Bilas Ol Man i Ken Amamas Long En
1 “Ol Witnes Bilong Jehova i nambawan gutpela lain! Ol lain bilong yupela i save mekim gut long ol man na ol i bilas gut, na ol i save rispek long ol man.” Wanpela mausman bilong hotel i tok olsem long ol bratasista long wanpela kibung distrik long las yia. Long narapela kibung, wanpela wokmeri bilong hotel i tok: “Em i klia tru olsem lain bilong yupela i save bilas bilong amamasim God.” Tru tumas, ol man i save lukluk long ol bratasista i go long kibung. Olsem na yumi laik bilas long pasin i ‘stret na i bihainim tru gutnius,’ na planti taim dispela i kirapim ol man bilong ausait long mekim gutpela tok long yumi na kamapim klia olsem yumi wokman bilong God. (Fl. 1:27) Taim yumi redim ol samting bilong go long kibung distrik, yumi mas tingting gut long ol klos yumi bai putim.
2 Disaipel Jems i tok: “Ol man i kisim kain gutpela tingting na save i kam long God, ol i save . . . bihainim klinpela tingting.” (Jem. 3:17) Tru, i hatwok long kamapim klinpela tingting na pasin i stret long klos na bilas bilong yumi. Ol lain nogut bilong dispela graun i stap aninit long Satan i save kirapim ol manmeri long putim ol narapela kain bilas i no stret na i save kirapim bel bilong ol man. (1 Jo. 2:15-17) Olsem na taim yumi skelim wanem kain klos yumi bai putim na pasin bilong bilasim skin, yumi mas bihainim tok bilong Baibel long “lusim pasin bilong givim baksait long God na long lusim olgeta laik nogut bilong dispela graun, na . . . tingting gut na wokabaut stret . . . namel long ol manmeri bilong dispela graun.” (Ta. 2:12) Yumi no laik bai bilas bilong yumi i bagarapim bel bilong ol narapela, maski ol i brata bilong yumi o ol wokman bilong hotel na haus kaikai, o ol narapela man i lukim yumi.—1 Ko. 10:32, 33.
3 Pasim Ol Klos i Stret: Taim yu redim ol klos samting bilong kibung, askim yu yet: ‘Klos bilong mi i stret, o em i pulim ai bilong ol man? Klos bilong mi i soim olsem mi rispek long tingting bilong ol narapela? Nek bilong klos i go daun tumas o klos i sot tumas? Ol dres bilong mi i no haitim gut skin na i pas? Ol klos bilong mi i klin na i no gat smel nogut long en? Taim mi go baim kaikai long moning o apinun o taim mi malolo bihain long program, klos na bilas bilong mi bai makim olsem mi wanpela wokman bilong God? O klos mi pasim em i bruk bruk, o em i bikpela tumas, o em i nupela kain stail na i no stret long wanpela brata o sista i kam long kibung na i pasim kat bilong kibung? Klos mi pasim long taim bilong malolo em bai mekim na mi sem long autim tok long kain kain taim na ples?’—Ro. 15:2, 3; 1 Ti. 2:9.
4 Tingting bilong ol strongpela Kristen long ol klos yumi pasim, dispela inap helpim yumi. Ol meri marit i mas askim man bilong ol, ol narapela bai ting olsem wanem long klos bilong ol. Ol papamama i stap aninit long God ol inap helpim ol bikpela pikinini bilong ol long dispela samting. Na tu, ol sista i lapun liklik ol i ken “skulim . . . ol yangpela meri bai [ol] i bosim gut tingting bilong ol yet, na ol bai i stap klin tru” long bilas bilong ol na “ol man bai i no inap tok nogut long tok bilong God.” (Ta. 2:3-5) Ol buk na nius bilong yumi i gat ol piksa i makim stretpela pasin bilong bilas.
5 Litimapim Nem Bilong Jehova: Ol kibung distrik i givim rot long yumi olgeta—i no ol lain i mekim tok long pletfom tasol—long givim biknem long Jehova. Tru, gutpela pasin Kristen na toktok bilong yumi bai givim biknem long em. Tasol namba wan samting em planti man i save lukim long yumi em pasin bilong yumi long bilas na stretim gut skin. I gutpela yumi olgeta i litimapim nem bilong Jehova long pasin bilong yumi long pasim bilas ol man i ken amamas long en.—Sng. 148:12, 13.
[Askim Bilong Stadi]
1. Taim yumi redim ol samting bilong go long kibung distrik, bilong wanem yumi mas tingim ol klos yumi bai putim?
2. Bilong wanem i hatwok long putim ol klos na bilasim skin long pasin i stret long mekim?
3. Wanem ol askim bai helpim yumi long skelim gut bilas bilong yumi?
4. Olsem wanem ol narapela i ken helpim yumi long pasim bilas i stret?
5. Olsem wanem yumi olgeta inap litimapim nem bilong Jehova long taim bilong kibung?
[Blok long pes 10]
Ol Samting Bilong Helpim Yumi Long Bilas Long Pasin i Stret
◼ Tok Bilong God
◼ Skelim yumi yet
◼ Tingting bilong ol narapela
◼ Ol buk na nius Kristen