Gutpela Savetingting Bilong God
1 Sampela man i ting ol Witnes Bilong Jehova i mas wok strong moa long mekim ol samting bilong daunim ol hevi ol manmeri i save karim long nau. Ol dispela man i no luksave long ol gutpela samting wok bilong yumi long skulim ol man long Baibel i save kamapim. Olsem aposel Pol i tok: “Tru, ol man i laik lus, ol i save ting tok bilong diwai [“pos,” NW] em i kranki toktok tasol. Tasol yumi manmeri God i wok long kisim bek yumi, yumi save, tok bilong diwai [“pos,” NW] em i strong bilong God.” (1 Ko. 1:18) Tru tumas, yumi save wok autim tok em i nambawan bikpela wok i kamap long graun long nau.
2 Gutpela Sindaun Moa Long Nau: Wok bilong ol man long stretim ol hevi i no bin kamap gutpela tumas. Ol lo i tambuim pasin raskol i no bin pinisim dispela samting. Ol kontrak bilong kamapim gutaim na ol lain bilong pinisim woa i no bin pinisim pasin bilong pait. Wok bilong ol man long kamapim gutpela sindaun i no bin pinisim pasin bilong stap rabis. (Sng. 146:3, 4; Jer. 8:9) Tasol tok bilong Kingdom i bin senisim laip bilong planti milion man long rot bilong helpim ol long kamap nupela man em God i ken orait long em. (Ro. 12:2; Kl. 3:9, 10) Taim ol i mekim olsem, sindaun bilong ol i kamap gutpela moa long nau.—1 Ti. 4:8.
3 Gutpela Sindaun Long Bihain: Savetingting bilong God i helpim yumi long karim hevi bilong nau, na tu, em i helpim yumi long wokabaut long pasin i helpim yumi long kisim ol gutpela samting long bihain. (Sng 119:105) Em i mekim na yumi no hatwok nating long stretim ol samting bilong dispela graun. (Sav. 1:15; Ro. 8:20) Yumi amamas tru long yumi no westim laip bilong yumi na wok strong long kisim ol samting i no inap kamap tru! Yumi tingting strong long tok promis bilong Jehova long em bai kamapim “nupela skai na nupela graun” em stretpela pasin tasol bai i stap long en. Taim de bilong kot bilong Jehova i kamap, em bai stap ples klia tru olsem ol man i bin bihainim savetingting bilong God ol i bin makim stretpela rot long bihainim.—2 Pi. 3:10-13; Sng. 37:34.
4 Ol man i givim bel long “save bilong ol man bilong graun” ol inap ting savetingting bilong God i no inap helpim man, tasol tru tru dispela rot tasol inap helpim ol. (1 Ko. 1:21; 2:6-8) Olsem na long olgeta hap bilong graun yumi wok yet long autim tok bilong God, em “wanpela tasol i gat save [“savetingting,” NW] tru.”—Ro. 16:27.