Ol Pisin Bilong Danis i Lait Olsem Paia

WANPELA MAN LONG KENYA I RAITIM DISPELA STORI BILONG KIRAP!

KRAI bilong planti tausen pisin. Ol i amamas na ol i wok long singaut singaut long wanpela raunwara long bikbus. Planti tausen pinkpela pisin i wokabaut long wara we kala bilong en i olsem grinpela ston emeral. Planti i pulap antap long skai na ol i flai gut tru. Ol i flai baut baut na taim ol i meknaisim wing bilong ol, ol i soim retpela gras bilong ol. Man! Ol dispela kala kala pisin i luk smat stret, ating no gat narapela samting i save flai i winim ol​—⁠em ol dispela pinkpela pisin flamingo long Great Rift Valley bilong Afrika.

Longpela Naispela Lek

Long bipo yet ol man i bin laikim pisin flamingo, long wanem, em i naispela pisin. Ol i bin katim piksa bilong longpela nek bilong en long ol ston na yu inap lukim long ol rait bilong ol Isip bilong bipo. Lukluk bilong en i narapela kain na ol Isip i laikim tru dispela pisin olsem na ol i ting pisin i makim stret god Ra na ol i lotuim em. Na ol i wokim piksa bilong longpela lek na nek bilong flamingo long ol banis insait long ol hul bilong ol maunten.

Long nau i gat fopela kain flamingo na ol i stap long Afrika, Karibian, Yurop-Esia, na Saut Amerika. Wanpela kain flamingo em i liklik tru. Em i gat naispela kala, wing bilong em i pink na lek bilong en i retpela. Narapela em bikpela flamingo na em i winim liklik flamingo inap tupela taim na em i longpela inap 140 sentimita. Olgeta flamingo i gat wanpela samting i wankain​—⁠maus bilong ol i krungut liklik long namel na i gutpela long lukim.

Taim em i kirap long flai, em i save paitim wing bilong em na raun hariap tru i go na bai em inap long flai i go antap long skai. Taim ol i flai het na longpela nek i sut stret i go long fran na lek i sut stret long baksait na lukluk bilong em taim em i flai i naispela tru. Moa long 4 milion flamingo i stap long Great Rift Valley bilong Afrika.

Pisin i No Gat Strong i Stap Long Hap i Gat Hatwok

Bikpela lain flamingo ol i stap long Great Rift Valley long ol raunwara i gat wanpela kain sol ol i kolim sodium carbonate. Dispela ol raunwara i narapela kain na taim yu holim yu bai pilim olsem em i gat wel long en na em bai kukim skin bilong yu liklik. Long dispela hap san i hat nogut tru na hat bilong em inap go antap inap 65 digri. Strongpela smel bilong salfa na wara i sol i pulap long win. Sol i pulap tru long wara na dispela i mekim na i gat planti waitpela sol samting i stap long arere bilong wara.

I no gat planti samting inap stap laip long kain wara olsem. Tasol i gat ol liklik grinpela mosong inap stap long ol dispela raunwara. San i save hatim wara na dispela i mekim na mosong i go bikpela long dispela hap. Mosong i pulap long wara na dispela i mekim wara i kamap grinpela. Olsem ston emeral i stap long nekles, ol dispela grinpela raunwara i bilasim ol ples daun na ol maunten bilong Great Rift Valley.

Yumi kirap nogut olsem kain animal olsem flamingo i no gat strong em inap stap long kain ples i no gutpela. Tasol pisin flamingo i stap gut tru long dispela hap. Longpela bun lek bilong em i no kisim bagarap long wara i gat marasin. Na lek bilong en i olsem bilong pato na dispela i mekim na em i no inap go insait long graun malumalum. Bodi bilong liklik flamingo i stret tru long i stap long dispela ples nogut. Maus bilong em i gat ol liklik tret tru i save helpim em long kisim wara na sipim ol liklik binatang i stap insait long wara i no daun tumas, olsem 5-pela i go 7-pela sentimita. Na taim flamingo i kaikai em i save tanim maus bilong em i go baksait na putim maus bilong em aninit liklik long wara. Tang bilong flamingo i save kisim wara na subim i go long ol liklik tret tru bai em i sipim na kisim ol binatang.

Taim Ol i Poroman Wantaim

Taim san i kam antap long moning i olsem wanpela man i opim laplap bilong windo bilong larim san i kam insait long rum. San i lait na i soim bikpela lain flamingo ol i stap antap long raunwara na ol i lait olsem paia. Ol i pas pas wantaim. Na ol i apim nek bilong ol i go antap na wokabaut wantaim long wan wan grup, na tanim tanim maus bilong ol i go i kam long tupela sait.

Taim ol wan wan grup bilong pisin i wokabaut na abrusim ol narapela grup, lait bilong san i kisim gras bilong ol na i kamapim kala ret na pink. Ol i kalap kalap na danis, na opim wing bilong ol i go bikpela na soim retpela gras i stap long wing bilong ol. Ol i raun antap long wara i go na ol i kirap flai i go antap, taim ol i mekim olsem ol i soim dispela ol kala bilong ol, tasol bihain ol i kam daun na mekim gen wankain pasin. Ol flamingo i pas pas tru olsem na wanpela pisin tasol i no inap long kirap na flai, em i mas wet inap long ol pisin i stap long fran tru i kirap long flai. Ol i amamas na ol i wok long singaut singaut na mekim bikpela nois tru.

Bihain taim tudak i kamap ol pisin i kirap na flai i go. Ol i save flai inap planti handet kilomita i go inap ol i kamap long hap ol i laik go long en​—⁠em wanpela raunwara i gat sol long en na em i gutpela ples bilong putim kiau na mekim bikpela long ol pikinini. Ol narapela flamingo long ol raunwara i gat sol long Great Rift Valley ol tu i save mekim olsem long wankain taim.

Luk Nogut na Bihain Kamap Naispela

Ol flamingo i save wokim haus bilong putim kiau bilong en long ol raunwara i stap longwe long ol narapela animal na i hatwok long painim. Em i bikpela samting long dispela ples i stap longwe olsem, long wanem, ol flamingo i save pret. Sapos wanpela samting i mekim ol i pret, ol papamama bai lusim ol kiau na ol bai i no inap kam bek.

Ples bilong putim ol kiau bai bisi tru. Ol papamama bai kirap long wokim haus. Ol bai kisim graun malumalum, pekpek bilong pisin, na sampela gras bilong pisin na wokim haus antap long wara inap olsem 40 sentimita. Na ol bai wokim liklik hul long en na putim kiau long en na bai wara i gat sol i no inap kisim kiau. I no longtaim na ol kiau i bruk na i gat planti tausen pikinini flamingo. Planti tausen papamama i flai i go kam long ples pikinini flamingo i stap long en bilong givim kaikai long ol pikinini i hangre.

Taim ol pikinini flamingo i bikpela inap long wokabaut, wantu papamama bai lusim ol na flai i go long narapela hap bilong raunwara, em long dispela hap i gat planti mosong long en. Long dispela hap ol i no gat wok long lukautim ol pikinini, na ol inap kaikai na kisim bek strong bilong ol. Sampela flamingo i bikpela pinis ol i stap bek na bungim olgeta liklik pikinini flamingo long wanpela hap na ol i lukautim ol. Ol dispela pisin i bikpela pinis bai was gut long ol na kisim ol pikinini flamingo i go bungim ol papamama bilong ol. Yumi kirap nogut, long wanem, maski ol pikinini flamingo i planti tru ol papamama bilong ol wan wan inap luksave long ol pikinini bilong ol na wok yet long lukautim ol.

Ol pikinini flamingo ol i no wankain olsem ol naispela papamama bilong ol. Lek na nek bilong ol i sotpela na maus bilong ol i no krungut na gras bilong ol i waitpela. Bihain lek bilong ol bai wok long i go bikpela na nek bilong ol bai i go longpela na maus bilong ol bai stat long i go krungut. Tupela i go tripela yia bai lus pastaim na bihain pikinini flamingo bai kamap naispela flamingo i lait olsem paia. Em bai painim wanpela poroman na tupela bai bung wantaim olgeta flamingo em ol i stap olsem bilas bilong ol raunwara i gat sol long Great Rift Valley.

Dispela pisin flamingo i naispela tru na em i soim stret olsem Man i bin wokim ol i gat bikpela save tru. Taim yumi lukim dispela pisin yumi amamas long lukim na harim krai bilong en. Tasol dispela i mekim bikpela samting moa yet long yumi, em i mekim yumi amamas moa yet na laikim dispela Man i bin wokim ol, em God Jehova.

[Piksa long pes 29]

Bikpela flamingo

[Piksa long pes 29]

Liklik flamingo

[Ol Piksa long pes 30]

Ol pikinini flamingo i no wankain olsem ol naispela papamama bilong ol