Pasin Bilong Pasim Gutpela Klos i Kamapim Olsem Yumi Daun Long God
1 Klostu nau bai Jehova i singautim yumi long i go long 2003 “Givim Biknem Long God” Kibung Distrik. Man! Yumi amamas tru long Jehova i singautim yumi long kain bikpela kaikai bilong spirit! Long klos na bilas yumi pasim, yumi inap kamapim olsem yumi daun long em na yumi amamas long ol gutpela samting bilong spirit em i givim long yumi.—Sng. 116:12, 17.
2 Stap Klin na Stretim Gut Ol Samting: Bilas bilong yumi i mas kamapim olsem yumi bihainim pasin bilong God bilong yumi, em i klin na i save stretim gut ol samting. (1 Ko. 14:33; 2 Ko. 7:1) Yumi yet, gras bilong yumi, na kapa bilong ol pinga bilong yumi i mas i stap klin, na yumi mas bilas gut. Nau planti man i no save bilas gut. Maski ol hapman bilong ol piksa wokabaut na pilai spot i no bilas gut, i no gat as long ol Kristen i bilas narapela kain. Sapos yumi bihainim ol stail bilong dispela graun, ol man bai hatwok long luksave olsem husat i mekim wok bilong God tru na husat i no mekim wok bilong em.—Mal. 3:18.
3 Klos i Stret Long Ol Wokman Kristen: Taim aposel Pol i raitim pas i go long wasman Kristen Timoti, em i tok “ol meri i mas putim ol gutpela klos samting, inap tasol long ol. . . . Ol meri i laik bihainim tok bilong God, ol i mas mekim ol kain kain gutpela wok. Dispela em i bilas tru bilong ol.” (1 Ti. 2:9, 10) Bilong klos bilong yumi i stret yumi mas skelim gut ol samting. Ol klos i mas stret na klin—no ken pulim ai na kirapim bel bilong narapela.—1 Pi. 3:3.
4 Na tu, Paul i givim tok lukaut long ol meri i no ken “bilasim gras na skin bilong ol long ol kain kain bis na bilas gol na ol klos i dia tumas.” (1 Ti. 2:9) Ol meri Kristen i mas bihainim gutpela tingting na no ken putim tumas planti ring gol samting, putim planti lipstik samting, na pasim planti tumas ol narapela kain bilas.—Snd. 11:2.
5 Tok kaunsel Pol i givim long ol meri Kristen i stret tu long ol man Kristen. Ol brata i no ken bihainim ol stail bilong dispela graun. (1 Jo. 2:16) Olsem: Long sampela kantri planti man i laikim ol klos i bikpela tumas, tasol dispela kain klos i no stret long wanpela wokman bilong God.
6 Long Taim Bilong Malolo: Taim ol brata sista i stap long kibung, klostu olgeta i stap olsem gutpela piksa long klos na bilas ol i pasim. Tasol ol ripot i kamapim olsem sampela i slek long pasin bilong ol long bilas long taim ol i go kam long kibung long PMV samting o long taim bilong malolo bihain long program. Pasin bilong yumi long bilas—long taim bilong program na long ol narapela taim—inap mekim sampela samting long tingting ol man i kisim long lain bilong God. Yumi save pasim ol kat bilong kibung, olsem na long olgeta taim yumi mas pasim klos i stret long ol wokman Kristen. Planti taim dispela i kirapim ol narapela long tok amamas long yumi na i opim rot long autim tok.—1 Ko. 10:31-33.
7 Taim yumi smail pes bilong yumi i lait gut, olsem tasol taim yumi pasim gutpela klos na yumi bilas gut, dispela i litimapim tok yumi autim na oganaisesen bilong yumi. Sampela em ol i lukim yumi long “Givim Biknem Long God” Kibung Distrik long dispela yia, ating ol i laik save bilong wanem yumi stap narapela kain na ol bai tok: “Mipela i harim [na lukim] olsem God i stap wantaim yupela . . . Olsem na mipela i laik kamap wanlain wantaim yupela.” (Sek. 8:23) Long klos na bilas yumi pasim, yumi olgeta wan wan i laik kamapim olsem yumi daun long Jehova.
[Askim Bilong Stadi]
1. Olsem wanem yumi inap kamapim olsem yumi amamas long kibung distrik bai kamap?
2. Bilong wanem em i bikpela samting long yumi mas i stap klin na bilas gut?
3. Olsem wanem yumi ken save olsem bilas bilong yumi i stret wantaim tok kaunsel long 1 Timoti 2:9, 10?
4, 5. Ol man na meri Kristen i mas bihainim wanem tok lukaut?
6. Bilong wanem yumi mas pasim gutpela klos na bilas gut taim yumi go kam long kibung, na taim yumi stap long kibung, na bihain long program bilong wan wan de?
7. Pasin bilong yumi long pasim gutpela klos na bilas gut inap mekim wanem long ol narapela?
[Blok long pes 6]
Pasim Klos i Stret
▪ Taim yu go kam long kibung
▪ Long taim bilong kibung
▪ Long taim bilong malolo