Kaba—Em Naispela Klos Bilong Ol Afrika

WANPELA MAN LONG GANA I RAITIM DISPELA STORI BILONG KIRAP!

KABA​—⁠yu inap lukim dispela klos long olgeta hap bilong Gana na long ol kantri i stap klostu long hap bilong Wes Afrika. Ol meri i save putim long ol bikpela de, olsem long taim bilong planim daiman o long ol bung bilong lotu. Na kaba i gat kain kain stail na kala.

Tasol kaba em i wanem samting? Em i wanpela stail bilong klos em planti meri i save putim. Dispela nem i makim wanpela klos i kirap long nek na i go daun long namel. Tasol ol i no save putim nating. Ol i save putim wantaim wanpela laplap longpela bilong en i olsem tupela mita, na ol i kolim waks prin o java prin. Dispela laplap ol i kolim asetam na ol i pasim long namel na em i longpela inap long lek daunbilo. Tasol kaba i kamap stret tasol sapos ol i pasim wantaim narapela hap laplap longpela bilong en i olsem tupela mita na ol i kolim nguso. Dispela hap laplap i gat narapela narapela wok bilong en​—⁠ol inap pasim long het o ol inap pasim long baksait bilong karim bebi.

Kaba em i wanpela gutpela klos ol Afrika tasol i save pasim, tasol long ol narapela narapela hap bilong Afrika ol i gat narapela narapela nem bilong en. Ol Laibiria i kolim lappa. Long Benin ol i kolim genwu. Ol Siera Leon i kolim docket na lappa. Tasol i no longtaim i go pinis ol Afrika i no bin save long kaba. Hia long Gana, ol meri i save mekim tok ples Akan i bin putim klos long stail ol i kolim dansenkran. Long dispela stail ol i pasim tupela hap laplap, sampela taim ol i gat wankain kala na mak long en. Wanpela laplap ol i raunim long namel na pasim long let. Namba tu laplap, planti taim em i longpela moa, ol i putim antap long sol long han kais i kam long bros na i go long baksait. Taim ol i pasim dispela klos, planti taim ol i wokim wanpela narapela kain stail long gras ol i kolim tu dansenkran.

Taim masin bilong samapim klos i kamap, sampela meri bilong Afrika i kirap long samapim klos i klostu wankain olsem klos long hap bilong Wes. Ol i mekim olsem bilong karamapim sol bilong ol olsem ol meri long hap bilong Wes i mekim. I gat wanpela stori i tok, sampela i gat hatwok long kolim dispela tok “karamapim sol,” olsem na dispela tok “karamapim” i kamap kaba tasol.

Wokim Kaba Long Stail

Maski ol meri i wok long ofis o long gaden, olgeta i save pasim yet kaba. Na nau ol kampani i save salim i go long narapela hap tu! Tasol i no longtaim na planti meri i kirap long laikim kaba.

Wanpela samting i olsem: I no olgeta meri i bin laikim dispela stail bilong kaba bilong 40 yia samting bipo. Wanpela meri i gat 62 krismas, bipo em i mekim wok welfe na nem bilong em Agnes, em i tokim Kirap! olsem, sampela stail bilong bipo ol i “nogut tru.” Na long sampela meri, bilong pasim stret kaba wantaim asetam na nguso bilong en, em i bikpela wok tumas long i stap isi na pasim stret. Elizabeth, em i lukautim wanpela faktori bilong wokim klos, em i tok: “I hatwok long mipela ol yangpela meri long lain long pasin bilong pasim gut asetam na nguso. Mi no bin lain gut long pasim.”

Stail bilong klos i makim meri i bin go long bikpela skul o nogat, olsem na planti meri i no laikim moa kaba. Serwah, em i gat 65 krismas, em i tokim Kirap!, inap long nau planti man i ting olsem klos bilong hap bilong Wes em i bilong ol savemeri tasol na kaba i bilong ol meri i no bin skul.

Tasol nau ol man i kirap tingim gen ol pasin bilong bipo, na dispela i kirapim planti meri bilong Afrika long tingim gen kaba. Ol lain bilong wokim klos ol tu i wokim kaba i kamap stail moa bilong kirapim ol meri long laikim. Wanpela samting ol i mekim, ol i kirap wokim wanpela nupela klos ol i kolim slit. Ol i wokim olsem sket tasol em i longpela inap long lek daunbilo, dispela i helpim sampela meri em bipo ol i gat hevi long pasim stret asetam na nguso. Long ol so tu ol i save kamapim kaba olsem em i nambawan naispela klos.

Wankain olsem ol klos bilong planti kantri, ol i wokim sampela nupela stail bilong kaba bilong kirapim bel bilong ol man. Clara, em i gat 69 krismas, em i tok, pasin bilong kamapim kaba i no haitim gut skin i wok long pinisim “wok tru bilong kaba,” em bilong ‘karamapim sol tu.’ Olsem na ol meri Kristen i mas tingim tok bilong aposel Pol, em i tok, “Mi laik bai ol meri i mas putim ol gutpela klos samting, inap tasol long ol.”​—⁠1 Timoti 2:9; 1 Korin 10:⁠29.

Long ol meri i save skelim gut klos, kaba em i naispela na i stret long olgeta kain wok. Na maski ol man i no save putim moa planti narapela klos bilong ol Afrika, kaba i stap yet olsem klos i kamapim klia pasin na ples bilong ol Afrika long wanpela gutpela rot.

[Piksa long pes 24]

Nguso, long hia ol i mekim wok long en bilong karamapim het

[Piksa long pes 25]

Nguso, mekim wok long en bilong karim pikinini