Skul i Gat As Bilong En

“Sapos yu skulim stretpela man, bai yu skruim save bilong em.”​—⁠SINDAUN 9:⁠9.

1. Jehova i laik bai lain bilong em i mekim wanem na bai ol i gat save?

JEHOVA “i save long olgeta samting.” (1 Samuel 2:⁠3) Em i givim save long lain bilong em. Moses i tok, ol narapela lain bai lukim lain Israel na ol bai tok: “Man, ol dispela lain manmeri i gat gutpela tingting na bikpela save. Ol i winim yumi tru.” (Lo 4:⁠6) Ol Kristen tru ol tu i mas i gat gutpela save. Ol i mas stadi gut long tok bilong Baibel. Bilong wanem ol i mas mekim olsem? Pol i tok: “Oltaim mitupela i save [beten] na askim God long helpim yupela, bai yupela i ken save gut tru long laik bilong em. Na bai Holi Spirit i ken givim yupela olkain gutpela save na tingting, na dispela i ken pulap tru long yupela. Olsem bai yupela inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela. Na bai yupela i mekim planti kain gutpela wok. Na bai yupela i save long God, na oltaim dispela save bai i kamap bikpela moa.”​—⁠Kolosi 1:​9, 10.

2. (a) Man i mas inap long mekim wanem na bai em i ken kisim stretpela save long God? (b) Lain Bilong Bosim Ol Witnes Bilong Jehova i bin mekim wanem long dispela samting?

² Man i mas i gat hap save long pasin bilong kaunim ol rait, olsem kaunim tok long buk samting, na bai em i ken stadi na kisim stretpela save. Long sampela kantri, planti man i bin kisim save long tok i tru bilong Baibel tasol ol i no bin skul na lain long kaunim buk, na sampela i gat hap save tasol long kaunim buk. Olsem na i hatwok long ol long stadi na kisim save long Baibel. Bilong stretim dispela hevi, inap planti yia pinis Lain Bilong Bosim Ol Witnes Bilong Jehova i bin tokim ol kongrigesen long ol dispela kantri long wokim skul bilong rit rait. Long 30 yia bipo, wanpela nius bilong Brasil (Diário de Mogi) i stori long “Ol Witnes Bilong Jehova i Lainim Ol Man Long Rit Rait,” na i tok olsem: ‘Tisa i gat gutpela save em i lainim ol manmeri long rit rait. Em i mekim long pasin isi, na em i no les kwik long ol. Ol i wokman bilong God, na ol i mas lain na bai ol i ken autim tok long ol man.’ Olsem tasol planti tausen manmeri long olgeta hap ol i bin skul olsem, na nau ol inap stadi na kisim save long tok bilong God long Baibel. I gat gutpela as na ol i mekim olsem.

Man i Mas i Gat Save na Bai Em i Ken Kamap Gutpela Tisa

3, 4. (a) Bilong wanem ol Kristen tru i laik kisim gutpela save? (b) Olsem wanem long ol Israel? Ol Kristen bilong nau i mas inap long mekim wanem?

³ Ol Kristen tru i laik kisim gutpela save na bai ol i ken mekim gut wok bilong Jehova. Krais Jisas i givim wok long olgeta Kristen, na em i tokim ol: “Mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:​19, 20) Sapos ol i mas skulim ol narapela man, orait, pastaim ol yet i mas kisim save, na bilong kisim save, ol i mas stadi gut. Ol i mas inap long skelim gut ol tok bilong Baibel. (Aposel 17:11) Na bilong mekim gutpela wok bilong skulim ol narapela, ol i mas inap long kaunim gut ol tok long buk.​—⁠Lukim Habakuk 2:2; 1 Timoti 4:13.

⁴ Olsem yumi stori pinis, yumi ken ting olsem ol yangpela Israel bilong bipo ol i bin save long pasin bilong rit rait. (Hetman 8:14; Aisaia 10:19) Ol Kristen bilong nau tu i mas inap long raitim gut sampela tok taim ol i raun autim tok long ol haus. Ol i save raitim pas, na raitim tok long miting, na raitim sampela tok taim ol i stadi. Olsem na ol i mas save long pasin bilong rait gut. Na bilong lukautim ol wok bilong kongrigesen, ol i mas save tu long ol namba na long bungim namba.

Kisim Gutpela Skul

5. (a) Long bipo, wanem insait bilong dispela tok “skul”? (b) Ol yangpela bilong nau i mas mekim wanem?

⁵ Dispela tok “skul” long tok ples Grik (skho·leʹ) i olsem man i “malolo” na bai em i ken stadi na lain long sampela samting. Tasol bihain dispela tok “skul” i makim ples ol i save skul long en. Olsem na bipo long hap bilong Grik na planti hap moa, em ol maniman tasol inap stadi na kisim save, tasol ol man nating i pas long wok na ol i no gat save long rit rait samting. Long planti kantri long nau, ol yangpela i save skul, na ol yangpela Witnes i mas givim bel long skul na kisim save na bai ol i ken kamap gutpela wokman bilong Jehova.​—⁠Efesus 5:​15, 16.

6, 7. (a) Bilong wanem i gutpela sapos ol yangpela i ken skul gut? (b) Sapos yumi lain long narapela tok ples, olsem wanem dispela i ken helpim yumi? (c) Olsem wanem long sampela yangpela long taim ol i pinis long skul?

⁶ Sapos ol yangpela Witnes i save long ol samting ol man i bin mekim long bipo, na long ol samting bilong graun, na long saiens, na kain samting olsem, dispela bai helpim ol long mekim gut ol wok insait long oganaisesen bilong Jehova. Long skul ol i ken lainim planti samting, na ol i ken lain tu long pasin bilong stadi na kisim save. Na taim ol i pinis long skul, ol i no pinis long stadi na kisim yet save. Sapos ol i save gut long pasin bilong stadi, dispela bai helpim ol long kisim gut ol samting long taim ol i stadi. Ol save ol i kisim long skul na long kongrigesen em bai helpim ol long wokim gut tingting bilong ol. (Sindaun 5:​1, 2) Na taim ol i kaunim buk bai ol inap long skelim gut ol samting na ol i ken save, wanem samting i bikpela samting na ol i mas tingim gut na no ken lusim tingting long en.

⁷ Na sapos ol yangpela i lainim narapela tok ples, dispela bai kirapim tingting bilong ol na bai ol inap tingim gut ol samting, na ol inap tu long mekim bikpela wok moa insait long oganaisesen bilong Jehova. Long sampela brens bilong Sosaiti Was Taua, sampela yangpela i bin lain long mekim tok ples Inglis na long kaunim tok Inglis, na dispela i helpim ol long mekim gutpela wok. Na olgeta Kristen i mas save gut long kolim stret tok ples bilong ol yet. Yumi mas kamapim klia gutpela tok bilong Kingdom long ol man na kolim stret na bai ol i ken pilim. Sampela yangpela long nau, taim ol i pinis long skul ol i no save gut long rit rait, na ol i no save gut long bungim ol namba, na ol i no save tumas long ol samting bilong bipo o long ol samting bilong ol narapela narapela kantri bilong graun.

Kisim Save Inap Long Yumi Mekim Wok

8. Baibel i tok wanem long Kristen i mas skul o nogat? Baibel i tok wanem long Kristen i mas inap long lukautim em yet long ol samting bilong skin?

⁸ Olsem na i gat sampela samting yumi ken tingim, olsem: Kristen i mas skul inap hamas yia? Baibel i tok wanem long dispela samting? Long planti kantri, Sisar, em gavman, i tok, papamama i mas salim ol pikinini i go long skul. (Mak 12:17; Taitus 3:⁠1) Ol yangpela Witnes i skul yet ol i mas tingim tok bilong Kolosi 3:​23, i tok: “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.” Na ol Kristen i mas lukautim ol yet long ol samting bilong skin, na ol painia tu. (2 Tesalonaika 3:​10-12) Na man marit i mas inap long lukautim meri na ol pikinini bilong em long ol samting bilong skin, na helpim sampela moa ol i sot, na helpim wok bilong autim tok long hap bilong em na long ol narapela hap.​—⁠Efesus 4:28; 1 Timoti 5:⁠8.

9, 10. (a) Long sampela kantri, olsem wanem long wok mani? (b) Ating painia i ken tingting long hamas pe inap long em?

⁹ Olsem na yangpela Kristen i mas skul inap hamas yia? Em i mas skul inap long em i gat save na bai em i ken kisim sampela wok bilong skin. Tasol long nau i hatwok long kisim wanpela wok bilong skin sapos yumi no bin skul gut na yumi no gat gutpela save. Long sampela kantri, brens bilong Sosaiti Was Taua i tok, pe sampela man i kisim i no inap long lukautim gut ol, maski ol i bin skul inap sampela yia.

¹⁰ Orait, man i mas kisim hamas pe na bai em i ken tok, ‘Em inap long mi’? Sapos em i wanpela painia, olsem man bilong autim tok bilong Baibel long ol man long olgeta de samting, em i ken tingim hamas pe inap long em? Ating em i mas i gat wanpela wok bilong skin na bai em i ken winim liklik mani, nogut ol narapela man i mas lukautim em long kaikai samting na dispela i “givim hevi long” ol. (1 Tesalonaika 2:⁠9) Sapos ol i kisim pe inap long lukautim ol long kaikai na klos na ples slip na ol narapela samting bilong skin ol i mas kisim, na dispela wok mani i no hatwok tumas, na ol i gat taim tu bilong mekim ol wok Kristen bilong ol, ating ol i ken tok, dispela pe em inap long ol.

11. Bilong wanem sampela yangpela i lusim wok painia? Olsem na i gat wanem askim?

¹¹ Long sampela kantri, sampela yangpela i bin skul inap sampela yia tasol, na ol i lusim skul na bai ol i ken mekim wok painia. Ol i no save tumas long mekim wanpela wok bilong skin, na papamama i mas lukautim ol, o ol i mas painim wanpela wok mani haptaim. Na sampela ol i mas wok planti aua long wok mani bilong ol, olsem na skin bilong ol i les tumas na ol i no inap mekim gut wok painia, na nau ol i lusim. Orait, ol i ken mekim wanem bilong painim wanpela wok bilong skin na bai ol inap kisim liklik mani bilong helpim ol long mekim wok painia?

Mas Kisim Hamas Skul?

12. (a) Wanem tupela kain tingting long skul na i no stret long Kristen? (b) Ol Kristen i dediket long Jehova na ol pikinini bilong ol, ol i ken ting, skul i bilong helpim ol long mekim wanem?

¹² Planti yangpela i ting sapos ol i kisim bikpela skul dispela bai givim biknem long ol na ol bai i gat nem long ai bilong ol man na ol inap kamap maniman. Tasol sampela yangpela i ting skul i no bikpela samting, na ol i save les long i go long skul na ol i laik lusim hariap. Tasol ol Kristen tru i no ken kisim ol dispela kain tingting. Nau long dispela laspela taim ol Kristen i mas ting, skul i bilong helpim ol long mekim laik bilong Jehova na mekim gut dispela wok. Sapos ol i no bin kisim gutpela skul, na wok mani bilong ol i gat liklik pe tasol na i no inap helpim ol long mekim wok painia, ating ol i ken tingting long skul moa na kisim save bambai ol i ken painim narapela wok mani em inap helpim ol long mekim wok painia.

13. (a) Wanpela sista long Filipin i mekim wanem na bai em inap mekim wok painia na lukautim famili wantaim? (b) Tasol yumi mas was gut long wanem samting?

¹³ Sampela Witnes i bin go insait long sampela skul na bai ol i ken lain long mekim wanpela kain wok na dispela i ken helpim ol long painim sampela wok haptaim bilong lukautim ol long ol samting bilong skin na nau ol i ken mekim wok painia wantaim. Wanpela sista long Filipin i mas lukautim famili bilong em long ol samting bilong skin, tasol em i laik wok painia tu, na brens i tok: “Sista i lain long mekim wok akaunten, na nau em inap mekim wok painia.” Na brens i tok: “I gat sampela hia ol i skul yet, tasol ol i bin stretim rot na bai ol i ken kamap painia tu wantaim. Save ol i kisim long skul em i lainim ol long pasin bilong stadi, olsem na ol i mekim gutpela wok painia moa. Tasol ol i mas was gut, nogut save bilong ol i kirapim ol long tingim sampela bikpela wok bilong graun.” Yumi tingim dispela laspela tok hia, na yumi save, sapos yumi skul bilong kisim save, as bilong dispela i no bilong kisim planti mani kago, nogat; em i bilong mekim wok bilong Jehova.

14, 15. (a) Olsem wanem yumi no ken putim lo i makim hamas skul ol i mas kisim? (b) Planti Kristen i bin kisim wanem kain skul? Tasol wanem samting i bin helpim ol?

¹⁴ Na yangpela Kristen i ken lain long skul vokesenel na kisim save long mekim wanpela wok taim em i lusim skul. Long sampela kantri, sampela yangpela i no bin kisim planti skul, tasol ol i painim sampela wok haptaim na bai ol i ken winim liklik mani inap long lukautim ol na bai ol i ken mekim wok painia. Olsem na i no gat lo i makim hamas skul yumi mas kisim.

¹⁵ Planti Kristen i no bin kisim bikpela skul, tasol sampela i stap wasman bilong raun, na sampela i wok long nambawan ofis bilong Sosaiti, o long sampela brens-ofis bilong Sosaiti. Pastaim ol i bin mekim gutpela wok painia, na ol i bin stadi na kisim moa save, na ol i lain long mekim ol wok, na nau Sosaiti i givim dispela gutpela wok long ol. Tasol sampela ol narapela wanlain bilong ol i bin go long bikpela skul na kisim “save bilong ol saveman bilong dispela graun,” na dispela i bagarapim bilip bilong ol, na ol i lusim tok i tru.​—⁠1 Korin 1:​19-21; 3:​19, 20; Kolosi 2:⁠8.

Skelim Gut Pastaim

16. (a) Husat i mas tok, pikinini bai skul moa o nogat? Ol i mas tingim wanem samting? (b) Papamama i mas tingim wanem samting taim ol i laik helpim pikinini long tingim wok em i ken lain long mekim?

¹⁶ Husat i mas tok, yangpela Kristen i mas skul moa o nogat? Baibel i tok yangpela i gat bos. (1 Korin 11:3; Efesus 6:⁠1) Olsem na papamama i mas helpim pikinini long tingim wanem kain wok em bai mekim long bihain, na hamas skul em i mas kisim na bai em i ken mekim dispela kain wok. Long sampela kantri, yangpela i mas tingim dispela samting taim em i stap long haiskul, na sapos em i Kristen, em wantaim papamama i mas beten askim Jehova long helpim ol long tingim stret dispela samting na tingim wok bilong Kingdom i namba wan wok. Ol yangpela i narapela narapela kain, na papamama i ken tingim dispela samting taim ol i tingim wanem kain wok pikinini i ken lain long mekim. Olgeta kain wok i gutpela sapos em i stret, maski em i wok bilong ofis, olsem wok kuskus samting, o em i strongpela wok man i mas mekim long han. Baibel i no tok wok bilong ofis i winim ol narapela wok. (Aposel 18:⁠3) Olsem na sapos papamama wantaim pikinini i skelim gut wanem wok pikinini bai mekim, na ol i beten tu long dispela samting, orait, ol narapela bilong kongrigesen i no ken toktok planti long dispela samting pikinini i laik mekim.

17. Sampela papamama i laikim wanem kain skul bilong pikinini?

¹⁷ Sapos papamama i laik putim pikinini long bikpela skul bilong kisim sampela save moa, em samting bilong ol. Sampela taim pikinini i mas skul o mekim kos inap planti mun o yia na bai em i ken kisim save inap long holim wok, tasol sampela papamama Kristen i tingim pe ol i mas tromoi long baim skul, o ol i laik bai pikinini i ken kirap hariap long mekim wok painia, olsem na ol i ting pikinini i ken skul sotpela taim tasol long bikpela skul o kos bilong lainim sampela wok bilong skin. Bilong lainim wanpela wok, sampela yangpela i save wok wantaim ol man long mekim ol wok, olsem wok aprentis, tasol ol i ken tingting long mekim wok painia taim ol i lain pinis long dispela wok.

18. Sapos yangpela i skul moa, em i mas tingim wanem ol samting?

¹⁸ Sapos pikinini i laik skul moa, nogut em i tingting long winim ol narapela long save, o em i tingting long holim bikpela wok bilong skin i gat namba. Em i mas tingim na skelim gut wanem samting em i laik skul long en. Planti taim Wastaua i bin tokaut long ol save bilong graun em inap paulim na pundaunim man, na i stret Wastaua i bin tok olsem, long wanem, dispela save bilong graun i pait wantaim “ol pasin i bihainim tru . . . tok bilong God.” (Taitus 2:1; 1 Timoti 6:​20, 21) Na bihain long 1960 samting, planti skul ol i ples bilong pasin nogut na pasin pamuk. “Wokboi i gat gutpela tingting” i bin tok strong long yumi mas abrusim kain ples olsem. (Matyu 24:​12, 45) Tasol long nau ol dispela wankain pasin nogut i save bungim ol yangpela long ol bikpela skul na yunivesiti na long ples wok tu.​—⁠1 Jon 5:19.a

19. (a) Sapos yangpela i laik kisim sampela skul moa, olsem mekim kos samting, gutpela em i ken mekim wanem? (b) Sampela i bin skul moa, na dispela i bin helpim ol long mekim wanem?

¹⁹ Sapos yangpela Witnes i laik stadi na kisim sampela skul moa, i gutpela sapos em i ken mekim dispela samting long haus bilong papamama, na em i ken bihainim yet ol pasin Kristen, na go long ol miting, na autim tok. Na em i mas strong long bihainim ol lo bilong Baibel tu. Taim Daniel wantaim 3-pela narapela yangpela Hibru i stap kalabus long Babilon ol i mas stadi, tasol ol i stap gut na bihainim yet ol lo bilong God. (Daniel sapta 1) Sampela yangpela Witnes i gat tingting long mekim wok painia, na ol i tingting long kisim wok haptaim na bai ol i ken lukautim ol yet long ol samting bilong skin, olsem na ol i lain long sampela wok olsem akaunten o tisa o tanim tok o narapela kain wok, tasol taim ol i mekim olsem ol i tingim ol samting bilong spirit i namba wan wok bilong ol. (Matyu 6:33) Sampela yangpela olsem ol i bin kamap wasman bilong raun na sampela i mekim wok long Betel.

Ol i Wanbel na i Gat Save

20. Olsem wanem lain bilong Jehova i no wankain olsem ol narapela lain?

²⁰ Olgeta bilong lain bilong Jehova ol i mas save gut long tok bilong Baibel na long pasin bilong skulim narapela man, maski ol i mekim wanem kain wok bilong skin na dispela wok i gat nem o nogat. Taim ol i kisim save long pasin bilong kaunim rait, olsem kaunim tok long buk, na long pasin bilong stadi, na long skulim man, dispela i mekim na i olsem olgeta i gat save, na narapela i no antap long narapela, maski wok ol i save long en i gat namba o nogat. Ol i no tingim dispela samting. Ol i wok wantaim olsem wanpela lain tasol na ol i stap wanbel na narapela i daun long narapela. Yumi ken lukim dispela samting long ol haus Betel bilong Sosaiti Was Taua na long taim ol i wokim ol haus brens samting, em ol i tingim samting bilong spirit tasol, na ol man bilong wok long ofis ol i wok gut wantaim ol man bilong wok ausait, na olgeta i amamas na i gat pasin sori i stap namel long ol.​—⁠Jon 13:​34, 35; Filipai 2:​1-4.

21. Ol yangpela Kristen i mas tingim wanem samting?

²¹ Yupela ol papamama, yupela mas stiaim tingting na laik bilong pikinini na bosim em gut na bai em i ken mekim gutpela wok insait long lain bilong nupela taim! Na yupela ol yangpela Kristen, taim yu skul yu mas tingting long redi long mekim wok bilong Jehova olsem wok painia samting! Na yumi olgeta i mas i stap olsem manmeri i gat save long mekim ol wok insait long lain bilong God long nau na long nupela taim God i tok promis long kamapim, olsem “nupela graun, na stretpela pasin tasol bai i stap long en.”​—⁠2 Pita 3:13; Aisaia 50:4; 54:13; 1 Korin 2:13.

[Ol Futnot]

Traim Tingting Bilong Yu

◻ Bilong wanem ol Kristen tru i laik kisim save?

◻ Wanem tupela kain tingting long skul na i no stret long Kristen?

◻ Wanem samting nogut bilong bikpela skul na yumi mas tingim? Kristen i mas mekim wanem long dispela samting?

[Piksa long pes 16]

Sapos yangpela Kristen i stadi gut, bihain em inap mekim gutpela wok long lain bilong nupela taim

[Piksa long pes 19]

Sapos ol i laik skul moa ol i mas ting em i bilong helpim ol long mekim gutpela wok moa bilong Jehova