Skul—Mekim Wok Long En Bilong Litimapim Nem Bilong Jehova
“Man i mekim toktok long tingting bilong em yet, em i laik litimapim nem bilong em yet. Tasol man i laik litimapim nem bilong man i bin salim em i kam, dispela man em i stretpela man. Em i no man bilong giaman.”—JON 7:18.
PASIN bilong skulim man i bin kirap long bipo bipo yet. God Jehova em i Nambawan Tisa na Man bilong skulim ol man, na taim em i wokim namba wan Pikinini bilong em, em i kirapim dispela wok bilong skulim man. (Aisaia 30:20; Kolosi 1:15) Em nau, dispela Pikinini em inap kisim skul long Nambawan Tisa yet! Dispela Pikinini—bihain ol i kolim em Krais Jisas—inap planti tausen tausen yia em i stap wantaim Papa na em i kisim gutpela skul tru. Em i kisim save long ol pasin na wok na laik bilong God Jehova. Bihain, taim em i stap man long graun, Jisas inap tok olsem: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.”—Jon 8:28.
2 Jisas i bin mekim wanem wok long dispela skul em i bin kisim? Inap 3-pela yia hap, taim em i mekim wok bilong em long graun, em i no slek liklik long skulim ol man long ol save em i bin kisim. Jisas i tingting long wanpela bikpela samting na em i mekim wok bilong skulim ol man. Em i tingim wanem samting? Yumi ken lukim tok bilong Jisas long Jon sapta 7, em i kamapim klia as bilong ol tok em i skulim ol man long en, na em i gat wanem laik na em i skulim ol man.
3 Orait, pastaim yumi ken tingim ol samting i kamap long dispela taim. Em mun Oktoba samting, long yia 32, klostu 3-pela yia bihain long taim Jisas i bin kisim baptais. Ol Juda i bung long Jerusalem bilong mekim bung bilong Ol Bikpela De Bilong i Stap Long Haus Win. Inap sampela de ol manmeri i bin mekim planti toktok long Jisas. Namel tru long ol dispela bikpela de, Jisas i go long haus lotu na em i kirap skulim ol man. (Jon 7:2, 10-14) Pasin bilong em long skulim ol i kamapim klia olsem em i wanpela gutpela Tisa tru.—Matyu 13:54; Luk 4:22.
4 Ves 15 bilong Jon sapta 7 i tok: “Ol Juda i harim dispela tok bilong en, na ol i tingting planti na ol i tok, ‘Olsem wanem na dispela man i gat ol dispela save? Em i no bin i go long skul.’ ” I gat wanem as na ol i tingting planti? Yu save? Jisas i no bin go long wanpela skul bilong ol tisa bilong lotu, olsem na long tingting bilong ol Juda em i olsem man i no bin skul. Tasol Jisas inap painim kwik ol tok insait long buk bilong God na kaunim long ol. (Luk 4:16-21) Na dispela kamda bilong Galili em i bin skulim ol long Lo Bilong Moses tu! (Jon 7:19-23) Olsem wanem em inap mekim ol dispela samting?
5 Jisas i tokaut long dispela, olsem yumi lukim long Jo 7 ves 16 na 17, em i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam. Sapos wanpela man i gat laik tru bilong bihainim tok bilong God, orait em bai i save tru long as bilong dispela tok mi autim. Em bai i save, dispela tok i kam long God, o em i kamap long tingting bilong mi yet.” Ol i laik save, husat i bin skulim Jisas, na em i tokaut stret olsem God yet i bin skulim em!—Jon 12:49; 14:10.
6 Jisas i mekim wanem wok long dispela skul em i bin kisim? Long Jon 7:18, Jisas i tok: “Man i mekim toktok long tingting bilong em yet, em i laik litimapim nem bilong em yet. Tasol man i laik litimapim nem bilong man i bin salim em i kam, dispela man em i stretpela man. Em i no man bilong giaman.” I stret tru Jisas i mekim wok long skul em i bin kisim bilong litimapim nem bilong Jehova, em “God i gat olgeta save”!—Jop 37:16.
7 Pasin bilong Jisas i lainim yumi long wanpela bikpela samting, olsem: Skul yumi kisim, em yumi mas mekim wok long en bilong litimapim nem bilong Jehova, na i no bilong litimapim nem bilong yumi yet. Em nambawan wok tru yumi ken mekim long ol save yumi bin kisim—i no gat narapela wok i winim dispela. Orait, olsem wanem yumi ken mekim wok long skul yumi bin kisim bilong litimapim nem bilong Jehova?
8 Dispela tok “skul” i makim pasin bilong “kisim save na lain long mekim wanpela wok, na i gat tisa bilong bosim wok em i lain long mekim.” Orait nau yumi ken stori long 4-pela wok bilong gutpela skul, na olsem wanem yumi ken mekim wok long olgeta wan wan bilong litimapim nem bilong Jehova. Skul yumi kisim i mas helpim yumi long (1) kaunim gut tok, na (2) raitim klia ol tok, na (3) kisim gutpela tingting na pasin, na (4) kisim save long mekim ol wok bilong helpim sindaun bilong yumi long olgeta wan wan de.
Lain Long Kaunim Gut Tok
9 Namba wan samting long dispela lista, em lain long kaunim gut tok. Bilong wanem yumi mas save gut long kaunim tok? Wanpela buk (The World Book Encyclopedia) i tok olsem: “Kaunim tok . . . em i as bilong kisim save, na em i wanpela bikpela samting yumi mas mekim wok long en long olgeta de. Ol man i save gut long kaunim tok, ol i save helpim sindaun bilong ol man long kamap gutpela na ol inap mekim gutpela wok. Na ol i helpim ol yet na i stap bilong ol i gutpela.”
10 Sapos pasin bilong kaunim tok inap helpim yumi na bai ‘i stap bilong yumi i gutpela,’ orait, taim yumi kaunim Tok Bilong God, em Baibel, dispela bai helpim yumi moa yet, a? Sapos yumi kaunim Baibel, bai yumi kisim save long ol tingting na laik bilong Jehova, na dispela save bai go long tingting na bel bilong yumi, na taim yumi kisim gut dispela save, em nau, yumi pilim olsem i stap bilong yumi i gat as bilong en. Na tu, Hibru 4:12 i tok: “Tok bilong God em i gat laip, na em i wok strong i stap.” Taim yumi kaunim na tingim gut ol tok bilong God long Baibel, i olsem yumi go klostu tru long dispela Man em i as bilong ol tok bilong Baibel, na bel bilong yumi i kirapim yumi long senisim pasin bilong yumi na bai God i ken laikim yumi. (Galesia 5:22, 23; Efesus 4:22-24) Na tu, dispela i kirapim yumi long tokim ol man long ol gutpela tok i tru yumi kaunim. Ol dispela samting i save litimapim nem bilong dispela Nambawan Tisa, em God Jehova. Em i nambawan wok tru yumi ken mekim long dispela save bilong yumi long kaunim gut tok!
11 Maski yumi yangpela o yumi lapun, yumi mas lain long kaunim gut tok, long wanem, dispela em i bikpela samting long wok bilong yumi ol Kristen. Yumi mas kaunim tok bilong Baibel long olgeta de, na tu, yumi mas makim taim bilong yumi yet i ken stadi. Long olgeta de yumi mas kaunim teks i stap long liklik buk Skelim Sampela Tok Bilong Baibel Long Olgeta De, na kaunim tok bilong Wastaua na Kirap!, na redim tok bilong ol miting Kristen. Na olsem wanem long wok bilong autim tok? Yumi save pinis, bilong mekim gut wok bilong autim tok, na go bek lukim ol man i laik harim, na mekim ol Baibel-stadi, yumi mas save gut long kaunim tok.
Lain Long Raitim Klia Ol Tok
12 Namba 2 wok bilong gutpela skul, em i mas helpim yumi long lain long raitim klia ol tok. Taim yumi raitim tok, yumi kamapim tingting na tok bilong yumi long ol man, na ol i stap pinis long pepa na i no inap lus. Planti handet handet yia bipo, inap olsem 40 man Juda i bin raitim ol tok bilong buk bilong God long pepa ol i bin wokim long wel pitpit bilong wara na long skin bilong animal. (2 Timoti 3:16) Em nambawan gutpela wok bilong raitim tok, a? Em i winim olgeta narapela wok bilong raitim tok! Yumi ken save, insait long planti handet yia Jehova i bin stiaim wok bilong raitim gen ol dispela tok holi, olsem na Baibel yumi holim long nau i wankain olsem ol i bin raitim long pastaim. I gutpela tru Jehova i bin raitim ol tok bilong em na yumi no kisim long maus bilong ol man, a?—Skelim wantaim Kisim Bek 34:27, 28.
13 Long bipo yet, ol lain i gat namba, olsem ol saveman bilong raitim buk samting long hap bilong Mesopotemia na Isip, ol tasol i gat save long rit rait. Tasol long Israel i no olsem—olgeta man i mas save long rit rait. I gat wanpela tok i stap long Lo 6:8, 9 long ol Israel i mas raitim tok long pos bilong dua long haus bilong ol. Tru, ating dispela em i wanpela tok piksa tasol, tasol dispela i makim olsem ol i save long pasin bilong raitim tok. Taim ol pikinini i liklik yet, ol i bin lain long rait. Wanpela rait Hibru ol i bin painim, ol i kolim Kalenda Gisa, em olpela tru, na sampela saveman i ting wanpela skulmanki i bin raitim bilong helpim em long tingim gut ol samting na em i no ken lusim tingting long en.
14 Tasol yumi ken mekim wanem gutpela wok long save bilong yumi long raitim tok? Yumi ken raitim ol tok yumi harim long ol miting Kristen na long ol kibung. Na taim yumi raitim pas, maski yumi raitim “sotpela tok” tasol, em inap strongim bel bilong wanpela man i gat sik, o pas i ken tok tenkyu long wanpela brata o sista em i bin mekim gut long yumi o singautim yumi i go long haus bilong em. (1 Pita 5:12) Sapos i gat brata o sista em wanpela long famili bilong em i dai, yumi ken raitim liklik pas o salim wanpela kat bilong “strongim bel” bilong em. (1 Tesalonaika 5:14) Wanpela sista Kristen em mama bilong em i dai long sik kensa, em i tok: “Wanpela pren bilong mi i salim gutpela pas long mi. Dispela pas i bin helpim mi tru, long wanem, mi inap kaunim long olgeta taim.”
15 Na gutpela wok tru yu ken mekim long save bilong yu long raitim tok, em bilong litimapim nem bilong Jehova, na wanpela rot bilong mekim olsem, em yu ken raitim pas long wanpela man o meri bilong autim tok bilong Kingdom long em. Sampela taim ol nupela man i laik harim tok ol i stap longwe long kongrigesen na yumi gat wok long raitim pas long ol bilong strongim ol. Na sapos yu gat sik, ating inap liklik taim yu no inap i go long ol haus na autim tok. Orait long kain taim olsem, yu ken raitim pas na kamapim ol tok yu save autim long ol man taim yu go long haus bilong ol.
16 Tingim dispela stori: Planti yia bipo wanpela Witnes i raitim pas na autim tok bilong Kingdom long wanpela meri em man bilong em i dai na i gat toksave bilong dispela i kamap long nius. Tasol meri hia i no bekim pas. Orait, long Novemba 1994, em 21 yia samting bihain, dispela Witnes i kisim pas long pikinini meri bilong dispela meri em man bilong em i bin i dai. Long pas dispela pikinini meri i tok:
17 “Long Epril 1973, yu bin raitim pas long mama bilong mekim gut bel bilong em taim papa bilong mi i dai. Long dispela taim mi gat 9-pela krismas. Mama i bin stadi long Baibel, tasol inap long nau em i no kamap wokman bilong Jehova. Tasol long rot bilong dispela stadi bilong em, mi bung wantaim lain bilong Jehova. Long 1988 mi kirap na stadi long Baibel—em 15 yia bihain long taim yu bin salim dispela pas. Long Mas 9, 1990, mi kisim baptais. Mi tenkyu tru long yu bin raitim dispela pas inap planti yia bipo, na mi amamas long toksave long yu olsem dispela pikinini kaikai yu bin planim, Jehova i mekim na em i bin kru na kamap bikpela. Mama i bin givim pas bilong yu long mi bilong holim i stap, na mi laik save long yu. Mi laik tru bai yu kisim dispela pas bilong mi.” Gutpela tru, dispela Witnes i bin raitim pas hia inap planti yia bipo, em i kisim pas bilong meri, i gat atres na namba bilong telefon bilong em. Ating dispela yangpela meri i kirap nogut tru taim Witnes i telefon long em. Dispela Witnes i wok yet long raitim pas bilong autim tok bilong Kingdom long ol man!
Kisim Gutpela Tingting na Pasin na Kamap Strong Long Spirit
18 Na namba 3 wok bilong dispela skul, em i mas helpim yumi long kisim gutpela tingting na pasin. Long taim bilong ol man i bin raitim Baibel, wok bilong skulim ol pikinini long kisim gutpela tingting na pasin em i wanpela bikpela wok bilong papamama. Ol i no skulim ol pikinini long rit rait tasol—bikpela samting tru, em papamama i skulim ol tu long Lo bilong God, em dispela Lo i save bosim olgeta samting ol i mekim. Olsem na ol pikinini i lain long ol wok bilong lotu ol i mas mekim, na ol lo bilong marit, na ol wok bilong famili, na ol tambu long pasin pamuk samting, na ol wok ol i mas mekim bilong helpim ol narapela man. Dispela skul i helpim ol long kisim gutpela tingting na pasin, na long kamap strong long ol samting bilong spirit.—Lo 6:4-9, 20, 21; 11:18-21.
19 Orait, olsem wanem long nau? Yumi mas kisim gutpela skul bilong graun. Dispela i save helpim yumi long wokim tingting. Tasol yumi ken kisim we gutpela skul bilong soim yumi long stretpela pasin yumi mas bihainim na em bai helpim yumi long kamap strong long ol samting bilong spirit? Yumi ken kisim dispela skul bilong God insait long kongrigesen Kristen tasol—yumi no inap kisim long narapela hap. Sapos yumi yet yumi stadi long Baibel na ol buk na nius samting bilong Baibel, na yumi go long ol miting na kibung, oltaim bai yumi kisim gutpela skul tru—em God yet i skulim yumi—na i no gat pe bilong en! Dispela skul i lainim yumi long wanem samting?
20 Taim yumi kirap nupela long stadi long Baibel, yumi lain long ol as tok bilong Baibel, em “ol skul yumi save kisim pastaim.” (Hibru 6:1) Taim yumi stadi i go, yumi kisim ol “strongpela kaikai”—olsem ol strongpela tok i tru. (Hibru 5:14) Na yumi lain tu long ol lo bilong God i skulim yumi long ol pasin God i laik bai yumi bihainim. Olsem: Yumi lain long abrusim ol “pasin doti bilong skin,” na daun long ol man i gat wok long bosim yumi, na tingim gut ol narapela man na ol samting bilong ol. (2 Korin 7:1; Taitus 3:1, 2; Hibru 13:4) Na tu, yumi kisim save olsem yumi no ken giaman o stil na yumi mas wok strong long mekim wok bilong yumi, na bihainim ol lo bilong Baibel i tambuim pasin pamuk samting. (1 Korin 6:9, 10; Efesus 4:28) Na taim yumi wok long bihainim ol dispela lo, yumi wok long kamap strong long ol samting bilong spirit, na yumi pas gut wantaim God. Na stretpela pasin yumi bihainim, dispela i mekim na yumi sindaun gut wantaim ol narapela man na mekim ol pasin i helpim ples yumi sindaun long en. Na dispela inap kirapim ol narapela man long litimapim nem bilong dispela Man em i as bilong dispela skul yumi kisim—em God Jehova.—1 Pita 2:12.
Skul i Helpim Sindaun Bilong Yumi
21 Namba 4 wok bilong gutpela skul, em bilong lainim yumi long mekim ol wok bilong helpim sindaun bilong yumi long olgeta de. Long taim bilong ol man bilong raitim Baibel, ol papamama i save skulim ol pikinini long ol dispela samting tu. Ol pikinini meri i lain long mekim ol wok bilong haus. Laspela sapta bilong Buk Sindaun 31:10-31 i makim olsem ol i mas lain long kain kain wok. Olsem na ol yangpela meri ol i gat save long wokim tret, na lumim laplap, na kukim kaikai, na mekim ol narapela wok bilong lukautim haus na famili, na mekim wok bisnis long baim graun na ol narapela wok bisnis. Ol manki i lain long mekim ol wok papa bilong ol i save mekim, olsem wok gaden, o wanpela wok bisnis, o wokim ol samting. Josep, em waspapa bilong Jisas, em i bin lainim Jisas long mekim wok kamda. Olsem na ol i save kolim Jisas olsem “pikinini bilong wanpela kamda,” na ol i kolim em tu olsem “wanpela kamda.”—Matyu 13:55; Mak 6:3.
22 Long nau tu, gutpela skul i save lainim ol pikinini bambai ol i ken lukautim gut famili bilong ol taim ol i go bikpela na ol i marit. Tok bilong aposel Pol long 1 Timoti 5:8 i makim olsem wok bilong lukautim famili long ol samting bilong skin em i wanpela wok holi yumi mas mekim. Pol i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” Olsem na skul i mas lainim ol pikinini long ol wok ol i mas mekim taim ol i bikpela pinis, na inapim ol long kamap man bilong wok strong.
23 Orait, yumi mas kisim skul bilong graun i go inap long wanem mak? Long ol narapela narapela kantri, mak bilong hamas skul yumi mas kisim ating em i no wankain. Tasol bilong kisim wanpela wok mani, sampela taim pikinini i mas lain long sampela samting moa taim em inapim pinis mak bilong gavman long hamas yia em i mas skul. Sapos olsem, orait papamama i mas stiaim tingting bilong pikinini taim em i tingim sampela skul moa em i mas kisim bilong lain long mekim wanpela wok, na ol i mas skelim olsem dispela inap helpim pikinini olsem wanem, na em inap nogutim pikinini olsem wanem. Orait, sapos pikinini i tingting olsem em i mas kisim sampela skul moa, i gat wanem as na em i laik skul moa? Nogut em i tingting long kisim bikpela mani, o kisim biknem, o ol man i litimapim nem bilong em. (Sindaun 15:25; 1 Timoti 6:17) Pasin bilong Jisas i bin lainim yumi olsem: Ol skul yumi kisim, yumi mas mekim wok long en bilong litimapim nem bilong Jehova. Sapos yumi tingting long kisim sampela skul moa, as bilong dispela tingting i mas olsem: Yumi laik kisim wok mani bilong lukautim yumi yet bambai yumi ken mekim wok bilong Jehova inap tru long skel bilong yumi.—Kolosi 3:23, 24.
24 Olsem na taim yumi wok long kisim gutpela skul, yumi mas wok strong na no ken les. Na oltaim yumi mas kisim skul i save kamap insait long oganaisesen bilong Jehova—long dispela rot God i save skulim yumi long olgeta taim. Na yumi no ken lusim tingting long pasin bilong Krais Jisas, em man i bin kisim bikpela skul tru, winim olgeta narapela man long graun. Pasin bilong em i bin lainim yumi olsem: Skul yumi kisim, yumi no ken mekim wok long en bilong litimapim nem bilong yumi yet, nogat; yumi mas mekim wok long en bilong litimapim nem bilong nambawan Tisa tru, em God Jehova!
Wanem Bekim Bilong Yu?
◻ Jisas i mekim wanem wok long skul em i bin kisim?
◻ Bilong wanem yumi mas lain long kaunim gut tok?
◻ Save bilong yumi long raitim tok, olsem wanem yumi ken mekim wok long en bilong litimapim nem bilong Jehova?
◻ Skul yumi kisim long God, olsem wanem dispela i save helpim yumi long kisim gutpela pasin na kamap strong long ol samting bilong spirit?
◻ Bilong kisim gutpela skul, yumi mas lain long wanem ol samting?
[Askim Bilong Stadi]
1. Pasin bilong skulim man i bin kirap long wanem taim? Em i bin kirap olsem wanem?
2-4. (a) Olsem Jon sapta 7 i tok, wanem ol samting i kamap taim Jisas i go long bung bilong Ol Bikpela De Bilong i Stap Long Haus Win long yia 32? (b) Bilong wanem ol Juda i tingting planti long save bilong Jisas long skulim ol man?
5, 6. (a) Jisas i tok wanem long as bilong ol tok em i skulim ol man long en? (b) Jisas i mekim wanem wok long skul em i bin kisim?
7, 8. (a) Yumi mas mekim wanem wok long skul yumi kisim? (b) Wanem 4-pela wok bilong gutpela skul?
9. Bilong wanem yumi mas save gut long kaunim tok?
10. Taim yumi kaunim tok bilong Baibel, olsem wanem dispela i helpim yumi na bai i stap bilong yumi i gutpela?
11. Insait long stadi bilong yumi yet, yumi mas makim taim bilong mekim wanem?
12. (a) Bilong wanem yumi mas lain long raitim klia ol tok? (b) Wanem bikpela wok tru i bin kamap bilong raitim ol tok?
13. Wanem samting i makim olsem ol Israel i bin save long raitim tok?
14, 15. Wanem sampela gutpela wok tru yumi ken mekim long save bilong yumi long raitim tok?
16, 17. (a) Wanem stori i kamapim klia olsem taim yumi raitim pas bilong autim tok bilong Kingdom long man, dispela inap mekim gutpela wok? (b) Yu inap kolim wanpela stori olsem?
18. Long taim bilong ol man bilong raitim Baibel, olsem wanem ol papamama i bin skulim pikinini bilong ol long kisim gutpela tingting na pasin?
19. Yumi ken kisim we gutpela skul i save lainim yumi long stretpela pasin yumi mas bihainim na i helpim yumi long kamap strong long ol samting bilong spirit?
20. Skul yumi kisim long God, em i save lainim yumi long wanem ol samting? Wanem ol gutpela samting i save kamap long dispela kain skul?
21. Long taim bilong ol man bilong raitim Baibel, ol pikinini i bin lain long wanem ol samting?
22, 23. (a) Wok bilong skul em i bilong lainim ol pikinini long mekim wanem long bihain? (b) Sapos yumi tingting pinis olsem yumi mas kisim sampela skul moa, yumi mas i gat wanem laik na yumi mekim olsem?
24. Pasin bilong Jisas i bin lainim yumi long wanem samting na yumi no ken lusim tingting long en?
[Blok long pes 13]
Samting Bilong Helpim Ol Tisa
Long ol “Amamas Long Litimapim Nem Bilong God” Kibung Distrik bilong 1995/96, Sosaiti Was Taua i kamapim wanpela nupela buklet, nem bilong en Jehovah’s Witnesses and Education. Dispela buklet i gat 32 pes na ol piksa i gat kala kala, na ol i wokim bilong ol tisa. Inap long nau ol i tanim pinis long 58 tok ples.
Bilong wanem ol i wokim wanpela buklet bilong ol tisa? Ol i wokim bilong helpim ol long save gut long bilip bilong ol sumatin em ol i pikinini bilong ol Witnes Bilong Jehova. Dispela buklet i gat wanem ol tok long en? Em i tokaut klia na stret long tingting bilong yumi long ol samting olsem skul, betde, Krismas, salut long plak. Na buklet i toksave long ol tisa olsem yumi laik bai ol pikinini bilong yumi i wok strong long kisim save long skul, na yumi laik wok gut wantaim ol tisa na tingim gut skul bilong ol pikinini bilong yumi.
Yumi ken mekim wanem wok long dispela buklet Education? Ol i bin wokim bilong ol man i gat wok long skulim man, olsem na yumi ken givim long ol tisa, na ol het-tisa, na ol narapela bos bilong skul. Mipela laik bai dispela nupela buklet i ken helpim olgeta tisa bilong skul, na bai ol i ken save long ol tingting na bilip bilong yumi, na bilong wanem sampela taim yumi strong long i stap narapela kain long ol man na i stret yumi ken mekim olsem. Mipela laik kirapim ol papamama long mekim wok long dispela buklet taim ol i toktok wantaim tisa bilong ol pikinini bilong ol.
[Piksa long pes 10]
Long Israel bilong bipo, skul em i bikpela samting tru