela krai ol man long Afrika i no save lusim tingting long en: O-wahng! O-wahng! O-wahng! Ol man i stap longwe ol inap harim dispela strongpela krai. Taim tupela poroman kren i flai i go o flai i kam long diwai ol i save sindaun long en, planti taim tupela i save singaut wantaim. Long sampela taim long yia, inap olsem 30 kren i save bung wantaim na mekim gutpela singsing.

Ol i Lukautim Pikinini

Yumi ken ting olsem tupela poroman kren i stap wantaim i go inap long taim ol i dai. Ol i stap long planti hap bilong Is Afrika, na planti ol i stap long ples tais na wokim haus na kamapim pikinini. Ol i wokim bikpela haus bilong ol long gras na pitpit em ol i hipim i go antap na i kamap olsem pletfom bilong pisin meri i ken putim 2-pela o 3-pela kiau​—⁠ol kiau i bikpela na i grinpela liklik. Pisin man na pisin meri i senis senis long sindaun long ol kiau, na insait long wanpela mun ol pikinini i lusim kiau. Papamama i wok wantaim long givim kaikai long ol pikinini na lukautim ol, na taim samting i kamap i laik bagarapim ol, papamama i no pret long helpim ol.

Ol kren i save kaikai binatang, rokrok, snek, na ol pikinini bilong diwai. Ol i save mekim wok long longpela lek na ol bikpela pinga bilong ol na paitim strong graun, na taim ol liklik animal i lusim gras, em nau, ol i kamap kaikai bilong kren.

Danis Bilong Pisin

Ol kren i givim bel long mekim naispela danis em ol man i amamas long lukim. Ol i wokim bikpela pul bilong ol i gat kala kala, na isi isi ol i go antap na isi isi ol i kam bek long graun olsem wanpela parasut i pas long ol. Ol i kalap nabaut nabaut na ran i go raunim poroman bilong ol, na taim ol i mekim olsem, het bilong ol i wok long go antap na kam daun gen hariap. Ol i sanap stret na opim bikpela pul bilong ol na kamapim ol gutpela gutpela kala bilong en.

Sampela taim tupela pisin i save tanim nek bilong ol na narapela i lukim narapela. Maus bilong narapela i go klostu long maus bilong narapela na ol i krai liklik​—⁠i olsem narapela i mekim singsing long narapela. Orait nau ol i sanap stret gen, na kirap gen long mekim gutpela danis bilong ol.

Ol i Wok Long Abrusim Bagarap

Ol kren i laikim ol man na ol man i no hatwok tumas long bosim ol. Kala na lukluk bilong ol i gutpela tru na ol i mekim gutpela danis ol man i save amamas long en, olsem na taim ol man i go long banis bilong ol animal ol i gat bikpela laik long lukim ol kren, na planti man i laik kisim ol kren bilong bilasim banis bilong ol yet. Tru tumas, planti man i laik kisim kren, olsem na lain kren i wok long i go liklik. Na i gat sampela samting moa i mekim nogut long ol kren, olsem: ol man i wok long pinisim ol ples tais bambai ol i ken mekim sampela wok bilong ol yet long dispela hap graun, na ol i mekim wok long marasin i gat gip na marasin bilong kilim i dai ol binatang na dispela i bagarapim ol raunwara na ol liklik wara.

Sori tumas sapos wanpela taim i kamap na i no gat moa dispela naispela kren. Tasol Baibel i tok promis olsem klostu nau olgeta hap bilong graun bai kamap nupela. (Skelim wantaim 2 Pita 3:13.) Long dispela taim, olgeta man long graun bai amamas long ol gutpela samting God Jehova i bin wokim, na ol bai amamas long dispela pisin i gat kala kala na i mekim danis.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim