Amamas Long Ol Samting Yu Gat
1 Baibel i tok yumi mas lukautim famili bilong yumi long ol samting bilong skin, tasol dispela i no ken kamap olsem namba wan samting yumi tingting long en. Ol samting bilong spirit i mas i stap namba wan. (Mt. 6:33; 1 Ti. 5:8) I hatwok long skelim gut na mekim stret ol samting long dispela ‘taim bilong las de i gat planti hevi nogut tru.’ (2 Ti. 3:1) Wanem samting bai helpim yumi long mekim stret ol samting?
2 Bihainim Tok Bilong Baibel: Tok Bilong God i givim tok lukaut long yumi olsem pasin bilong wok strong long kisim mani kago inap bagarapim yumi long ol samting bilong spirit. (Sav. 5:10; Mt. 13:22; 1 Ti. 6:9, 10) Long dispela taim nau, em bai nogut tru sapos yumi tingting tasol long wok mani o ol arapela samting bilong skin na yumi putim ol wok bilong spirit—ol miting, stadi, na wok autim tok—i stap namba tu tasol. (Lu. 21:34-36) Baibel i tok: “Sapos yumi gat kaikai na laplap samting, orait yumi ken tok, ‘Em inap long mi.’ ”—1 Ti. 6:7, 8.
3 Dispela i no makim olsem ol Kristen i mas sakim ol samting na bai ol i stap rabis. Tasol em i helpim yumi long luksave long ol samting yumi mas kisim, olsem kaikai, klos, na haus yumi ken stap long en. Sapos yumi gat ol samting yumi mas kisim bilong stap laip, yumi no ken wok strong long kisim planti samting moa. Taim yumi tingting long baim wanpela samting o mekim sampela wok mani moa, gutpela sapos yumi askim yumi yet: ‘Tru tru mi mas kisim dispela samting?’ Taim yumi mekim olsem, dispela bai helpim yumi long bihainim dispela tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela.”—Hi. 13:5.
4 Sapos yumi bilip long Jehova, em bai helpim yumi. (Snd. 3:5, 6) Tru, yumi mas wok strong bilong kisim ol samting yumi mas kisim, tasol yumi no tingting long ol dispela samting tasol. Maski yumi gat liklik samting o planti samting, yumi bilip long Jehova bai inapim yumi na yumi no sot. (Fl. 4:11-13) Dispela bai mekim na yumi stap belgut na kisim planti arapela blesing tu.
5 Bihainim Bilip Bilong Ol Arapela: Long planti kantri we ol man i stap rabis, ol i save ting em i no pasin stil sapos ol i kisim ol samting long man husat i gat planti samting bilong ol i ken lukautim famili bilong ol long kaikai. Tasol ol man i gat bilip ol i sakim dispela tingting. Nambawan bikpela samting long ol em God i mas orait long ol na ol i wet long em i blesim stretpela pasin bilong ol. (Snd. 30:8, 9; 1 Ko. 10:13; Hi. 13:18) Wanpela meri long India em man bilong em i dai pinis, em i bin kisim save olsem pasin bilong givim bel long mekim wok na long traim kain kain rot long kisim wok mani, dispela i helpim em long kisim liklik samting em i mas kisim. Em i no bel nogut long em i stap rabis; em i save sapos em i putim Kingdom Bilong God wantaim stretpela pasin bilong Em i stap olsem namba wan samting long laip bilong em, Jehova bai blesim wok bilong em long painim kaikai samting inap long em wantaim pikinini man bilong em. Wanpela meri Kristen long Esia em man bilong em i dai pinis, em i tok: “Maski mi stap rabis, mi no bel nogut. Tok i tru bilong Baibel i givim gutpela tingting long mi.” Em i tok wanpela tok promis bilong Jisas i bin kamap tru long em. Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Mt. 6:33, Nupela Testamen na Ol Sam) Em i tok taim em i putim wok bilong God i stap namba wan samting long laip bilong em, oltaim em i save kisim ol samting em i mas kisim bilong i stap laip. Na wok Kristen bilong em i mekim na em i pilim olsem em i gat nem, na pasin bilong givim bel long dispela wok i helpim em long karim hevi bilong i stap rabis.
6 Wanpela elda na meri bilong em i bin mekim wok painia planti yia na long wankain taim ol i mekim bikpela long tripela pikinini. Olsem wanpela famili, ol i lain long amamas long ol samting ol i mas kisim na i no tingting long kisim ol samting ol i laik kisim. Brata i tok: “Mipela i no gat planti samting. Tru, sampela taim mipela i sot liklik, tasol Jehova i bin givim ol samting mipela i mas kisim. . . . Taim mi lukim famili bilong mi i putim ol samting bilong spirit i go pas, mi pilim olsem ol samting long laip bilong mipela i stap stret, na mi pilim olsem mi bin mekim gutpela wok.” Meri bilong em i tok: “Taim mi lukim [man bilong mi] i bisi long mekim ol wok bilong spirit, mi stap belgut tru.” Ol pikinini tu i amamas long papamama bilong ol i mekim wok bilong Jehova fultaim.
7 Olgeta man husat i makim rot bilong givim bel long God na i no wok strong long kisim ol samting bilong skin, Baibel i tok promis long ol bai kisim planti blesing long nau na long laip bai kamap bihain.—1 Ti. 4:8.
This is a repeat of article in km 10/02 entitled “Tingim Ol Samting Yu Holim Em Inap Long Yu” taken from km-E 6/02 “Be Content With What You Have.”