Flamingo​—Ol Naispela Pisin

Wanpela man long Spen i raitim dispela stori bilong Kirap!

I GAT planti pisin flamingo long ol narapela narapela hap, tasol sampela pasin bilong ol yumi no save long en. Lek bilong ol i hevi tasol lek i naispela. Ol i laik stap wanpis, tasol ol i save bung bung. Tru tumas, pisin flamingo i narapela kain tru.

Planti man i save long dispela pisin. Long ol rait bilong ol Isip bilong bipo, na long ol piksa ol i wokim long ol banis insait long ol hul bilong ol maunten, yumi inap lukim mak bilong dispela pisin. Tasol yumi no save long olgeta samting bilong en. Ples bilong putim kiau i stap hait, na yumi save long sampela tasol. Na pisin man na meri flamingo i wankain, olsem na ol saveman i mas kisim liklik tul na putim i go insait long pisin bilong save husat i man na husat i meri.

Longpela lek na nek bilong dispela pisin i mekim na skin bilong en i olsem i hevi. Em inap tantanim nek olsem nek i wanpela gumi. Tasol taim em i wokabaut long wara i no daun tumas, o putim het insait long wara na painim kaikai, em i mekim olsem skin i no hevi. Na taim em i kirap na flai, em i naispela tru.

I no gat planti animal i naispela tru olsem lain pisin flamingo taim ol i kirap na flai. Ol i gat retpela o blakpela pul na bros bilong ol i retpela liklik na waitpela.a Taim dispela lain pisin i kirap isi isi na flai i go antap, ol i olsem planti tausen fen i gat kain kain kala i meknais wantaim. Na taim ol i stap pinis antap, pasin bilong ol long flai i olsem ol i danis.

I no planti taim ol man inap lukim ol pisin flamingo i bung na flai wantaim. Dispela pisin i no gat pasin birua; ol yet i laik bung wantaim. Ol i no laik stap long ol ples i gat planti narapela kain pisin, olsem na planti bilong ol i bung long ol raunwara i longwe.

Pasin Bilong Ol i Narapela Kain Tru

Bilong kisim sampela save moa long ol dispela pisin, wanpela man bilong Kirap! i bin givim ol askim long Manuel Rendón, em bos bilong wanpela ples bilong lukautim sampela animal na pisin long Spen.

Pisin flamingo i gat strong o nogat? ‘Ol i gat strong. Ol i amamas long stap long ol raunwara antap long ol maunten Andis, em ples ol narapela pisin i no inap i go long en. Long Afrika i gat sampela raunwara ol i amamas long go long en, tasol wara bilong ol i hat na i gat marasin insait long en inap long kukim skin bilong yumi. Tasol skin long lek bilong dispela pisin i strong, olsem na lek i no inap bagarap.’

Wanem samting i bikpela hevi bilong ol? ‘Em long painim gutpela ples bilong putim kiau. Ol i mas i gat gutpela raunwara na wara i no daun tumas na i no meknais liklik. Na wara i mas i gat ol liklik ailan na long ol dispela ailan ol i ken wokim haus bilong ol. Long nau i no gat planti ples olsem. Long olgeta hap bilong wes Mediterenian, i gat tupela ples tasol inap long ol dispela pisin​—wanpela long Spen na wanpela long Frans.b

‘Long hia ol dispela pisin i gat narapela hevi. San i strong tumas long dispela hap, olsem na taim ol pikinini flamingo i no flai yet dispela raunwara i save drai hariap.’

Sapos raunwara i drai olgeta, wanem samting i save painim ol dispela pisin? ‘Sampela taim mipela yet i mas kapsaitim wara insait long dispela raunwara. Sapos mipela i no mekim olsem, olgeta pisin bai lus. Mipela save sapos i gat 6-pela hekta graun wara i karamapim, dispela em inap. Ol papamama flamingo tasol i mas go longwe liklik inap sampela kilomita na painim kaikai. Ol flamingo i save tromoi bikpela hap taim long go i kam​—painim kaikai na karim kaikai i kam bek. Ol i lusim ol liklik pikinini wantaim sampela bikpela pisin flamingo, na ol dispela pisin i save lukautim ol.’

Wanem ol narapela samting yu kisim save long en? ‘Mipela i bin putim liklik mak long sampela pisin flamingo, olsem na mipela save long pasin bilong ol long raun. Long taim bilong kol, ol i no save go wantaim long narapela kantri olsem ol narapela pisin i save mekim. Ol i save lusim wanpela hap na go long narapela hap bilong painim kaikai. Olsem na wanpela pisin bai go long Spen long taim bilong san na long Not Afrika long taim bilong kol, tasol narapela bai go long Spen long taim bilong kol na long Not Afrika long taim bilong san. Ating yumi ken tok ol i pisin bilong raun, tasol ol i raun long painim kaikai tasol.

‘Tasol mipela i save, taim mipela lukautim ol dispela pisin, ol i save kamap planti. Paslain long 1980 samting, sampela tasol i kam wan wan taim long hia bilong kamapim pikinini. Tasol namba bilong ol i go antap liklik, long wanem, mipela ol man i no bin go klostu tumas long ol, na mipela i no larim raunwara i drai o wara i go antap tumas inap long taim ol liklik pikinini flamingo inap flai. Long 1988 klostu 10,000 pikinini flamingo i kamap long dispela hap.’

Gutpela Samting God i Wokim

I no planti man inap lusim tingting long ol pisin flamingo sapos ol i bin lukim ol long ples tru bilong ol. Long sampela hap i gat planti bilong dispela pisin, long wanem, ol i save hait long ol longwe ples, na tu, i gat sampela man i save lukautim ples bilong ol na ol man i no inap bagarapim ol.

Sapos i no gat ol naispela animal na pisin samting bilong amamasim yumi, ating graun i no gutpela ples bilong sindaun long en, a? Olsem na dispela naispela pisin flamingo i wankain long ol narapela pisin​—ol i save litimapim nem bilong Jehova.​—Song 148:​10, 13.

[Ol Futnot]

[Piksa Kredit Lain long pes 25]

Photos top and bottom: Zoo de la Casa del Campo, Madrid