Askim
◼ Yumi mas werim wanem kain klos taim yumi go long ol haus we ol i mekim wok bilong Jehova?
Long olgeta hap bilong graun, ol Haus Kingdom, ol Haus Kibung, na ol Haus Betel, ol i spesel ples em ol i bin dediketim bilong mekim wok bilong Jehova. Ol i no gat olkain bilas long en, ol i klin, na ol samting i stap stret. Dispela em i narapela kain olgeta long ol samting i stap long dispela graun bilong Satan. Ol manmeri husat i save go long ol dispela ples we ol i mekim wok bilong Jehova, ol narapela i mas lukim ol olsem ol i bilong Jehova na ol i mekim laik bilong em.
Yumi ol Kristen, yumi “stap wokman bilong God” long olgeta wokabaut bilong yumi, na klos yumi pasim na bilas bilong yumi tu i insait long dispela. (2 Ko. 6:3, 4) Na tu, yumi mas bihainim stretpela pasin. Long olgeta taim, klos na bilas bilong yumi i mas i stret na i soim rispek olsem ol wokman bilong God Jehova. Dispela em i bikpela samting taim yumi visitim ol brens ofis.
Long ol samting bilong klos na bilas, buk Oganaisesen Bilong Mekim Laik Bilong Jehova i tok em i bikpela samting long yumi stap klin long skin, pasim klos i stret, na komim gut gras samting taim yumi mekim wok autim tok na go long ol miting Kristen. Na long pes 138, paragraf 3, em i tok: “Tingim, nem Betel i makim ‘Haus Bilong God.’ Olsem na klos, bilas, na pasin yumi bihainim i mas wankain olsem long taim yumi go long ol miting bilong mekim lotu long Haus Kingdom.” Ol pablisa i mas bihainim dispela tok taim ol i go lukim Betel, maski ol i stap klostu long Betel o ol i kam long ol ples i stap longwe. Long dispela rot, pablisa i soim tenkyu bilong em na i soim pasin rispek.—Sng. 29:2.
Ol klos bilong yumi i mas kamapim klia olsem yumi ol man bilong “bihainim tok bilong God.” (1 Ti. 2:10) Gutpela klos na bilas bilong yumi bai helpim ol narapela long rispek long lotu i tru bilong Jehova. Tasol wan wan bratasista taim ol i visitim ol haus we ol i mekim wok bilong Jehova, ol i werim ol klos bilong raun nating, o ol klos i hangamap long skin, o i pas tumas na i no haitim gut skin. Long olgeta taim, kain bilas olsem i no stret long ol Kristen i pasim. Long dispela samting, wankain olsem ol narapela samting long i stap bilong yumi olsem Kristen, yumi gat laik long holimpas ol stretpela lo i mekim yumi stap narapela kain long ol man bilong dispela graun—yumi mekim olgeta dispela samting bilong givim biknem long God.—Ro. 12:2; 1 Ko. 10:31.
Olsem na taim yu go visitim ol brens ofis, maski yu plen long visitim o yu go visitim taim yu raun long holide, askim yu yet: ‘Olsem wanem? Klos na bilas bilong mi i stret long mi ken i go long dispela ples i klin na i gat biknem em mi laik visitim? Klos bilong mi i litimapim nem bilong God mi lotuim? Klos bilong mi bai mekim ol narapela i tingting planti o i pundaunim ol?’ Gutpela sapos klos na bilas bilong yumi i “kirapim ol man long givim biknem long ol tok yumi save autim, em tok tru bilong God”!—Ta. 2:10.