Askim

◼ Taim yumi go lukim brens ofis, yumi mas bilas na stretim skin olsem wanem?

Taim yumi go long Betel, olsem go raun lukim Betel o sampela bratasista bilong famili Betel, “klos na gras na pasin bilong yumi i mas wankain olsem taim yumi go lotuim Jehova long ol miting long Haus Kingdom.” (om 131) Tasol mipela i bin lukim olsem taim sampela brata na sista i kam lukim brens ofis, ol i werim ol klos ol man i save werim bilong raun nating. Kain klos olsem i no stret taim yumi go lukim brens ofis. Klos na bilas bilong yumi i mas gutpela na i stret, na i kamapim klia gutpela pasin na nem bilong ol wokman bilong God Jehova.—1 Ti. 2:9, 10.

Dispela em i bikpela samting moa taim yumi go lukim brens ofis, long wanem, planti man husat i no Witnes i save lukluk long ol man i raun long Betel. Ol samting ol i lukim i stiaim ol dispela man long wokim tingting bilong ol long lain bilong God na oganaisesen bilong em. Em i gutpela long toktok wantaim ol Baibel sumatin na ol arapela husat i laik go lukim Betel na tokim ol long em i bikpela samting long bilas gut. Famili Betel bai amamas sapos yu mekim olsem.

Yumi ol wokman Kristen i mas was gut, nogut klos na bilas bilong yumi i pundaunim ol arapela. (2 Ko. 6:3, 4) Long rot bilong bilas gut, oltaim yumi “givim biknem long dispela tok yumi save autim, em tok tru bilong God, em Man bilong kisim bek yumi.”—Ta. 2:10.