Skul Yumi Kisim Long Jehova i Win Tru
“Mi save long Krais Jisas . . . na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating.”—Fl. 3:8.
1, 2. Sampela Kristen i bin makim wanem rot long bihainim, na bilong wanem?
KIRAP long taim Robert i stat long go long skul, em i wanpela savemangi. Taim em i gat 8-pela krismas tasol, wanpela tisa i go long haus bilong em na i tokim Robert em inap mekim olgeta samting em i gat laik long mekim. Tisa i tok em i laik bai Robert i kamap wanpela dokta. Robert i kisim ol bikpela mak long haiskul na dispela i opim rot long em i ken go long ol yunivesiti i gat nem long kantri bilong em. Tasol Robert i no mekim olsem, em i laik mekim wok painia oltaim.
2 Olsem Robert, planti Kristen—maski ol i gat wanem krismas—ol i gat rot long kisim wanpela wok i gat namba. Sampela i no laik kisim, long wanem, ol i bin putim sampela mak bilong spirit ol i laik winim. (1 Ko. 7:29-31) Wanem samting i kirapim ol Kristen olsem Robert long givim bel tru long wok autim tok? Ol i laikim tumas Jehova, dispela em namba wan as, na tu, ol i luksave olsem skul ol i kisim long Jehova i win tru. Yu ting laip bilong yu bai i olsem wanem sapos yu no bin kisim save long tok i tru? Pasin bilong tingim ol gutpela blesing yumi kisim long skul i kam long Jehova, dispela bai helpim yumi long pilim tru tok bilong gutnius na givim bel tru long tokim ol narapela long en.
Em Gutpela Blesing Tru Long Kisim Skul i Kam Long God
3. Olsem wanem yumi ken save, Jehova i amamas long skulim ol man i gat sin?
3 Gutpela pasin bilong Jehova i mekim na em i amamas long skulim ol man i gat sin. Aisaia 54:13 i tok profet long ol Kristen God i bin makim, na i tok: “Bai mi yet mi skulim ol pikinini bilong yu, na bai ol i gat gutpela sindaun tru.” Dispela tok i stret tu long “ol arapela sipsip” bilong Krais. (Jo. 10:16) Dispela samting i kamap klia long wanpela tok profet i wok long kamap tru long nau. Aisaia i lukim long visen ol man bilong olgeta lain i kam long lotu i tru. Narapela i tokim narapela olsem: “Yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” (Ais. 2:1-3) Man! Em gutpela blesing tru long kisim skul i kam long God!
4. Yumi mas mekim wanem bilong kisim skul i kam long Jehova?
4 Yumi mas mekim wanem bilong kisim skul i kam long Jehova? Wanpela bikpela samting, em yumi mas i gat pasin daun. Devit, man bilong raitim song, i tok: ‘Bikpela i gutpela na i stretpela olgeta. Ol man i stap aninit long em, em i save skulim ol long rot bilong em.’ (Sng. 25:8, 9) Na Jisas i tok: “Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.” (Lu. 10:21) Yumi save God i save “marimari na mekim gut long ol man i daunim ol yet” na dispela i kirapim yumi long laikim em moa yet.—1 Pi. 5:5.
5. Wanem samting tasol i mekim na yumi bin kisim save long God?
5 Yu ting long save bilong yumi yet, yumi bin kisim save long God na long tok i tru? Nogat. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jo. 6:44) Long rot bilong holi spirit na wok autim tok, Jehova i kirapim ol man i gat pasin olsem sipsip, em “ol gutpela samting bilong olgeta lain,” na bringim ol i kam. (Hag. 2:7, NW) Yumi amamas tru olsem yumi bilong dispela lain Jehova i bin bringim ol i kam long Pikinini bilong em.—Ritim Jeremaia 9:23, 24.
Skul i Kam Long God Inap Helpim Man
6. Taim ol man i kisim ‘save long Bikpela’ dispela inap kamapim wanem gutpela samting long ol?
6 Long rot bilong wanpela naispela tok piksa, tok profet bilong Aisaia i stori long ol senis i kamap long pasin bilong ol man long nau. Ol man em bipo ol i man bilong pait, ol i kamap man bilong stap bel isi. (Ritim Aisaia 11:6-9.) Ol man em bipo ol i birua long ol narapela, long wanem, ol i bilong narapela skin o lain o kantri, nau ol i sindaun gut wantaim na stap wanbel. I olsem ol i bin “paitim ol bainat bilong ol i kamap olsem ol ain bilong brukim graun.” (Ais. 2:4) Wanem samting i bin helpim ol long senisim pasin bilong ol? Ol i bin kisim ‘save long Bikpela’ na bihainim dispela save long wokabaut bilong ol. Maski ol wokboi bilong God i no gutpela olgeta, ol i olsem wanpela bikpela lain brata i stap long olgeta hap. Tok bilong gutnius em samting ol man bilong olgeta lain i laikim na i save kamapim gutpela kaikai, na dispela i kamapim klia olsem skul i kam long Jehova i win tru.—Mt. 11:19.
7, 8. (a) Wanem sampela “strongpela banis” em skul i kam long God i bin helpim ol man long lusim? (b) Wanem samting i soim olsem skul i kam long Jehova i litimapim nem bilong em?
7 Aposel Pol i tok, wok autim tok ol wokboi bilong God i mekim em i kain olsem wanpela pait. Em i tok: “Olgeta samting bilong pait mipela i holim, ol i no samting bilong dispela graun. Nogat. Ol i gat strong bilong God, na ol inap brukim ol strongpela banis bilong ol birua. Mipela i save daunim olgeta kain tingting na giaman tok i save pasim rot bilong ol man i laik kisim save long God.” (2 Ko. 10:4, 5) Wanem sampela “strongpela banis” em skul i kam long Jehova i helpim ol man long lusim? Sampela, em ol bilip giaman, ol bilip tumbuna, na tingting bilong ol saveman. (Kl. 2:8) Skul i kam long Jehova i helpim ol man long lusim ol pasin nogut na i helpim ol long kisim ol pasin God i laikim. (1 Ko. 6:9-11) Sindaun bilong famili i kamap gutpela. Na ol man husat i no gat gutpela samting bilong wetim i kamap bihain, nau i stap bilong ol i gat as bilong en. Em kain skul olsem ol man i nidim long nau.
8 Wanpela pasin Jehova i helpim ol man long kisim em stretpela pasin, olsem dispela ekspiriens i kamapim. (Hi. 13:18) Wanpela meri long India i kirap stadi long Baibel na bihain em i kamap wanpela pablisa i no baptais yet. Wanpela taim em i helpim wok bilong sanapim wanpela Haus Kingdom, na taim em i go bek long haus, klostu long bas stesin em i lukim wanpela bilas gol, pe bilong en 800 dola (U.S.). Maski em i stap rabis, em i kisim dispela bilas i go long polis stesin na givim long wanpela polisman. Polisman i kirap nogut! Bihain, narapela polisman i tokim meri, “Olsem wanem na yu no laik holim dispela bilas?” Meri i tok: “Tok bilong Baibel i bin senisim mi na nau mi laik bihainim stretpela pasin.” Polisman i pilim tru dispela tok na i tokim elda Kristen i kam wantaim dispela meri long stesin, olsem: “I gat 38 milion manmeri long dispela provins. Sapos yu inap helpim 10-pela man long kamap olsem dispela meri, em bai wanpela gutpela samting tru.” Taim yumi tingim planti milion manmeri em skul i kam long God i bin senisim tru pasin bilong ol, i gat as tru na yumi ken litimapim nem bilong Jehova.
9. Olsem wanem ol man inap senisim tru pasin bilong ol?
9 Strong bilong Tok Bilong God, wantaim helpim Jehova i givim long rot bilong holi spirit, dispela inap helpim ol man long senisim tru pasin bilong ol. (Ro. 12:2; Ga. 5:22, 23) Kolosi 3:10 i tok: “Yupela i kamap nupela man pinis. God i bin mekim yupela i kamap nupela man, na oltaim em i save givim planti gutpela save long yupela, na em i mekim yupela i kamap nupela na yupela i kamap wankain olsem em yet.” Ol tok i stap long Baibel inap kamapim klia pasin tru bilong man, na inap stiaim tingting bilong em na ol samting em i pilim long bel. (Ritim Hibru 4:12.) Taim man i kisim stretpela save long Baibel na bihainim ol stretpela lo bilong Jehova, em inap kamap pren bilong God na tingting long kisim laip i stap oltaim oltaim.
Jehova i Redim Yumi Long Ol Samting Bai Kamap Bihain
10. (a) Bilong wanem Jehova wanpela tasol inap helpim yumi long redi long ol samting bai kamap bihain? (b) Wanem ol bikpela samting klostu nau bai kamap long olgeta hap bilong graun?
10 Jehova wanpela tasol inap helpim yumi long redi long ol samting bai kamap bihain, long wanem, em i save wanem samting klostu bai kamap. Em i save pinis long sindaun bilong ol man long bihain. (Ais. 46:9, 10) Tok profet bilong Baibel i kamapim klia olsem ‘De bilong Bikpela i klostu.’ (Sef. 1:14) Sindaun 11:4 i tok long dispela de olsem: “Maski yu gat planti mani, em i no inap helpim yu long taim Bikpela i laik bekim ol rong . . . . Tasol sapos yu bihainim stretpela pasin, dispela bai i helpim yu na yu no ken i dai.” Taim Jehova i kirap givim strafe long dispela graun bilong Satan, bikpela samting tru em God i mas orait long yumi. Mani i no inap helpim yumi. Esekiel 7:19 i tok: “Ol bai i tromoi ol gol na silva bilong ol long ol rot olsem pipia, long wanem, gol na silva i no inap helpim ol.” Yumi save pinis long dispela samting na dispela inap helpim yumi long wokim ol gutpela disisen long nau.
11. Skul i kam long God i helpim yumi olsem wanem long redi long ol samting i kamap bihain?
11 Wanpela bikpela samting em skul i kam long God i mekim na bai yumi redi long de bilong Jehova, em i olsem: Dispela skul i helpim yumi long putim ol bikpela samting i stap nambawan. Aposel Pol i tokim Timoti: “Tokim ol man i gat planti mani samting bilong dispela graun long ol i no ken bikhet na litimapim nem bilong ol yet. Ol i no ken bilip long ol dispela kain samting i save bagarap kwik. Nogat. Ol i mas bilip tru long God.” Maski yumi no gat planti mani, dispela tok inap helpim yumi. Helpim yumi olsem wanem? Yumi no ken ting long bungim planti mani kago samting, yumi mas wok strong long “mekim planti gutpela pasin bilong helpim ol arapela manmeri” na “mekim planti gutpela wok.” Taim yumi putim wok bilong God i stap nambawan samting long laip bilong yumi, yumi ‘bungim planti samting bilong helpim yumi bihain.’ (1 Ti. 6:17-19; NW) Taim yumi mekim olsem, yumi bihainim gutpela tingting, long wanem, Jisas i tok, “sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?” (Mt. 16:26, 27) De bilong Jehova i kam klostu, olsem na yumi olgeta i mas askim yumi yet: ‘Mi bungim we ol gutpela samting? Mi stap wokboi bilong God o mi stap wokboi bilong mani?’—Mt. 6:19, 20, 24.
12. Bilong wanem yumi no ken bel hevi sapos sampela i daunim wok autim tok bilong yumi?
12 Nambawan “gutpela wok” em Baibel i tokim ol Kristen long mekim, em wok autim tok bilong Kingdom na kamapim ol disaipel. (Mt. 24:14; 28:19, 20) Wankain long taim bilong ol aposel, sampela long nau i daunim wok autim tok bilong yumi, ol i ting dispela wok em i wanpela wok nating. (Ritim 1 Korin 1:18-21.) Tasol dispela i no mekim na ol tok yumi autim i no bikpela samting o i no bikpela samting long givim rot long olgeta man long bilipim dispela tok taim rot i op yet, nogat. (Ro. 10:13, 14) Taim yumi wok long helpim ol man long kisim save long Jehova, yumi bai kisim planti blesing.
Kisim Blesing Long Ol Hatwok Yumi Mekim
13. Wanem sampela samting aposel Pol i bin lusim bambai em inap autim tok bilong gutnius?
13 Paslain long aposel Pol i kamap wanpela Kristen, em i kisim trening long kamap man i gat namba na nem long lain Juda. Taim em i no winim yet 13 krismas, em i lusim as ples bilong em long Tarsus na i go sindaun long Jerusalem na kisim skul long Gamaliel, em wanpela bikpela tisa bilong Lo. (Ap. 22:3) I no longtaim na Pol i kisim planti save na i go pas long ol wanlain bilong em, na sapos em i bin wok strong yet long skul, ating bai em inap kamap wanpela bikman long lotu Juda. (Ga. 1:13, 14) Taim em i bilip long gutnius na kirap mekim wok autim tok, em i lusim olgeta dispela samting. Yu ting Pol i sori long ol samting em i lusim? Nogat. Em i tok: “Mi tingim olgeta samting i olsem samting nating, na as bilong dispela em nambawan gutpela save long Krais Jisas, Bikpela bilong mi. Long em tasol, mi orait long olgeta samting i lus na mi tingim ol olsem pipia nating.”—Fl. 3:8, NW.
14, 15. Yumi ol “wanwok bilong God” i kisim wanem ol blesing?
14 Olsem Pol, ol Kristen long nau i redi long lusim sampela samting bilong ol yet bambai ol inap autim tok bilong gutnius. (Mk. 10:29, 30) Yu ting dispela i mekim na yumi sot long sampela samting? Robert, em pastaim yumi stori long em, em i kamapim tingting bilong planti bratasista taim em i tok: “Mi no sori liklik long ol samting mi bin lusim. Wok autim tok fultaim i bin givim bikpela amamas na bel isi long mi, na i bin givim rot long mi long ‘traim na lukim olsem Bikpela i gutpela tru.’ Taim mi lusim ol samting bilong skin bambai mi ken insait long wok bilong Jehova, Jehova i blesim mi, winim ol samting mi lusim. I olsem mi no bin lusim wanpela samting, nogat, mi kisim tasol ol samting!”—Sng. 34:8; Snd. 10:22.
15 Sapos inap sampela yia pinis yu bin insait long wok bilong autim tok na skulim ol man, ating rot i bin op long yu tu long traim na lukim olsem Jehova i gutpela tru. Olsem wanem? I gat sampela taim we yu bin autim gutnius na yu pilim olsem holi spirit i strongim yu? Yu bin lukim pes bilong man i lait tru taim Jehova i opim bel bilong em long kisim ol tok yu autim? (Ap. 16:14) I gat sampela hevi Jehova i bin helpim yu long winim na bai yu inap mekim bikpela wok moa bilong autim tok? Em i bin strongim yu long taim bilong hevi na bai yu inap wok yet long mekim wok bilong em, maski yu pilim olsem yu no gat strong moa? (Fl. 4:13) Taim yumi pilim olsem Jehova i helpim yumi taim yumi autim tok, em i kamap olsem wanpela man tru long yumi na yumi pilim olsem yumi stap klostu moa long em. (Ais. 41:10) Tru tumas, em wanpela gutpela blesing tru long stap “wanwok bilong God” long dispela bikpela wok bilong skulim ol man long Jehova.—1 Ko. 3:9.
16. Yu gat wanem tingting long ol hatwok yu mekim bilong helpim ol man long save long Jehova?
16 Planti manmeri i laik mekim wanpela bikpela wok em ol man bai tingim inap planti yia bihain. Yumi bin lukim olsem maski em wanpela bikpela wok tru, liklik taim bihain ol man i no tingim moa. Tasol ol wok em lain bilong Jehova i mekim long nau bilong mekim nem bilong em i stap holi, stori bilong dispela samting bai stap oltaim oltaim. Lain bilong Jehova bai tingim ol dispela wok i go inap olgeta taim bihain. (Snd. 10:7; Hi. 6:10) Yumi ken amamas tru olsem yumi insait long dispela gutpela wok bilong skulim ol man long Jehova, em wanpela wok em lain bilong Jehova i no inap tru lusim tingting long en.
Bai Yu Bekim Olsem Wanem?
• Yumi mas mekim wanem bilong kisim skul long Jehova?
• Olsem wanem skul i kam long Jehova i helpim ol man?
• Yumi kisim wanem ol blesing taim yumi helpim ol man long kisim save long Jehova?
[Piksa long pes 23]
Ol man Jehova i skulim, ol i wanpela bikpela lain brata i stap long olgeta hap
[Piksa long pes 24]
Em wanpela gutpela blesing tru yumi stap “wanwok bilong God”